ПэщIэдзи кIэи зимыIэ къалэн

Иджыри зэIубзкъым мы махуэр хэт сыт щыгъуэ къигупсысами, ауэ ар быдэу пыщIащ щIыуэпсым демыгуэуэнымрэ ди зэран едмыгъэкIынымрэ ехьэлIауэ сытым щыгъуи длэжьыпхъэхэм.

Зи гугъу тщIыр гъатхэпэм и 30-р ЩIыр хъумэным и дунейпсо махуэу къэрал куэдым къызэрыщалъытарщ. СыткIэу пIэрэ, атIэ, цIыху къызэрыгуэкIхэм ар къызэрытлъэIэсыр? КъызэрытлъытэмкIи, а упщIэм и жэуапыр нэрылъагъущ.

ЩIыуэпсым ехьэлIауэ къетхьэжьэ адрей ди IуэхущIафэхэми хуэдэу, мы махуэми, аргуэрыжьщи, дрегъэгупсыс дызытет планетэм и щхьэфэм дызыхуэкIуэ лъэхъэнэм игъуэтыну теплъэр зыхуэдэнур абы дызэрыхущытми зэрелъытар.  

Гъатхэпэм и 30-р «удзыфэхэм» къагъэсэбэп дыкъэзыухъуреихь дунейр зэлъыIухыным хуэгъэза щIыхьэхухэр, зэхуэсхэр къызэрагъэпэщынымкIи дызытес планетэм и псэущхьэхэмрэ къэкIыгъэхэмрэ дащысхьыным, и беягъэр зэдгъэзэхуэным дыкъыщыхураджэ дерс щхьэхуэхэр ирагъэкIуэкIынымкIи. Хэтхэр а зэхыхьэхэм къыщалъагъум, щызэхахым езыр-езыру егупсысын хуей мэхъу ди планетэм хуэсакъын зэрыхуейм, дызыхуэкIуэ зэманхэм абы тхьэмыщкIагъэшхуэ къылъэмыIэсын папщIэ. 

Курыт школхэм щIэсхэм зи гугъу тщIы мы махуэми адэкIэ-мыдэкIэ жыгыщIэхэр щыхасэ, цIыху зэблэкIыпIэхэр зэлъыIуах, къуацэхэр зэрыт гуэрэнхэр, тафэхэр, мэзхэр ягъэкъабзэ.     

АтIэми, ЩIыр хъумэным и махуэм дэ псори дрегъэгупсыс щIыуэпсыр къабзэу щыгъэтыным ехьэлIа Iуэхугъуэшхуэм дэтхэнэми хэлъхьэныгъэ узыншэ зэрыхуэтщIыфынум. Зи гугъу тщIым Iуэху цIыкIуфэкIу щыщыIэкъым. Гу лъыдвгъэгъатэт, атIэ, сыт хэлъыр кIэрыхубжьэрыхухэр къатщтэу сэмб щхьэхуэ итлъхьэным е пхъэнкIийр къедмыхьэжьэ щIыкIэ абы хэлъ пкъыгъуэ быдэхэмрэ пластикымрэ зэхэддзыным.

ЦIыхум езыр зыхуэмеиж тхылъымпIэ кIапэр къыздыхуэзэм деж щыхыфIимыдзэмэ, псы къабзэр зэригъэзахуэмэ, жыг хадэм, губгъуэ нэщIым щызэхэсхэм я кIэкъинэр щызэщIакъуэжмэ - апхуэдэ Iуэху къызэрыгуэкIхэми ди планетэр нэхъ къызэтрагъэнэнущ, ди узыншагъэри ирагъэфIэкIуэнущ.  

ЩIыр хъумэным и махуэм дэ псоми IэмалыфI къыдет къытщIэхъуэ щIэблэр щыпсэуну планетэр къабзэу щыдгъэтынымкIэ дэтхэнэми къару узыншэ  зэрытхуехьэлIэнум нэхъ тегъэчыныхьауэ дегупсысынымкIэ.

Тедгъэчыныхьыпэу къыхэдгъэщынщи, языныкъуэхэм деж дэ къытщохъу дыкъэзыухъуреихь дунейр зы цIыху къарукIэ нэхъ дахи IуплъэгъуафIи тхуэмыщIыну. Ауэ ар щыуагъэшхуэщ - щIыуэпсыр хъумэным теухуа IуэхущIафэхэр, цIыкIуми инми, хэти езым и деж къыщыщIидзэжыпхъэщ. Ар шэч къызытедмыхьэнщ.

 А псори тхузэгъэзахуэмэ, зэхэтщIыкIыпхъэщ зи гугъу тщIы Iуэхум зы махуэ, уеблэмэ илъэс зы-тIущ хухэтхкIи зэрымащIэр. Сыту жытIэмэ, дэ ди къалэнщ дызытет ЩIыр хъумэнымрэ зэIузэпэщ щIынымрэ ехьэлIа лэжьыгъэхэр сыт хуэдэ зэмани едгъэкIуэкIыныр.

   Тхыгъэри сурэтри КЪУМАХУЭ Аслъэн ейщ.