Щхьэлыкъуэ и Кубокыр къахь

Щхьэлыкъуэ и Кубокыр дзюдомкIэ къэхьыным хуэунэтIа щIыналъэ зэхьэзэхуэ а къуажэм щекIуэкIащ. Абы щызэпеуащ Къэбэрдей-Балъкъэрым, Адыгейм, Къэрэшей-Шэрджэсым я бэнакIуэ ныбжьыщIэхэу, 2014 - 2015 гъэхэм къалъхуа­хэр, псори зэхэту команди 9 хъууэ.
Удэзыхьэхыу икIи гъэ­щIэгъуэну екIуэкIа зэпеуэ­хэм къарикIуахэр зэхалъ­хьэжа нэужь наIуэ къызэрыхъуамкIэ, япэ увыпIэр ихьащ Щхьэлыкъуэ къуа­жэм Олимп джэгухэм я призер Тау Хьэсэнбий и цIэр зэрихьэу дэт спорт школым и командэм. 
ЕтIуанэ хъуащ «Локомотив» спорт клубым хыхьэ «Ислъэмейр». Ещанэ увы­пIэр къахьащ «Налшык» спорт клубымрэ КъШР-м Пщымахуэ Арсен и цIэр зезыхьэ и спорт школым и гъэсэнхэмрэ.
Ди командэхэм я тренерхэр Хъупсырджэн Резуан, Къущхьэ Жамболэт, Джолабов Къайсын, Дзухэ Бес­лъэнрэ Залымрэ, Къуэшы­рокъуэ Астемыр, Къамбий Мартин сымэщ.