Пэнагуэ Казбек и фэеплъу

СССР-м самбэмкIэ спортым и мастер, а  спорт лIэужьыгъуэмкIэ Тэрч районым и япэ тренеру щыта Пэнагуэ Казбек и фэеплъ ­урысейпсо зэхьэзэхуэ «Тэрч-Олимп» спорт комп­лексым щекIуэкIащ. Абы щызэпеуащ ди къэ­ралым и щIыналъэхэм ящыщу 20-м я спортсмену 120-м нэблагъэ, езыхэр гупи 8-уэ гуэшауэ. Зэхьэзэхуэм и судья нэхъыщхьэу ­щы­тащ Ярославль областым щыщ, урысейпсо категорие зиIэ судья Кербунов Александр.

Удэзыхьэхыу икIи гъэщIэгъуэну екIуэкIа зэIущIэхэм къарикIуахэр зэхалъхьэжа нэужь наIуэ къызэрыхъуамкIэ, я хьэлъагъ елъытауэ зыхэта гупхэм щытекIуащ Татарян Арсен (Краснодар щIыналъэ), Уэхъутэ Амир (Къэрэшей-Шэрджэс), Сайпуллаев Мухьэмэд (Дагъыстэн), КIуэкIуэ Темырлан (Къэбэрдей-Балъкъэр), Сонэ Инал (Краснодар щIыналъэ), Амбарцумян Горлеон (Краснодар щIыналъэ), Макарьян Богдан (Краснодар щIыналъэ), Мачильский Елдар (Осетие Ищхъэрэ - Алание). 
Зэхьэзэхуэм къыщыхэжаныкIахэм Къэбэрдей-Балъкъэрым СпортымкIэ и министерствэм къыбгъэдэкIыу медалхэмрэ кубокхэмрэ иратащ, Пэнагуэхэ я унагъуэм ахъшэ саугъэтхэмкIэ ахэр ягъэпажащ.

ХЬЭЩЫКЪУЕЙ  Олег.