УФ-м Экономистым и махуэр гъэ къэс мэкъуауэгъуэм и 30-м щагъэлъапIэ. Гулъытэ хэха хуащI щыхъуар I9I7 гъэм къыщыщIэдзауэщ. И къэунэхукIэр хуахь а илъэс дыдэм ди къэралым ФинансхэмкIэ цIыхубэ комиссариат къыщызэрагъэпэщауэ зэрыщытам.
Алыдж псалъэ «экономикэ» - м къикIыр «унагъуэр тэмэму зехьэн» жыхуиIэрщ. А фIэщыгъэр япэу къыщагъэсэбэпар, зэрыхуагъэфащэмкIэ, ди эрэм ипэкIэ IV лIэщIыгъуэм икухэрщ. Тхыдэм къызэрыхэщыжымкIэ, лъэхъэнэ жыжьэхэм псэуахэми лъапсэр зыхуей хуэгъэзэным, унагъуэр зехьэным мыхьэнэ ин ирату щытащ.
Ауэрэ здекIуэкIым, цIыхухэм къинэмыщI пщэрылъхэри зыхуагъэувыжу, ахэр зэгъэхъулIэным пыщIа Iэмалхэми лъыхъуэу щIадзэ. Апхуэдэу, XVI лIэщIыгъуэр здекIуэкIым, Европэм щыIэ хэгъэгухэми къыщыунэхуат экономикэм щыхуагъасэ еджапIэ зыбжанэ. Илъэсищэхэр блэкIри, мэкъумэш IэнатIэми зыщиужьащ, хьэпшып гуэрхэр къыщIэгъэкIыным пыщIа хьэрычэтми зыщиубгъуащ, псэуныгъэм пыщIа Iуэхухэми щефIэкIуащ.
Экономистым и махуэр зытеухуар ахъшэр тэмэму зэгъэзэхуэн зэрыхуейм и закъуэкъым, атIэ зэманми, цIыхум и зэфIэкIми, хьэпшыпхэми, псори дызэлъытэжа щIыуэпсми, жыпIэнур арамэ, абы хуэдэу зыщысхьыпхъэ псоми зэрахуэсакъыпхъэр къыхэгъэщынырщ.
Хабзэ зэрыхъуауэ, мы махуэр зэдагъэлъапIэ хьэпшыпрэ ерыскъыхэкIрэ щагъэхьэзыр IэнатIэхэм, ахъшэ хъумапIэхэм, уней, къэрал зэгухьэныгъэхэм ягъэщхьэпэ хъугъуэфIыгъуэхэр зэкIэлъыгъэкIуэн-зэгъэзэхуэныр зи къалэн IэщIагъэлIх эм, экономикэм щыхуагъэхьэзыр еджапIэхэм щIэсхэмрэ абыхэм я гъэсакIуэхэмрэ, зи гугъу тщIы и унэтIыныгъэм кIэлъыплъ къулыкъущIэхэм, нэгъуэщIхэми.
Ди къэралыр зэрыт щытыкIэр къэтлъытэмэ, зэгъэзэхуэкIэрэ гъэтIылъыгъэкIэ Iэмалхэм къытедгъэзэжу зыщыдгъэгъуэзэныр лейуэ къыщIэкIынукъым.
Мы махуэм къызэрагъэпэщ зэIущIэхэм зи IэнатIэм нэхъ къыщыхэжаныкIахэр щагъэлъапIэ, IуэхущIапIэхэм семинархэр, мастер-классхэр, дерс щхьэхуэхэр щрагъэкIуэкI.
Къыхэгъэщыпхъэр аращи, экономистхэм пщIэ нэхъ зиIэу къалъытэр гъэ къэс ят хабзэ, урысейпсо жылагъуэ тыгъэу «Гъэм и экономист» зи фIэщыгъэмрэ абы дыщIыгъу дамыгъэмрэщ.
