Спорт хъыбархэр

Кубокыр Бахъсэн макIуэ

КъБР-м и Кубокыр футболымкIэ къэхьыным хуэунэтIауэ ветеранхэм ирагъэкIуэкI зэпеуэм и кIэух зэхьэзэхуэр Налшык къалэм и «Спартак» стадионым щызэхэтащ. Абы щызэхуэзащ Бахъсэн къалэм и «Старая крепость» командэмрэ Дзэлыкъуэ районым и Псынэдахэ къуажэм и «Родник» клубымрэ. 
Зэпеуэ удэзыхьэхым бжыгъэр 3:1-уэ бахъсэндэсхэр щытекIуащ икIи Кубокыр яхьащ. Абыхэм ящыщ ЛъэнкIэпIашэ Алим топджэгу нэхъыфIу къалъытащ.
Финалым икIа командитIым кубокхэмрэ саугъэтхэмрэ иратащ КъБР-м ФутболмыкIэ и федерацэм и унафэщI Мэшыкъуэ Аслъэнрэ «Спартак-Налшык» командэм и тхьэмадэ Заруцкий Александррэ. 
 

ШэмпIар Инал етIуанэщ

«Санкт-Петербург и студентхэм я спорт джэгухэр-2025» фIэщыгъэр зэрихьэу ищхъэрэ къалащхьэм щекIуэкIащ УФ-м и еджапIэ нэхъыщхьэхэм я щIэс щIалэгъуалэ 500-м нэблагъэм я зэхьэзэхуэ. Къэбэрдей-Балъкъэрым и гъэсэн ШэмпIар Инал абы етIуанэ увыпIэр къыщихьащ. 
Санкт-Петербург къалэм ФизкультурэмкIэ и дзэ институтым щеджэ адыгэ щIалэм алыдж-урым бэнэкIэм зыхуегъасэ. И хьэлъагъ елъытауэ зыхэта гупым Инал зэIущIих щригъэкIуэкIати, тхум щытекIуащ, кIэухым, зэрыжаIэу, и къару хуримыкъужу, къыщыхагъэщIащ. Дыжьын медалым къыдэкIуэу ШэмпIарыр хагъэхьащ ар щеджэ инститым и командэ къыхэхам икIи абы и щIыхьыр ихъумэу урысейпсо, дунейпсо утыкухэм щыбэнэнущ.
Къыхэдгъэщынщи, алыдж-урым бэнэкIэм щIалэщIэм лъагъуэ щыпхезыгъэшар, илъэсипщIкIэ абы дэлэжьа Къурмэн Муратрэ Хъуран Муратрэщ.

Бетрожь Дамир къахожаныкI

Воронеж къалэм иджыблагъэ щекIуэкIащ УФ-м ашихарэ-каратэмкIэ и чемпионатрэ пашэныгъэр къэхьыным хуэунэтIа зэхьэзэхуэрэ. Абы щызэпеуащ ди къэралым и щIыналъэхэм ящыщу 16-м я спортсмен, щIалэхэри хъыджэбзхэри зэхэту, 700-м щIигъу. 
Къэбэрдей-Балъкъэрым и щIыхьыр яIэту зэхьэзэхуэхэм цIыхуибгъу хэтащ икIи абыхэм ящыщу УФ-м и чемпионатым и дыжьын медалыр къихьащ Бетрожь Дамир. Пашэныгъэр къэхьыным хуэунэтIа зэпеуэхэм япэ увыпIэхэр щаубыдащ Уянов Ахъмэт, Калининэ Елизаветэ, Хортиев Олег, Шахмурзаев Iэмин сымэ, Жабоевэ Тамарэ етIуанэщ. 
Ди спортсменхэр зэхьэзэхуэхэм хуагъэхьэзыращ Сэбаншы Мурат, Мэкъуауэ Алан, Шахмурзаев Щыхьмырзэ сымэ.