Спорт хъыбархэр

 ДыщэкI Мурат и дыщэ медалыр

Саратов къалэм щекIуэкIащ дуней псом универсальнэ зэзауэмкIэ и чемпионатрэ пашэныгъэр къыщыхьыным хуэунэтIа зэхьэзэхуэрэ. Абы щызэпеуащ къэрал 32-м я спортсмен 1000-м щIигъу.

Гупхэм я зэхьэзэхуэм УФ-м и командэм япэ увыпIэр къыщихьащ. Къэзахъстаным и спортсменхэр етIуанэ хъуащ, Абхъазым и лIыкIуэхэр ещанэщ.

 УФ-м и командэ къыхэхам хэту зэхьэзэхуэм щыIащ Къэбэрдей-Балъкъэрым и спортсмен 12 икIи абыхэм ящыщу килограмм 95-рэ зи хьэлъагъхэм я деж чемпионатым и дыщэ медалыр къыщихьащ ДыщэкI Мурат.

 Дуней псом пашэныгъэр къыщыхьыным хуэунэтIауэ екIуэкIа зэпеуэхэм щытекIуащ Бейтыгъуэн Аланрэ Мэлыхъуэ Аланрэ. КIэбышэ Елдар ещанэ увыпIэр къихьащ.

Ди щIалэхэм ядэлажьэр УФ-м щIыхь зиIэ и тренер Бейтыгъуэн Русланрэ Щомахуэ Казбекрэщ.

НыбжьыщIэхэр зэпоуэ

Къэбэрдей-Балъкъэрым алыдж-урым бэнэкIэмкIэ пашэныгъэр къыщыхьыным хуэуэнэтIа зэхьэзэхуэ Налшык къалэм щекIуэкIащ иджыблагъэ. Абы щызэпеуащ спортсмену 280-рэ икIи ахэр гупитIу гуэшауэ щытащ.

Зи ныбжьыр илъэс 16-м щIимыгъуахэм я деж я хьэлъагъ елъытауэ зыхэта гупхэм япэ увыпIэхэр къыщахьащ ФIыцIэхъу Темырлан, Хьэбылэ Идар, Ажэгъуей Адлан, Дыкъынэ Руслан, Хьэкъул Къаплъэн, Ажэгъуей Амир, Джатэгъэжь Темболэт, Емкъуж Сулеймэн, Бахъуэ Азрэт, Хъущт Сэлим, Сэншокъуэ Ислъам, Тэнащ Iэдэм, КIэмпIарэ Чэрим, Щомахуэ Айдар сымэ.

Зи ныбжьыр илъэс 18-м щIимыгъуахэм я деж япэ увыпIэхэр щаубыдащ Дыкъынэ Руслан, Хьэкъул Къаплъэн, Бэмбэт Андемыркъан, Махуэ Темыркъан, Дадэ Алихъан, Бахъуэ Азрэт, ХьэпцIэ Самир, Хъущт Чэрим, Нэчо Анатолэ, КIуэкIуэ Амырхъан, Гуэщокъуэ Инал сымэ.

Каратистхэр зэIуощIэ

«Хэкум и хъумакIуэхэр» фIэщыгъэм щIэту КИФЩI-м киокусин-кан каратемкIэ пашэныгъэр къыщыхьыным хуэунэтIа зэхьэзэхуэ Налшык къалэм щекIуэкIащ. Ар къызэригъэпэщащ КъБР-м Киокусин-кан каратэмкIэ и федерацэм.

Зэхьэзэхуэм щызэпеуащ Кавказ Ищхъэрэм и щIыналъэхэм я спортсмен 200-м щIигъу, абы щыщу 65-р ди республикэм ейуэ.

ГъэщIэгъуэну икIи удэзыхьэхыу гупхэм ирагъэкIуэкIа зэпеуэхэм япэ увыпIэр щиубыдащ КъБР-м и командэм, Шэшэным къикIахэр етIуанэ, Ставрополь крайм щыщхэм ещанэ увыпIэхэр къахьащ.

  Нэхъ лъэщыр зэхагъэкI

Къэбэрдей-Балъкъэрым армрестлингымкIэ и чемпионатрэ пашэныгъэр къыщыхьыным хуэунэтIа зэхьэзэхуэрэ Налшык къалэм щекIуэкIащ мы махуэхэм. Абы щызэпеуащ ди республикэм и къуажэрэ къалэу 40-м щIигъум я спортсмену 250-м нэблагъэ.

Зэхьэзэхуэр къызэрыхахыу щытащ. Абы щытекIуахэр хэтынущ КИФЩI-м и чемпионатымрэ пашэныгъэр къыщыхьыным хуэунэтIауэ 2026 гъэм щIышылэм и 11 - 18-хэм Владикавказ къалэм щрагъэкIуэкIыну зэпеуэхэм.

 Я хьэлъагърэ ныбжьрэ елъытауэ IэпщэкIэ зэпекъуахэм я деж япэ щыхъуащ Шурдым Имран, Жэрыщты Лосэн, Пэфыф Имран, Тэтрокъуэ СулътIан, Кучменов Даниял, Къэжэр Алийбэч, Сыжажэ Имир, Мусуков Ахъмэт, Пщыбий Алан, Бэрэздж Кемран, Къуэдзокъуэ Казбек, Шыбзыхъуэ Амур, Мамедов Исмэхьил, Бжьахъуэ Теймураз, Чып Дамир, Балъкъэр Дамир, Алий Алий, ПщыхьэщIэ Къантемыр, Пщынокъуэ Алим, Алыхьбэрды Валерэ, Балэ Темырлан, Бырсэ Мартин, Хасаев Сэлим, Къумыкъу Алим, Балъкъэр Ибрэхьим, УнащIэ Инал, Къарэнашэ Залым, Къуэдзокъуэ Казбек, Иуан Ахьмэд, Беслъэней Аслъэн, Шыхъуэ Ислъам, Шыд Резуан, АбытIэ Азрэт, Къэрэгъул Хьэутий, Шэджэм Алан, Джэтауэ Руслан, Iэпщацэ Миланэ, Семэн Каринэ, Пщыбий Артур, Узеев Ахъмэт сымэ.

Спортым драгъэхьэхыу

СтIолыщхьэ теннисым цIыху нэхъыбэ дегъэхьэхыным, гъащIэ узыншэм ахэр къыхэшэным хуэунэтIауэ Дзэлыкъуэ районым зэхьэзэхуэ щекIуэкIащ. Абы щхьэхуэу щызэпеуащ зи ныбжьыр илъэс 17-м щIимыгъуахэмрэ илъэс 18-м къыщыщIэдзауэ нэхъыжьхэмрэ.

Япэ гупым  щытекIуащ КъуэщIысокъуэ Iэнур, етIуанэ хъуащ Аслъэныкъуэ Азэмэт, ещанэр Дол Сослъэнщ. 

Саугъэт щхьэхуэкIэ зэхьэзэхуэм щагъэпажащ КъуэщIысокъуэ Наимэ.

ЕтIуанэ гупым щытекIуащ Джэдгъэф Ахьмэд, етIуанэ хъуащ Быф Идар, ещанэр Аслъэн Идарщ. Мыбдежым саугъэт щхьэхуэ щыхуагъэфэщащ КIуэкIуэ Мадинэ.

                                                                           НАУРЫЗЫКЪУЭ Хьэмэдэ.