Спорт хъыбархэр

Урыс Мухьэмэд дуней псом и чемпионщ

Сербием и Нови-Сад къалэм щекIуэкIащ грэпплингымкIэ («Grappling Gi», «Grappling No-Gi» унэтIыныгъэхэмкIэ) дунейпсо чемпионат. Абы щызэпеуащ къэрал куэдым я спортсмен лъэщхэр, УФ-м и командэри яхэту. Урысейм хузэфIэкIащ дыщэ медалу 11 абы къыщихьын.

Ди гуапэ зэрыхъущи, УФ-м и щIыхьыр иIэту абы щыIа ди адыгэ щIалэ Урыс Мухьэмэд килограмми 100 зи хьэлъагъхэм я деж япэ увыпIэр щиубыдащ. Япэрей зэIущIищым, и зэфIэкIымрэ и IэзагъымкIэ нэрылъагъуу ефIэкIыу абы хигъэщIащ Франджым, Норвегием, Молдавием я бэнакIуахэр, финалми Куржым и спортсменым абы Iэмал иритакъым къытекIуэну.

УФ-м и командэ къыхэхам хэту абы щыбэнащ ди лъахэгъу щIалэ Таппасханов Ислъами икIи и хьэлъагъ елъытауэ зыхэта гупым (кг 92-рэ) етIуанэ увыпIэр къыщихьащ.

Медаль куэд къахь

Чувашием и Новочебоксарск къалэм щекIуэкIащ карате лIэужьыгъуэхэмкIэ дунейпсо чемпионат. Абы щызэпеуащ къэрал 29-м я спортсмен 3700-м нэблагъэ.

ТхьэмахуэкIэ екIуэкIа зэхьэзэхуэхэм УФ-м и командэ къыхэхам гуп зэпеуэм япэ увыпIэр къищихьащ. Белоруссиер етIуанэщ, Ермэлыр ещанэщ.

Ди къэралым и командэм хэту абы щыIащ Къэбэрдей-Балъкъэрым и спортсмен 23-рэ икIи псори зэхэту медаль 39-рэ къыщахьащ: 11-р дыщэу, 15-р дыжьыну, 13-р домбеякъыу. Я хьэлъагъ елъытауэ зыхэта гупхэм чемпион щыхъуахэщ Бахъсэн Темырлан, Лазаренкэ Ангелинэ, Урусбиев Елдар, Асановэ Бэллэ, ДзыхьмыщI Темырлан, КIуэкIуэ Дамир, Рахаев Сэлим, Федоренкэ Владислав, Хавбаевэ Камилэ, Гижгиев Эльхъан, Мамаев Рэмэзан сымэ.

  Урысейпсо зэпеуэм макIуэ

Урысей Ипщэмрэ Кавказ Ищхъэрэмрэ я щIыналъэхэм псы есынымкIэ я чемпионатрэ пашэныгъэхэр къыщыхьынымкIэ зэхьэзэхуэрэ Астрахань къалэм щекIуэкIащ. Абы щызэпеуащ къэралым и щIыналъэхэм я спортсмен, щIалэхэри хъыджэбзхэри зэхэту, 400-м нэблагъэ.

 Къэбэрдей-Балъкъэрым и лIыкIуэу Шелаевэ Марие, Шакъ Ясминэ, Бедраевэ Даринэ, Тигиевэ Дианэ, Сэбан Идар, Бэрэгъун Даир, Сэбан Инал сымэ абы щыIати, щхьэзакъуэ зэпеуэхэмрэ эстафетэхэмрэ псори зэхэту медаль 18 къахьащ: 1-р дыщэу, 12-р дыжьыну, 5-р домбеякъыу.

Щхьэзакъуэ зэхьэзэхуэхэм Шакъ Ясминэ медалиплI къыхихащ – дыжьынищрэ зы домбеякърэ. Шалаевэ Марие зы дыжьынрэ домбеякърэ чемпионатым къыщихьащ. Тигиевэ Дианэ пашэныгъэр къэхьынымкIэ зэпеуэхэм зы дыщэ медалрэ дыжьыниплIрэ щызыIэригъэхьащ.

 Иджы Дианэрэ Мариерэ адэкIэ къапэщылъщ урысейпсо зэхьэзэхуэу Къэзан къалэм щекIуэкIынум хэтыну.  

ХЬЭЩОКЪУЭ Алыдж.