Спортым ехъулIэныгъэфIхэр къыщызыгъэлъагъуэ щIалэщ Лэскэн районым хыхьэ Хьэтуей къуажэм щыщ ЩхьэщэмыщI Рэмэзан. Мы махуэхэм абы и текIуэныгъэхэм къахэхъуащ – Хьэрып Эмират Зэгуэтхэм я Эль-Фуджейрэ къалэм бгырыпх бэнэкIэмкIэ щекIуэкIа дунейпсо чемпионатым бжьыпэр щиубыдащ икIи Урысейм дыщэ медалыр къыхуихьащ. Зэхьэзэхуэм ЩхьэщэмыщIым наIуэ щищIащ а спорт унэтIыныгъэмкIэ дуней псом зэфIэкI нэхъ лъагэ дыдэ зэрыщиIэр. Иджы Рэмэзан бгырыпх бэнэкIэмкIэ тIэунейрэ дунейпсо чемпионщ. Къыхэгъэщыпхъэщ, апхуэдэ щIыкIэкIи Лэскэн районым щыяпэу щIалэм «Урысейм спортымкIэ щIыхь зиIэ и мастер» цIэм и мардэхэр зэригъэзэщIар.
Эль-Фуджейрэ щекIуэкIа спорт зэхьэзэхуэм хэтащ Европэм, Азием, Африкэм, Латин Америкэм я къэрал 35-м къикIа спортсмен 350-рэ. ЩхьэщэмыщIым и зэфIэкI щигъэлъэгъуащ зи хьэлъагъыр килограмми 100-м щIигъухэм я гупым. Абы и ныкъуэкъуэгъухэм яхэтащ зи хьэлъагъыр килограмми 170 – 180-рэ хъу бэнакIуэхэр. Япэ зэпэщIэтыныгъэр абы дригъэкIуэкIащ Таджикистаным и лIыкIуэ спортсменым. ЕтIуанэ зэпеуэм ар щыпэщIэтащ Молдавие республикэм и бэнакIуэм. КъыкIэлъыкIуэу абы хигъэщIащ Ираным щыщ и ныкъуэкъуэгъур. Зэхьэзэхуэм и финалым Рэмэзан щыIущIащ Узбекистаным щыщ бэнакIуэ лъэщым, зи хьэлъагъыр килограмми 180-рэ хъум. Мы зэпэщIэтыныгъэм ЩхьэщэмыщIым и къару, Iэзагъ, лъэкIыныгъэ псори къыщигъэлъэгъуащ, езым и бэнэкIэ хабзэхэр ерыщу игъэзащIэурэ и ныкъуэкъуэгъум ефIэкIри, къэралри, республикэри, лъэпкъри, езым и къуажэ цIыкIури зыгъэгушхуа текIуэныгъэр зыIэригъэхьащ.
ЩхьэщэмыщI Рэмэзан Лэскэн районым Олимп джэгухэм хэтыфынухэр щагъэхьэзыр и спорт школым и гъэсэнщ. Абы и гъэсакIуэр РСФСР-м лъэпкъ бэнэкIэхэмкIэ и чемпион, урысейпсо категорие зиIэ тренер, и адэ ЩхьэщэмыщI Ахьмэдхъанщ. И гъэсэным зыIэригъэхьа ехъулIэныгъэмкIэ Ахьмэдхъани игъэзэщIащ «Урысейм щIыхь зиIэ и тренер» цIэм и мардэхэр.
Зи адэр спортым хэт щIалэ цIыкIур а дунейм хэша зэрыхъунур, дауи, гурыIуэгъуэщ. ИкIи и сабиигъуэм щегъэжьауэ Рэмэзан а унэтIыныгъэм и зэфIэкIым зэрызыщригъэужьыным хущIэкъуу къыдэкIуэтеящ. Ерыщу, езэш имыщIэу зыхуигъэсащ абы спортым. А лъагъуэм зэрытехьар игу къыщигъэкIыжкIэ, абы жеIэ зэуэ ехъулIэныгъэхэм зэрыхуэмыкIуар, ауэ зыгъэсэныгъэхэр зэи IэщIыб ищIакъым. «Си адэм зэпымыууэ жиIэрт спортым зэи укъыщикIуэт зэрымыхъунур. УкъикIуэтакъэ – уэ езым зыхэбгъэщIэжауэ аращ. Нэхъыщхьэр пхузэфIэкIыр абы щыбгъэлъэгъуэнырщ, махуэ къэс уи Iэзагъым хэбгъэхъуэнырщ, адэкIэ нэхъ лъэщыр гъащIэм наIуэ къищIынущ», - жеIэ Рэмэзан.
