Металлургым и махуэ

17 июля, 2026 - 12:59
ГъущIгъэткIу-гъуэщIгъавэхэм я махуэм гулъытэ хуащIу къыщаублар Хрущёв Никитэ Совет Союзым и Iэтащхьэу щыщытарщ. Ар щытета илъэсхэм ящыщу 1957 гъэм, СССР-м и Совет Нэхъыщхьэм и Президиумым и унафэкIэ, Металлургым и махуэр хагъэунэхукIащ. Абы лъандэрэ бадзэуэгъуэм и ещанэ тхьэмахуэм ар щагъэлъапIэ къэралышхуэм хыхьэу щыта адрей хэгъэгухэм я нэхъыбэми. 
1957 гъэм ар къыщрахьэжьэм, къызыхахари гурыIуэгъуэт. Хэку зауэшхуэм и зэманым СССР-м и экономикэм хэщIыныгъэшхуэ игъуэтат. Ар зэфIэгъэувэжынымрэ зэрыщытам ефIэкIыжу зегъэужьынымкIэ металлургие IэнатIэм и мыхьэнэр зэрылъагэ дыдэр къалъытэри, зэрыхаIэтыкI махуи а унэтIыныгъэм хухахат. 
Совет Союзыр лъэлъэжа иужькIи, Металлургым и махуэр ди къэралым гъэлъэпIэн щыщагъэтакъым. Къызэрырахьэжьэрэ 69-нэу, мы гъэми СНГ-м хыхьэ къэралхэм ящыщу гулъытэ хэха абы щыхуащI УФ-м, Къэзахъстаным, Беларусым.
Металлургым и махуэр зэдагъэлъапIэ гъущI лъэпкъыгъуэхэм хэлэжьыхь IэщIагъэлIхэми, къуршылъэ-къырылъэхэм пцIий къыщIэзых шахтёрхэми, нэгъуэщIхэми. 
ЗэрытщIэщи, металлургие IэнатIэм хуэлажьэ IуэхущIапIэхэр дызэрыт зэманми Урысей Федерацэм щымащIэкъым. Абыхэм я хэщIапIэщ Магнитогорск, Липецк, Челябинск, Череповец, Старый Оскол хуэдэ къалэшхуэхэр, нэгъуэщIхэри. 
Металлургием мыхьэнэ ин щрат щIыпIэхэм а махуэм хэIэтыкIа Iуэхугъуэхэр щрагъэкIуэкI: унэтIыныгъэм щызэрагъэхъулIахэр щагъэнэрылъагъу зэхыхьэхэр, спорт зэпеуэхэр, зэхьэзэхуэ зэмылIэужьыгъуэхэр къыщызэрагъэпэщ, IэнатIэм хуэлажьэ заводышхуэхэм зыщрагъэплъыхь, «мастер-класс» жыхуаIэ дерсхэм щыщIагъэдэIу, IуэхущIапIэхэм IэмэпсымэщIэхэр щагъэув, гъущIым Iэзащэу къыхащIыкIа тхыпхъэщIыпхъэр щагъэлъагъуэ, гъуазджэм и лэжьакIуэхэм концертхэр щат. 
Металлургым и махуэр гъэмахуэм и кум зэрытрагъэхуам къыхэкIыу, къезыхьэжьэхэм, къатемыхьэлъэу, яхузэфIокI гуфIэгъуэ Iуэхугъуэхэм я нэхъыбэр пщIантIэхэм, уэрамхэм, уеблэмэ щIыуэпсым нэхъ пэгъунэгъу утыку нэхъ зэлъыIухахэм щрагъэкIуэкIын. АтIэми, а Iуэхугъуэри и щхьэусыгъуэщ махуэщIым хэтыну гупыж зыщIхэм я бжыгъэм зэрыхэхъуэм. 
КЪУМАХУЭ Аслъэн.
  • 10 просмотров
Поделиться:

Читать также:

14.08.2026 - 17:00 → Псэущхьэ екIуэлIапIэншэхэми - гулъытэ
14.08.2026 - 13:50 → НОБЭ
13.08.2026 - 07:55 → НОБЭ
12.08.2026 - 12:25 → НОБЭ
11.08.2026 - 09:07 → НОБЭ