Спорт хъыбархэр

 Кърымым загъэхьэзыр

Кавказ Ищхъэрэм ММА-мкIэ пашэныгъэр къыщыхьыным хуэунэтIа зэхьэзэхуэ Черкесск къалэм щекIуэкIащ. Абы щызэпеуащ КИФЩI-м и спортсмен лъэщхэр.

 Къэбэрдей-Балъкъэрым и командэм зэхьэзэхуэм екIуу зыкъыщигъэлъэгъуащ икIи медалу 8 абы къыщихьащ: 1-р дыщэу, 5-р дыжьыну, 2-р домбеякъыу.

КъищынэмыщIауэ, иджы екIуэкIа зэхьэзэхуэм и кIэух зэпеуэхэм икIахэр хэтынущ УФ-м ММА-кIэ пашэныгъэр къыщыхьыным хуэунэтIауэ мы гъэм мэлыжьыхьым и 25 - 29-хэм Кърымым щызэхашэну зэIущIэм.

Ди командэм ядэлажьэр Чэлимэт Амир, Жантудуев Азэмэт, Шэрий Астемыр, Лабазанов Садиртин, Дзагуэ Руслан, Куэший Елдар сымэщ.

 ЦIыкIухэр зэпоуэ

«Псори фыкъытхыхьэ» фIэщыгъэр зэрихьэу ЦСКА-м футболымкIэ и клубымрэ Налшык къалэ администрацэм Физкультурэмрэ спортымкIэ и управленэмрэ зэгъусэу ди къалащхьэм къыщызэрагъэпэща зэIущIэм хэтащ ди къэралым и щIыналъэхэм я топджэгу ныбжьыщIэхэр.

 ГъэщIэгъуэну икIи удэзыхьэхыу екIуэкIа зэIущIэхэм япэ увыпIэр къыщихьащ Владикавказ и «ЩIалэгъуэ» командэм, етIуанэ хъуащ Новороссийск и «Два мастера» клубыр, ещанэр Псыхуабэ и «НыбжьыщIэ» топджэгу гупырщ.

 Зэхьэзэхуэм къыщыхэжаныкIахэм медалхэр, кубокхэр, щIыхь тхылъхэр, фэеплъ сагъэтхэр иратащ.

ЧЭМОКЪУЭ Мылэ.