2015 гъэм курыт школым и 11-нэ классым щIэсу ар хэтащ республикэм и гуп хэхахэм хагъэхьэнухэр къыщыхах спорт зэхьэзэхуэм. Абы зэфIэкI хъарзынэхэр къыщызыгъэлъэгъуа щIалэр хэтащ ныбжьыщIэхэм алыдж-урым бэнэкIэмкIэ я урысейпсо зэхьэзэхуэм. КъыкIэлъыкIуэ илъэсым а зэхьэзэхуэ дыдэм етIуанэ увыпIэр къыщихьащ. Абы иужькIэ ЩхьэщэмыщIыр нэхъ тегушхуауэ спорт утыкум ихьэн мурадыр ищIащ. Ар щIэтIысхьащ Миндиашвили Д.Г. и цIэр зезыхьэ, бэнэкIэмкIэ академие цIэрыIуэм икIи илъэситхукIэ абы и Iэзагъэм щыхигъэхъуащ. Апхуэдэу Рэмэзан къиухащ Къэбэрдей-Балъкъэр университетым Физическэ щэнхабзэмрэ спортымкIэ и факультетыр.
2022 гъэм Рэмэзан бгырыпх бэнэкIэмкIэ урысейпсо зэпеуэм щытекIуащ. Абы къыкIэлъыкIуэу ар хэтащ Узбекистаным и Намаган къалэм щекIуэкIа, къэрал 32-м къикIа спортсмен 350-рэ утыку къизыша, бгырыпх бэнэкIэмкIэ дунейпсо чемпионатым. Зи хьэлъагъыр килограмми 100-м щIигъухэм я гупым щригъэкIуэкIа зэпэщIэтыныгъищми щытекIуа ЩхьэщэмыщIыр дунейпсо зэхьэзэхуэм и абсолютнэ чемпион хъуащ. Абы зэрыщытекIуам къыхэкIыу адыгэ щIалэм къыхуагъэфэщащ спортымкIэ дунейпсо класс зиIэ цIэ лъапIэр.
- Лэскэн районым Олимп джэгухэм хэтыфынухэр щагъэхьэзыр и спорт школым зэфIэкI лъагэхэр къэзыгъэлъагъуэ гъэсэнхэр и мащIэкъым. Абыхэм ящыщ зыщ ЩхьэщэмыщI Рэмэзан. ЗэрыцIыкIурэ ди нэIэ щIэту къэхъу щIалэм лъэкIыныгъэ хъарзынэхэр къызэрызыкъуихынум зыми шэч къытетхьэртэкъым. Ар сытым дежи ерыщу и зэфIэкIым, Iэзагъым зэрыхигъэхъуэным хущIэкъурт, апхуэдэ лэжьыгъэшхуэ зэрыригъэкIуэкIарщ ар и текIуэныгъэхэм хуэзышар. ТIэунейрэ дуней псом и чемпион ухъуныр ехъулIэныгъэшхуэщ. Дэ дрогушхуэ Рэмэзан и зэфIэкIым икIи дохъуэхъу адэкIи и текIуэныгъэхэм къахэхъуэну, спортым и дунейпсо утыкум и цIэр фIыкIэ куэдрэ щыIуну, - жиIащ IуэхущIапIэм и унафэщI ДзыхьмыщI Мартин.
Рэмэзан Дунейпсо чемпионатым хэтынымкIэ дэIэпыкъуэгъуэшхуэ хъуащ ди хэкуэгъу, УФ-м и Федеральнэ Зэхуэсым и Къэрал Думэм и депутат Щхьэгуэш Адэлбий. Спортсменым, абы и унагъуэм, апхуэдэуи Лэскэн районым Олимп джэгухэм хэтыфынухэр щагъэхьэзыр и спорт школым къабгъэдэкIыу депутатым фIыщIэ хуащI Iуэхур къазэрыдиIыгъамкIэ.
