Спорт хъыбар

  КIыщ Аслъэнбэч япэщ

Урысей Федерацэм тэмэму зэхэзымых спортсменхэм я деж алыдж-урым бэнэкIэмкIэ пашэныгъэр къыщыхьыным хуэунэтIа зэхьэзэхуэ Орел къалэм щекIуэкIащ. Абы щызэпеуащ ди къэралым и щIыналъэхэм ящыщу 17-м я спортсмен 70, я ныбжькIэ илъэс 23-м щIимыгъуауэ.

Къэбэрдей-Балъкъэрым щыщу зэхьэзэхуэм щыIащ КIыщ Аслъэнбэч икIи килограмм 72-рэ зи хьэлъагъхэм я деж дыщэ медаль къыщихьащ.

Ди щIалэм и тренерхэр КIыщ Муратрэ Къардэн Анзоррэщ.

  Боксер цIэрыIуэм и щIыхькIэ

СССР-м щIыхь зиIэ и тренер Антонюк Леонид и фэеплъу Симферополь къалэм щекIуэкIащ студентхэм боксымкIэ я лигэм хыхьэ урысейпсо зэхьэзэхуэ. Абы щызэпеуащ илъэс I5-I6 зи ныбжь спортсменхэр.

 Зэхьэзэхуэм Къэбэрдей-Балъкъэрым икIа боксер гуп щыIащ икIи абыхэм ящыщу килограмм 60 зи хьэлъагъхэм я деж япэ увыпIэр къыщихьащ Шыкъ Аслъэнбэч. Къашыргъэ Имран килограмм 54-рэ хъухэм я деж етIуанэ щыхъуащ. Жантемырокъуэ Имран (кг 57-рэ), Аршиев Аслъэн (кг 63-рэ), Конаков Амир (кг 46-рэ) сымэ ещанэ увыпIэхэр къахьащ.

Командэр зэхьэзэхуэм хуагъэхьэзыращ Куэшмэн Аслъэн, КIэрэф Арсен, Елгъэр Елдар, Жанатаев Руслан сымэ.

Медаль куэд Черкесск къраш

Кавказ Ищхъэрэм киокусинкаймкIэ и чемпионатрэ пашэныгъэр къыщыхьыным хуэунэтIа зэхьэзэхуэрэ Черкесск къалэм щекIуэкIащ икIи спортсменхэр абы щызэпеуащ а спорт лIэужьыгъуэм и унэтIыныгъищымкIи.

Къэбэрдей-Балъкъэрым и лIыкIуэхэм зэпеуэхэм екIуу зыкъыщагъэлъэгъуащ икIи псори зэхэту медаль 83-рэ къахьащ: 35-р дыщэу, 25-р дыжьыну, 22-р домбеякъыу.

Ди спортсменхэм ящыщу япэ увыпIэхэр къэзыхьахэр хэтынущ мы гъэм гъатхэпэм Мэзкуу къалэм щрагъэкIуэкIыну урысейпсо чемпионатымрэ пашэныгъэр къэхьыным хуэунэтIауэ щытыну зэпеуэмрэ.

КъБР-м и командэр зэхьэзэхуэм хуагъэхьэзыращ Ахъмэт Артур, Джинчарадзе Зураб, Аппаев Акъболэт, Зэхъуэхъу Мурат, Насыплы ТIэхьир, Къумыкъу Ислъам, Маргарян Тигран сымэ.

 Даур Амир къыхожаныкI

Урысей Федерацэм бэнэкIэ хуитымкIэ пашэныгъэр къыщыхьыным хуэунэтIауэ Иркутск къалэм и «Байкал-Арена» спорт комплексым иджыблагъэ щекIуэкIа зэхьэзэхуэм ещанэ увыпIэр къыщихьащ Къэбэрдей-Балъкъэрым и бэнакIуэ Даур Амир.

Зэпеуэм хэтащ ди къэралым и щIыналъэхэм ящыщу 52-м я спортсмен 400-м щIигъу, я ныбжькIэ илъэс I8-м щхьэдэмыхауэ икIи бэнакIуэхэм я хьэлъагъым елъытауэ ахэр гупипщIу гуэшауэ щытащ.

 Бахъсэн къалэм сабий зэчиифIэхэр щагъэхьэзыр и спорт еджапIэм и гъэсэн Даур Амир щыбанэр килограмм 55-рэ зи хьэлъагъхэм я дежщ, и тренерхэр ПщыукI Артуррэ Бэрэгъун Рустамрэщ.

   БЭБЭЧ Башир.