Къудей Беслъэн япэщ

Мэзкуу областым хыхьэ Мытищи къалэм щекIуэкIащ УФ-м и еджакIуэхэм самбэмкIэ я 8-нэ Гъэмахуэ спартакиадэ. Абы щызэпеуащ ди къэралым и щIыналъэхэм ящыщу 51-м я спортсмен 200-м нэхърэ нэхъыбэ, я ныбжькIэ илъэс 16-м щIимыгъуауэ.
Къэбэрдей-Балъкъэрым и лIыкIуэ, Бахъсэн къалэм и спорт еджапIэм и гъэсэн Къудей Беслъэн килограмм 64-рэ зи хьэлъагъхэм я деж дыщэ медаль къыщихьащ. Ди щIалэм зэIущIитху щригъэкIуэкIат зэхьэзэхуэми, щым щытекIуащ абыхэм хухаха зэманхэр и кIэм нимыгъэсу. 
Къудей Беслъэн и тренерхэр ПшынащIэ Муратрэ Къарэмышэ СулътIанрэщ. 
 

Наркотикыр я бийщ

«Спортыр наркотикхэм я бийщ» къыхуеджэныгъэм щIэту Налшык къалэм щекIуэкIащ Iэпщэрыбанэ спортымкIэ республикэ зэхьэзэхуэ. Абы щызэпеуащ спортсмен ныбжьыщIэу, щIалэхэри хъыджэбзхэри зэхэту, 80-м щIигъу, я ныбжькIэ илъэси 10-18 хъухэу.
Я хьэлъагъ елъытауэ щызэуа гупхэм япэ увыпIэхэр къыщахьащ Къардэн Алихъан, Жылэтеж Ахъмэт, КIэрашэ Темболэт, Сэбанокъуэ Елдар, Сунш Ислъам, ХъутIэжь Темболэт, Мэшыкъуэ Инал, ХъутIэжь Марат, Истепан Астемыр, Мэшыкъуэ Аслъэн, Шупагуэ Мэрем, Лъэпщ Сосрыкъуэ, Мурадин Ратмир, Мэшыкъуэ Идар, Бэвыкъуэ Алихъан, Сэбаншы Темырлан, Бекбоев Рэмэзан, ДзыхьмыщI Темырлан, Къардэн Ашэмэз, Мэшыкъуэ Ислъам, ТхьэицIыкIу Алихъан сымэ.