Спорт хъыбархэр

Самбэм зэхуешэс

Къэбэрдей-Балъкъэрым самбэмрэ зэзауэ зыхэт самбэмкIэ и чемпионатрэ пашэныгъэр къэхьыным хуэунэтIа зэхьэзэхуэрэ Шэджэм къалэм щекIуэкIащ. Абы щызэпеуащ республикэм и командэу 8, псори зэхэту спортсмен 200-м нэблагъэ.

ЗэIущIэхэр къызэрыхахыу щытащ икIи зэзауэ зыхэт самбэмкIэ зэпеуэм къыщыхэжаныкIахэм Iэмал ягъуэтащ КИФЩI-м и чемпионатымрэ пашэныгъэр къыщыхьыным хуэунэтIа зэхьэзэхуэмрэ я зэфIэкIхэр щагъэлъэгъуэну.

 Зэхьэзэхуэр къызэригъэпэщащ КъБР-м зэзауэ зыхэт самбэмкIэ и федерацэмрэ «Хэку-Iуащхьэмахуэ» спорт клубымрэ я тхьэмадэ Гъэунэ Анзор.

 ГъэщIэгъуэну икIи гуащIэу командэхэм ирагъэкIуэкIа зэпеуэхэм щытекIуащ «Iуащхьэмахуэ»-м и щIалэхэр икIи псори зэхэту медаль 63-рэ къахьащ: 27-р дыщэу, 25-р дыжьыну, 11-р домбеякъыу.

 Командэм и тренерыр Нэгъуейалий Азэмэтщ, унафэщIыр – Ёлмезов Дагибщ.

ЛIэужьыгъуищымкIэ зэпоуэ

Къэбэрдей-Балъкъэр къэрал университетым и спорт комплексым иджыблагъэ щекIуэкIащ КъБР-м мас-рестлингымкIэ и 12-нэ, сумомкIэ и 7-нэ, дартсымкIэ и 2-нэ чемпионатхэмрэ пашэныгъэр къыщыхьыным хуэунэтIа зэхьэзэхуэхэмрэ.  Абы хэтащ ди республикэм и щIыналъэ псоми я спортсмен 200-м щIигъу.

 Зэхьэзэхуэхэр къызэрыхахыу щытащ: мас-рестлингымкIэ зэпеуэм щытекIуахэр УФ-м и чемпионатым, сумомкIэ япэ увыпIитIыр къэзыхьахэр – урысейпсо зэIущIэм, дартсымкIэ япэ увыпIитхур зыубыдахэр - КИФЩI-м щызэхашэну чемпионатымрэ пашэныгъэр къыщыхьыным хуэунэтIа зэхьэзэхуэмрэ хэтынухэщ.

Иджырей зэпеуэхэм хьэлэмэту хэлъахэм ящыщщ лIэужьыгъуищми зыкъыщагъэлъэгъуэну апхуэдэ Iэмалхэр спортсменхэм зэраIар. Зэхьэзэхуэхэр ирагъэкIуэкIащ урысейпсо категорие зиIэ судьяуэ 5-мрэ дунейпсо категорие зиIэ зы судьямрэ.

 КъищынэмыщIауэ, зэпеуэхэм я зэфIэкIхэр щагъэлъэгъуащ Къэбэрдей-Балъкъэрым и гъэсэнхэу УФ-м и командэ къыхэхахэм хэт спортсмену 20-м щIигъум.

  НАУРЫЗ Болэ.