Псоми - зэхуэдэ гулъытэ

Шэджэм щIыналъэм хыхьэ Щхьэлыкъуэ къуажэм и спорт комплексыщIэм къыщызэIуахащ зи Iэпкълъэпкъым сэкъат иIэ сабийхэм хуэщIа спорт лIэужьыгъуэхэм зегъэужьынымкIэ, дзэ Iуэху хэхам хэтахэр реабилитацэ щIынымкIэ центр.
Иджыпсту абы зыщагъасэ зи Iэ-лъакъуэхэр дахэ-дахэу къыдэмыбз сабийуэ 10-м. Абыхэм я Iэпкълъэпкъыр гъэбыдэнымрэ зегъэужьынымрэ хуэгъэпса программэ щхьэхуэхэр ягъэхьэзыращ, спорт тренажерхэр, Iэмэпсымэхэр къащэхуащ.
ЦIыкIухэр зыхуагъэсэну спорт лIэужьыгъуэхэм хохьэ атлетикэ псынщIэр, псы есынымрэ шабзэкIэ нэщэнэ еуэнымрэ. Мыгувэуи шы спортыр лэжьыгъэм къыхашэнущ. 
Сабийхэм ядэлажьэр Шэджэм районым и спорт еджапIэм и егъэджакIуэ-тренер Елокъуэ Анзорщ. Центрыр къызэрагъэпэщащ КъБР-м СпортымкIэ и министерствэмрэ Шэджэм щIыналъэ администрацэмрэ къадэIэпыкъуу. 
 
 

УхуэныгъэщIэм топсэлъыхь

Бахъсэн администрацэм и Iэтащхьэ Мамхэгъ Хьэчим иджыблагъэ щыIащ Хьэсэней къуажэм икIи зригъэлъэгъуащ абы щаухуэ, псынщIэу зэпкърыплъхьэ-зэпкърыпхыж, бгъэIэпхъуэ хъу, спорт лIэужьыгъуэ зыбжанэм хуэгъэпса модульнэ спорт залыр.
Мамхэгъыр а къуажэм щIэкIуар а спорт ухуэныгъэм и проектым щыгъуазэ зиIщын щхьэкIэщ, иужькIэ Бахъсэн къалэм абы хуэдэ щаухуэн мурад иIэу. 
«КъБР-м спортымкIэ и министр Хьэсанэ Ислъэм депсэлъащ апхуэдэ ухуэныгъэ Бахъсэн къалэми къыщызэIутхыну», - жиIащ унафэщIым.
Модульнэ спортзалым сабий 50-м нэблагъэм зэуэ зыщагъэсэфынущ икIи абы хэтынущ зытIэщIыпIэхэр, зыгъэпскIыпIэхэр, дохутырым и пэш, нэгъуэщIхэри. 
Бахъсэн къалэм къэкIуэжа нэужь, Мамхэгъым зэIущIэ ядригъэкIуэкIащ и къуэдзэхэмрэ къудамэхэм я унафэщIхэмрэ икIи ахэр тепсэлъыхьащ модульнэ спортзалыр ухуэным ехьэлIа Iуэхугъуэхэм. Ар здэщытыну щIыпIэр яубзыхуащ, проектымрэ сметэмрэ ягъэхьэзырын щIадзащ.