Спорт хъыбархэр

  Карачаевск щызэхуос

Къэрэшей-Шэрджэсым хыхьэ Карачаевск къалэм и «Олимп» спорт комплексым щекIуэкIащ бэнэкIэ хуитымкIэ урысейпсо зэхьэзэхуэ, «Олимпым и гугъапIэхэр» фIэщыгъэр зэрихьэу. Абы щызэпеуащ ди къэралым и щIыналъэхэм ящыщу 20-м я бэнакIуэ 250-м щIигъу, я ныбжькIэ илъэс 18-м щIимыгъуауэ.

 Къэбэрдей-Балъкъэрым и командэм зэхьэзэхуэм медалитI къыщихьащ. Я хьэлъагъ елъытауэ зыхэта гупхэм УнэлIокъуэ Сэлим (кг 80) япэ увыпIэр, Кумыщ ТIалиб (кг 110-рэ) ещанэр щаубыдащ.

ЩIалэхэм я тренерхэр Шэкъум Iэхьедрэ Жыгун Анзоррэщ.

Мейкъуапэ щызэпоуэ

«Урысейм и къэкIуэнур» фIэщыгъэр зэрихьэу стIолыщхьэ теннисымкIэ зэхьэзэхуэ зэIуха Мейкъуапэ къалэм щекIуэкIащ иджыблагъэ. Абы щызэпеуащ Краснодар, Ставрополь крайхэм, Запорожье, Ростов областхэм, Къалмыкъым, Адыгейм, Къэбэрдей-Балъкъэрым, Къэрэшей-Шэрджэсым я спортсмен ныбжьыщIэу, щIалэхэри хъыджэбзхэри зэхэту, 120-рэ, я ныбжькIэ илъэс 12 - 14-м къриубыдэу.

Ди республикэм и щIыхьыр яIэту зэхьэзэхуэм щыIащ спортсмен 12 икIи абыхэм ящыщу тIум дыщэ медалхэр къахьащ. Илъэс 14 зи ныбжьхэм я деж япэ щыхъуащ Хьэнэ Батыр, илъэс 12 хъухэм Хочуев Сулеймэн щынэхъ лъэщащ.

 Командэм и тренерыр Темыркъан Заурщ.

 Краснодар щызэхуозэ

Краснодар къалэм иджырей пятиборьемкIэ щекIуэкIа урысейпсо зэхьэзэхуэм хэтащ ди къэралым и щIыналъэхэм ящыщу 10-м я спортсмен 200-м щIигъу. Ар я фэеплъу щытащ а щIыналъэм щIыхь зиIэ и тренерхэм.

Къэбэрдей-Балъкъэрым и спортсменхэм ящыщу категорие «А»-м щызэпеуахэм я деж Къубей Сабыр япэ увыпIэр къыщихьащ, категорие «Б»-м ещанэ щыхъуащ Щэрмэт Руслан.

Хъыджэбзхэм я зэхьэзэхуэм «Б» категорием хэта гупхэм я зэпеуэм етIуанэ увыпIэр ди командэм къыхуахьащ Атабиевэ Маликарэ Алиярэ, Калабековэ Азизэ, Быф Миланэ сымэ. ЩIалэхэм я зэIущIэхэми ди командэр етIуанэ щыхъуащ. Абы хэтащ Щэрмэт Руслан, Боттаев Дамир, Уэрсей Дамир, Къалмыкъ Къаплъэн сымэ.

Балигъхэм я зэхьэзэхуэми республикэм и щIалэ гупым: Къубей Сабыр, Веденяпин Дамир, КIуж Малик сымэ - дыжьын медалхэр къыщахьащ.

Ди командэм дэлажьэр Зенинхэ Игоррэ Сергейрэ, Ковалев Сергей сымэщ.