Спорт зэхьэзэхуэхэр

Медалитху къахь

Грэпплингымрэ грэпплинг-гимкIэ Урысейм и Кубокыр къэхьыным хуэунэтIауэ Мэзкуу областым и Наро-Фоминск къалэм и «Нара» спорт комплексым иджыблагъэ щекIуэкIа зэхьэзэхуэм медалитху къыщахьащ Къэбэрдей-Балъкъэрым и спортсменхэм.

И хьэлъагъ елъытауэ зыхэта гупым етIуанэ увыпIэр щиубыдащ Мэкъуауэ Ахъмэт. ЕтIуанэ хъуахэщ Балэ Хьэсэнбийрэ Къэрэшей Къантемыррэ. Абыхэм нэмыщI, лIэужьыгъуитIми щыбэна Пэфыф Темырлан хузэфIэкIащ медалитI абыхэм къыщихьын: зы дыжьынрэ домбеякърэ.

ЩIалэхэр зэхьэзэхуэм хуагъэхьэзыращ Шыхъуэстэн Руслан, Мэш Алим, Хьэщыкъуей Артур сымэ.

Иджы екIуэкIа зэпеуэхэм хэтащ къэралым и щIыналъэхэм ящыщу 37-м я спортсмен 300-м щIигъу.

 ТIуми щырыщ

Аруан районым иджыблагъэ щекIуэкIащ авиамодельнэ спортымкIэ урысейпсо зэхьэзэхуэ. Абы хэтащ, хэгъэрейхэм нэмыщI, Къэзан, Смоленск, Таганрог, Новгород Ищхъэрэ, Ставрополь къалэхэм я спортсменхэр икIи ахэр зэпеуащ «F-3-J», «F-5-J» и «F-3-K» классхэр зиIэ IэрыщI кхъухьлъатэхэмкIэ.

 ГъэщIэгъуэну икIи удэзыхьэхыу екIуэкIа зэпеуэхэм къарикIуахэр зэхалъхьэжа нэужь наIуэ къызэрыхъуамкIэ, Къэбэрдей-Балъкъэрым и авиамоделистхэм медалих къыхуагъэфэщащ: Шыгъушх Андемыркъан зыхэта гупым дыжьыну медалищ къыщихьащ, Соколов Алани - домбеякъыу щы.

  НАУРЫЗ Ислъам.