Политикэ, щIыналъэ зэпэщIэувэныгъэу зауэм хуэкIуэжхэр, щIыуэпсым леишхуэ къытрамыгъэхьэн папщIэ, мардэ гуэрым зэрыщхьэпрымыкIыпхъэр къыщыхэщащ ООН-м и Ассамблее Нэхъыщхьэм Швейцарием и къалащхьэ Женевэ 2001 гъэм щригъэкIуэкIа зэхыхьэм.
Абы къэрал зэмылIэужьыгъуэхэм я щIэныгъэлIхэмрэ я къулыкъущIэхэмрэ къыщызэдащта зэухылIэныгъэм къызэрыхэщымкIэ, игъуэ хъуащ (мыгувамэ), ЩIы Хъурейм и къэкIуэныр зэрыхэплъэгъуэ дыдэм къыхэкIыу, щIыуэпсым щхьэзыфIэфIыгъэкIэ леишхуэ къытезыгъэхьэхэри зэрегупсыс щымыIэу зыуцIэпIхэри дунейпсо жэуапым ирашэлIэну. АтIэми, зэрыгурыIуэгъуэщи, а Iуэху еплъыкIэм иригъуазэу зауэ IэнатIэм пэрыувэр мащIэ дыдэщ.
Я дуней еплъыкIэ, зэхэтыкIэр зэрызэтемыхуэм къыхэкIыу, къэралхэм я зэхуаку къыдэхъуэ зэныкъуэкъур хьэщхьэрыIуагъэм нэхъ щыхуагъакIуэ щIыпIэхэм щIыуэпсым и щытыкIэр къызэрымыкIуэу зэрыщызэIыхьэм къыхэкIыу, а Iуэхугъуэ мыщхьэпэм жылагъуэр пэщIэгъэтыным къыхуезыджэ махуэу щэкIуэгъуэм и 6-р къыщащтари ищхьэкIэ зи гугъу тщIа зэхуэсырщ.
А унафэм арэзы техъуахэм псом япэу нэхъ зытрагъэщIар щIыпIэ зэхуэмыдэхэм къыщыхъей зауэхэр дыкъэзыухъуреихь дунейми абы къыдит хъугъуэфIыгъуэхэми хуабжьу зэрегуауэрщ. АтIэми, щIыуэпсым къылъыс тхьэмыщкIагъэм апхуэдизу зиубгъущащи, Iэщэ зэмылIэужьыгъуэхэмкIэ щызэпэщIэувэ зэныкъуэкъум «ижь» зыщIихур ар щекIуэкI щIыналъэмрэ щыпсэу цIыхухэмрэ я закъуэкъым, атIэ а хэгъэгум къедза Iэхэлъахэми зэхъуэкIыныгъэ инхэр къыщегъэхъу.
ЩIэныгъэлIхэми ООН-м къулыкъу щызыщIэхэми ящыщу гудзакъэ-гулынцI нэхъ зиIэхэм къызэралъытэмкIэ, къыхэдгъэща хьэкIэкхъуэкIагъэм хуэдэхэр, нэгъуэщI мыхъуми, яхуэгъэмэщIэнут зэпэщIэувэныгъэ гущIэгъуншэхэм лъэныкъуэ зырыз ирищIыкIхэр щIыуэпсым леишхуэ зэрырахыр я нэгу къыхущIэгъэхьамэ. АбыкIэ щапхъэкъэ, псалъэм папщIэ, совет лъэхъэнэм кинотеатрхэми телевиденэми куэдрэ къыщагъэлъэгъуа «Отец солдата» фильм цIэрыIуэм хэт теплъэгъуэр. Хэт зи нэгу къызыхущIэмыгъэувэжынур, Махарашвили куржы дадэр, и къуэр къыщилъыхъуэу зауэм Iуту, Германием и щIыналъэм къыщыхутарэ советыдзэхэм я гъусэу здэкIуэм, танкзехуэхэр зрихьэлIа жызумыпкъыр я «гъущIышымкIэ» щысхьыншэу зэрызэхаутэр гукъутэ къыщыхъуауэ зэрыщытар…
Дауи, зэрыгурыIуэгъуэщи, зэпэщIэувахэм захуэбгъазэу, «фызэзауэми, фи хъуреягъыр зэтевмыкъутэ!» яжепIэныр щхьэгъэпцIэжщ, хэкIыпIэ щIагъуэу зэрыщымытри гурыIуэгъуэщ. Ауэ щыхъукIи, ООН-м щылажьэхэм зытрагъэчыныхьыр зыщ: зэпэщIэувэныгъэ къызыхулъыкъуэкIахэм, дыкъэзыухъуреихь дунейм леишхуэ къытрагъэхьэ зэрымыхъунури къагурыIуэжу, я зэхуаку къыдэхъуэ зэныкъуэкъур зауэ гуащIэм зэрыхуамыгъэкIуэжынырщ...
КЪУМАХУЭ Аслъэн.
