Спортсмен цIэрыIуэм и щIыхькIэ

1 июля, 2026 - 08:44
Олимп джэгухэм тIэунейрэ къыщыхэжаныкIа Продуновэ Еленэ и щIыхькIэ спорт гимнастикэмкIэ илъэс къэс зэхашэ урысейпсо зэхьэзэхуэм хэтащ Къэбэрдей-Балъкъэрым и спортсмену I4. Апхуэдэуи, абы кърихьэлIащ ди къэралым и щIыналъэ куэдым я лIыкIуэу, щIалэхэри хъыджэбзхэри зэхэту, 270-м нэблагъэ. 
Ди республикэм и спортсменхэм ящыщу ещанэ разряд зиIэ ныбжьыщIэхэм я зэпеуэм япэ увыпIэр щиубыдащ Щхьэныкъуэ Амиля. Езанэ разряд зиIэхэм я деж щыяпащ Бэч Арианэ, Къэзанш Евэ ещанэ хъуащ. 
Ещанэ спорт разряд зиIэхэм я зэхьэзэхуэм щытекIуащ Бэч Миллисэ. ЕтIуанэ разрядым – Нэгъуей Саидэ. КъарэцIыкIу Айши зэпеуэм хъарзынэу хэтащ ауэ, мызыгъуэгукIэ медаль къыхуэхьакъым. 
ЕтIуанэ разряд зиIэ щIалэхэм я зэхьэзэхуэм Щауэ Амир япэ, Щауэ Алим етIуанэ, Кабалоев Исуф ещанэ увыпIэхэр къыщахьащ.
Езанэ разряд зиIэхэм я деж Чыржын Къантемыр япэ щыхъуащ.
Ди командэм дэлажьэр Продуновэ-Исметовэ Еленэ, Тавитовэ Иринэ, Щоджэн Теймураз сымэщ.
 
Нэхъ лъэщыр зэхагъэкI
Олимп джэгухэм хыхьэ тхэквондо лIэужьыгъуэмкIэ (ВТФ) Урысей Федерацэм пашэныгъэр къыщыхьыным хуэунэтIа зэхьэзэхуэ Налшык къалэм и «Гладиатор» спорт комплексым щекIуэкIащ иджыблагъэ. Абы щызэпеуащ ди къэралым и щIыналъэхэм ящыщу 59-м я спортсмену, щIалэхэри хъыджэбзхэри зэхэту, 778-рэ, я ныбжькIэ илъэс 12-14 хъухэу. 
Къэбэрдей-Балъкъэрым и командэм хэту зэхьэзэхуэм килограмм 49-рэ зи хьэлъагъхэм я деж япэ увыпIэр щиубыдащ Кэнжэ къуажэм дэт «Пять колец» спорт комплексым и тхэквондист Iусен Руслан.
Домбеякъ медалхэр къахьащ Къумыкъу Дианэрэ (кг 55-рэ, «Пять колец») Степан Валерэрэ (кг 33-рэ, Бахъсэн щIыналъэ, Ислъэмей). 
Спортсменхэм я тренерхэр Унэжокъуэ Абдельджэбаррэ Уэзрокъуэ Анзоррэщ. 
Зэхьэзэхуэм япэ увыпIэр къыщызыхьахэр мы гъэм бжьыхьэм Румынием щекIуэкIыну европей зэпеуэм хэтынущ.
 
ТIумкIи медаль зырыз
Урысей Федерацэм тэмэму зэхэзымыххэм бэнэкIэ хуитымрэ алыдж-урым бэнэкIэмкIэ я чемпионатхэр Калининград къалэм щекIуэкIащ. Абы щызэпеуащ ди къэралым и щIыналъэхэм ящыщу 23-м я спортсмену 100-м щIигъу.
Къэбэрдей-Балъкъэрым и бэнакIуэхэм хъарзынэу зэхьэзэхуэм зыкъыщагъэлъэгъуащ икIи медалитI абы къыщахьащ. БэнэкIэ хуитымкIэ килограмм 74-рэ зи хьэлъагъхэм я деж етIуанэ щыхъуащ Бахъсэн щIыналъэм и спорт еджапIэм и тренер-егъэджакIуэ Тезадэ Мурат.
Килограмм 77-рэ зи хьэлъагъхэм я деж алыдж-урым бэнэкIэмкIэ ещанэ увыпIэр къыщихьащ КIыщ Аслъэнбэч. ЩIалэм и тренерхэр КIыщ Муратрэ Къардэн Анзоррэщ. 
 
