Бахъсэндэсхэм медалих къахь

28 февраля, 2026 - 13:00
Къэрэшей-Шэрджэсым и Лъэпкъ зэхуэсым и депутату щыта, дуней псом и чемпион Къуныжь Мухьэмэд и фэеплъу самбэмкIэ 10-нэ урысейпсо зэхьэзэхуэ Черкесск къалэм и «Юбилейный» спорт комплексым щекIуэкIащ иджыблагъэ. Абы щызэпеуащ ди къэралым, Абхъазымрэ Узбекистанымрэ я бэнакIуэу 300-м нэблагъэ. 
Къэбэрдей-Балъкъэрым и щIыхьыр яIэту зэхьэзэхуэм хэтащ Бахъсэн къалэм Щауэ Iэхьед и цIэр зезыхьэ и спорт еджапIэм и гъэсэнхэр икIи медаль зыбжанэ абы къыщахьащ. 
Зыхэта гупхэм щытекIуащ Ташу Рэмэзанрэ Къудей Беслъэнрэ. Тут Мурат етIуанэ, Къашыргъэ Самир, Къумыкъу Ренат, Цей Къантемыр сымэ ещанэ хъуахэщ.
Иджы Ташу Рэмэзанрэ Къудей Беслъэнрэ хэтынущ УФ-м пашэныгъэр къыщыхьыным хуэунэтIауэ мы гъэм мэлыжьыхьым и 9 -13-хэм Салехард къалэм щекIуэкIыну зэхьэзэхуэм. 
Ди командэм и тренерхэр ПшынащIэ Мурат, Къарэмышэ СулътIан, ЩоджэнцIыкIу Азэмэт, Жанкъазий Мухьэмэд сымэщ. 
 
Волгодонск кIуэну загъэхьэзыр
«Фэ топ» фIэщыгъэр зэрихьэу (КъБР-м и курыт еджапIэхэм я лигэ) Налшык къалэм и «Налшык» спорт комплексым иджыблагъэ щекIуэкIащ республикэм и курыт еджапIэхэм футзалымкIэ я командэхэм я зэхьэзэхуэ. Ахэр гупитхуу гуэшауэ щытащ, хъыджэбз цIыкIухэри яхэту. 
ГъэщIэгъуэну икIи удэзыхьэхыу екIуэкIа зэIущIэхэм щIалэхэм я деж я ныбжь елъытауэ зыхэта гупхэм япэ увыпIэхэр къыщахьащ Налшык къалэм Цагъуэ Нурий и цIэр зезыхьэ и курыт еджапIэ №31-м (2014-2015 гъэхэм къалъхуахэм), Къэщкъэтау и школым (2012-2013 гъэхэм къалъхуахэм), Налшык къалэм Цагъуэ Нурий и цIэр зезыхьэ курыт еджапIэ №31-м (2010-2011 гъэхэм къалъхуахэм), Бахъсэн къалэм КIуэкIуэ Валерэ и цIэр зезыхьэ и курыт еджапIэ №8-м (2008-2009 гъэхэм къалъхуахэм) я топджэгу ныбжьыщIэхэм.
Хъыджэбз цIыкIухэм я деж япэ увыпIэр щиубыдащ Налшык къалэм Къудащым и цIэр зезыхьэ и курыт еджапIэ №14-м и гъэсэнхэм (2010-2011 гъэхэм къалъхуахэм). 
Республикэ зэхьэзэхуэм щытекIуа командэхэр хэтынущ щIыналъэхэм я зэпеуэу мы гъэм мазаем – гъатхэпэм Ростов областым и Волгодонск къалэм щызэхэтыну зэIущIэм. 
 
Дзэ Iуэху хэхам хэтхэм я щIыхькIэ
Шэрэдж щIыналъэм хыхьэ Псыгуэнсу къуажэм шахмат псынщIэмкIэ зэхьэзэхуэ щекIуэкIащ. Дзэ Iуэху хэхам хэтхэм я щIыхькIэ къызэрагъэпэща зэпеуэм кърихьэлIащ Краснодар, Ставрополь крайхэм, Мэзкуу, Санкт- Петербург къалэхэм, Адыгейм, Дагъыстэным, Осетие Ищхъэрэ – Аланием, Ингушым, Шэшэным, Коми республикэм я лIыкIуэу 154-рэ. 
Саугъэт нэхъыщхьэу зэхьэзэхуэм щагъэджэгуаипщIым къадэкIуэу, цIыхубзхэм, щIалэ ныбжьыщIэхэм, ветеранхэм щхьэкIи щхьэхуэу ахэр хуагъэуващ. 
ГъэщIэгъуэну екIуэкIа зэхьэзэхуэхэм къарикIуахэр зэхалъхьэжа нэужь наIуэ къызэрыхъуамкIэ, текIуэныгъэр Пщымахуэ Уэсмэн иратащ (Краснодар край). ЕтIуанэ хъуащ Ингушым и шахматист Даурбеков Мурад, ещанэр Шэшэным и лIыкIуэ Саидов Билухажщ. 
ЦIыхубзхэм я деж япэ увыпIэр Харсиевэ Алия къыщихьащ, Дряевэ Ланэ етIуанэ хъуащ, Ахматовэ Iэминэ ещанэщ.
ЩIалэ ныбжьыщIэхэм я деж щытекIуащ Саитов Эмирлан, Бэгъуэт Хетаг етIуанэ хъуащ, Зулфакиров Сулеймэн ещанэщ. 
Ветеранхэм я зэхьэзэхуэм япэ увыпIэр къыщихьащ Магомедов Магарам, Джэдгъэф Чэмал мыбдеж щыетIуанэщ, Тамаев Таймураз ещанэ хъуащ. 
Абыхэм нэмыщI, саугъэт щхьэхуэхэр иратащ КIэдыкIуей Мухьэмэд-Мырзэрэ Жырыкъ Хьэмидбийрэ. 
Зэхьэзэхуэм щытекIуахэм кубокхэр, медалхэр, щIыхь тхылъхэр иратащ. Ахъшэ саугъэтыр къабгъэдэкIащ ар къызэзыгъэпэща Къудейхэ Хьэсэнрэ Беслъэнрэ.
БЭБЭЧ Башир.
  • 19 просмотров
Поделиться: