Спорт хъыбархэр
Къэбэрдей-Балъкъэрым зи Iэпкълъэпкъым сэкъат иIэ сабийхэм псы есынымкIэ я республикэ зэхьэзэхуэ зэIуха Налшык къалэм щекIуэкIащ иджыблагъэ. Хэгъэрейхэм нэмыщI, абы щызэпеуащ Къэрэшей-Шэрджэсымрэ Ставрополь щIыналъэмрэ я спортсмену, щIалэхэри хъыджэбзхэри зэхэту, 30-м щIигъу.
Зэхьэзэхуэм ди щIыналъэм щыщу хэтащ Налшык и спорт - адаптивнэ еджапIэм и гъэсэнхэр икIи медаль зэхуэмыдэу 7 зэпеуэм къыщахьащ. Абыхэм ящыщу Къарэнашэ Ислъамрэ Речкинэ Юлиерэ япэ увыпIэхэр яубыдащ. БатI Аслъэнбэч, Сагидов Iэдил, Сапаров Валерэ сымэ етIуанэ хъуахэщ.
Домбеякъ медалхэр къахьащ Лыкъуэжь Сэлимрэ ХьэтIыхъу Адиссэрэ.
ЗэIущIэ гуащIэхэр
Бахъсэн щIыналъэм хыхьэ Къулъкъужын Ипщэ къуажэм «Къулъкъужыным щызэхоуэ» фIэщыгъэр зэрихьэу грэпплингымкIэ зэхьэзэхуэ щекIуэкIащ. Абы хэтащ КъБР-м, Шэшэным, Осетие Ищхъэрэ – Аланием, Ставрополь щIыналъэм я спортсмену 300-м щIигъу, 2006-2022 гъэхэм къалъхуахэу.
ГъэщIэгъуэну икIи удэзыхьэхыу екIуэкIа зэIущIэхэм щытекIуахэмрэ къыщыхэжаныкIахэмрэ медалхэмрэ щIыхь тхылъхэмрэ иратащ. Апхуэдэуи, абыхэм гуфIэгъуэ Iэнэ къыхуаIэтащ, ерыскъы IэфIхэр, IэфIыкIэхэр Iуагъэхуащ.
ЗэIущIэр хуэунэтIауэ щытащ лъэпкъ зэныбжьэгъугъэмрэ зэхущытыкIэмрэ гъэбыдэным, зэпэщIэувэныгъэм пэщIэтыным, спортым щIэблэр дегъэхьэхыным, ахэр хэкупсэу къэгъэхъуным, жаIащ къызэгъэпэщакIуэхэм.
Бахъсэндэсхэм медаль 27-рэ къахь
«Андроповскэ муниципальнэ округым и Кубок» фIэщыгъэр зэрихьэу Ставрополь щIыналъэм и Курсавкэ къуажэм Iэпщэрыбанэ спортымкIэ щIыналъэхэм я зэхьэзэхуэ щекIуэкIащ. Абы щызэпеуащ Кавказ Ищхъэрэм и щIыналъэхэм я спортсмену 270-м щIигъу.
Зэхьэзэхуэм екIуу зыкъыщагъэлъэгъуащ Бахъсэн щIыналъэм и спорт еджапIэм и гъэсэнхэм икIи медаль зэхуэмыдэу 27-рэ абы къыщахьащ.
Дыщэу тIу
Боевой самбэмкIэ «А» класс зиIэ урысейпсо зэхьэзэхуэ Тэрч къалэм и спорт комплексым иджыблагъэ щекIуэкIащ. Абы хэтащ икIи екIуу зыкъыщагъэлъэгъуащ Бахъсэн районым и бэнакIуэхэм.
Псалъэм къыдэкIуэу, зыхэта гупхэм япэ увыпIэхэр щаубыдащ Шублакъ Амиррэ (кг 64-рэ) Ахъмэт Радионрэ (кг 71-рэ).
ЩIалэхэм я тренерхэр Тхьэкъуахъуэхэ Исхьэкърэ Ратмиррэщ.
НыбжьыщIэхэм я зэпеуэ
Шэджэм къалэм Олимп джэгухэм я чемпион Къардэн Мурат и цIэр зезыхьэ, алыдж-урым бэнэкIэмкIэ и спорт еджапIэм и дэIэпыкъуныгъэ хэлъу, ныбжьыщIэхэм я зэхьэзэхуэ щекIуэкIащ а къалэм и спорт комплексым.
Дзэлыкъуэ щIыналъэм я спортсменхэм ящыщу я хьэлъагъ елъытауэ зыхэта гупхэм ещанэ увыпIэхэр абы къыщахьащ «Арена» спорт еджапIэм и гъэсэнхэу Жанкъазий Алихъанрэ Къанкъул Айдаррэ.
Зэхьэзэхуэм хэтащ Кавказ Ищхъэрэм и щIыналъэхэм я бэнакIуэхэр икIи абы къыщыхэжаныкIахэм медалхэр, щIыхь тхылъхэр, саугъэт лъапIэхэр иратащ.
Дзэлыкъуэдэсхэр ятокIуэ
Прохладнэ къалэм щекIуэкIащ ныбжьыщIэхэм бэнэкIэ хуитымкIэ я щIыналъэ зэхьэзэхуэ. Абы щызэпеуащ 2011 - 2018 гъэхэм къалъхуа спортсменхэр.
Зэхьэзэхуэм екIуу зыкъыщагъэлъэгъуащ икIи ехъулIэныгъэ хъарзынэхэр щызыIэрагъэхьащ Дзэлыкъуэ районым и «Арена» спорт еджапIэм и гъэсэнхэм. ЖыпIэнурамэ, Махуэхэ Iиманрэ Ислъамрэ, Шыдхэ Ахьмэд, Ансар, Муса, ЗекIуэрей Мухьэмэд-Алий, Амщыкъуэ Беслъэн сымэ япэ увыпIэхэр къахьащ, Нэгъэплъэж Алихъан ещанэ хъуащ.