ГъукIэлI Ислъам ятокIуэ
Мэзкуу къалэм иджыблагъэ щекIуэкIащ зи Iэпкълъэпкъым сэкъат иIэ спортсменхэм пауэрлифтингымкIэ я чемпионатрэ пашэныгъэр къэхьыным хуэунэтIа зэхьэзэхуэрэ. Абы хэтащ ди къэралым и щIыналъэхэм ящыщу 44-м я спортсмену 200-м нэблагъэ.
Къэбэрдей-Балъкъэрым и спорт-адаптивнэ еджапIэм и гъэсэнхэм медалищ зэхьэзэхуэм къыщахьащ икIи ахэр УФ-м и командэ къыхэхам хагъэхьащ. Къыхэдгъэщынщи, ГъукIэлI Ислъам мы гъэм еханэу УФ-м и чемпион щыхъуащ килограмми I07-рэ зи хьэлъагъхэм я деж. Абы хузэфIэкIащ килограмм 204-рэ зи хьэлъагъ штангэр къытриIэтыкIыну.
Таукенов Алан зи ныбжьыр илъэс 20-м щIимыгъуа спортсменхэм я зэпеуэм килограмм 54-рэ зи хьэлъагъхэм я деж япэ увыпIэр къыщихьащ. Абы къытриIэтыкIащ килограмм 95-рэ зи хьэлъагъ штангэр. 
Къэбэрдей-Балъкъэрым и командэм и тренер Гугъуэт СулътIани зэхьэзэхуэм хэтащ икIи килограмм 72-рэ зи хьэлъагъхэм я деж етIуанэ щыхъуащ, килограмми I62-рэ зи хьэлъагъ штангэр къытриIэтыкIри. 
Хьэнэ Батыр япэщ
ЩIыналъэхэм стIолыщхьэ теннисымкIэ я зэхьэзэхуэ Краснодар крайм и Лабинск къалэм щекIуэкIащ. Абы щызэпеуащ Кавказ Ищхъэрэмрэ Урысей Ипщэмрэ я спортсмену 100-м щIигъу.
Къэбэрдей-Балъкъэрым и гъэсэну зэхьэзэхуэм цIыхуитху щыIащ икIи абыхэм ящыщу илъэс I6 зи ныбжьхэм я деж етIуанэ увыпIэр къыщихьащ Хьэнэ Батыр. Хочуев Сулеймэн ещанэ щыхъуащ илъэс I4 зи ныбжьхэм я деж. 
Ди командэм и тренерыр Темыркъан Заурщ.
 
Манкиев Назир и саугъэтхэр
УФ-м и еджакIуэхэм алыдж-урым бэнэкIэмкIэ я 13-нэ Гъэмахуэ спартакиадэм и 2-нэ Iыхьэр Ингушым и Назрань къалэм щекIуэкIащ. Абы хэтахэр щIэбэнащ Олимп джэгухэм я чемпион Манкиев Назир и саугъэтхэм. 
Зэхьэзэхуэм кърихьэлIащ ди къэралым и щIыналъэхэм ящыщу 58-м я бэнакIуэу 200-м нэблагъэ, я ныбжькIэ илъэс I6-м щIимыгъуауэ. Къэбэрдей-Балъкъэрым и лIыкIуэу зэпеуэм спортсмени I0 хэтащ икIи медалитху абы къыщахьащ.
ЖыпIэнурамэ, килограмм 35-рэ зи хьэлъагъхэм я деж япэ увыпIэр щиубыдащ Хьэбылэ Идар. Саншокъуэ Ислъам етIуанэ щыхъуащ килограмм 75-рэ зи хьэлъагъхэм я деж. Дыкъынэ Руслан (кг 44-рэ), Чыл Имран (кг 57-рэ), Ажэгъуей Адлан (кг 4I-рэ) сымэ ещанэ увыпIэхэр къахьащ.
Зэхьэзэхуэр къызэрыхахыу щытащ икIи абы щытекIуахэр спартакиадэм и кIэух урысейпсо зэпеуэм хэтынущ.
Ди командэр зэхьэзэхуэм хуагъэхьэзыращ Индрей Жантемыр, Хьэкъул Мурат, Къуэн Станислав, Табыхъу Тимур, Жыкъуэ Залымхъан, Къарэ Хьид.
НАУРЫЗЫКЪУЭ Долэт.
  • 17 просмотров
Поделиться: