Къэбэрдей-Балъкъэрым и спорт инфраструктурэм зегъэужьыным, физкультурэмрэ спортымрэ ди цIыхухэр, я ныбжь емылъытауэ, дегъэхьэхыным, абыхэм щхьэкIэ иджырей Iэмалхэр къахузэгъэпэщыным ехьэлIауэ республикэм лэжьыгъэ пыухыкIахэр щрагъэкIуэкI иужьрей илъэсхэм. Ди щIыналъэм ахэр щагъэзащIэ лъэпкъ, къэрал пэхуэщIэхэм, лъэпкъ программэхэм япкъ иткIэ.
ЖыпIэнурамэ, 2021 гъэм щегъэжьауэ Къэбэрдей-Балъкъэрым къыщызэIуахащ спорт ухуэныгъэ ину 6. Абыхэм яхэтщ Налшык къалэм дащIыхьа иджырей пятиборьемкIэ комплексымрэ IэрыщI мыл зэрылъ уардэунэмрэ.
Республикэм и спорт инфраструктурэр егъэфIэкIуэным хуэунэтIа лэжьыгъэхэм 2026 гъэми пащэ. Псалъэм къыдэкIуэу, Безенги, Зэрэгъыж къуажэхэм спорт залыщIэхэр щаухуэ. Абыхэм нэмыщI, «IэрыщI алэрыбгъухэр» зэрылъ топджэгу губгъуищрэ физкультурэ-узыншагъэр щрагъэфIакIуэ комплексу зырэ къызэIуахащ.
Гулъытэ хэха хуащI икIи унэтIыныгъэ нэхъыщхьэхэм хохьэ цIыху къызэрыгуэкIхэм зыщагъэсэн спорт утыкухэр нэхъыбэу къызэгъэпэщыныр. Псалъэм и хьэтыркIэ, ГТО-м и мардэхэр щат утыкуу I0 мы гъэм къызэIуахынущ, абыхэм ящыщу 3-м лэжьэн щIадзакIэщ. КъищынэмыщIауэ, мыхьэнэ ин республикэм щрат спорт утыку «губзыгъэхэм» (интернетым пыдзауэ лажьэхэм) хуэдэхэр нэхъыбэу жылэхэмрэ к ъалэхэмрэ дэщIыхьыным. Апхуэдэхэм ящыщу 5 къызэIуахакIэщ, иджыри 5 мы гъэм яухуэнущ.
Абыхэм къадэкIуэу, ди щIыналъэм щыIэ спорт ухуэныгъэхэр ирагъэфIакIуэ, зыхуей-зыхуэфIхэмкIэ ахэр къызэрагъэпэщ зэпытщ. Псалъэм папщIэ, Хьэсэней къуажэм дэт модульнэ спорт залыр зэIузэпэщ ящIащ, Налшык къалэм и «Налшык» спорт комплексым и лъабжьэмрэ щIэгъэкъуэнхэмрэ ягъэбыдащ. Республикэм и сабий стадионым и топджэгу губгъуэр къызыхуэтыншэу мы гъэм зэрагъэпэщыжынущ.
КъБР-м и спорт ухуэныгъэхэр иджырей спорт Iэмэпсымэхэмрэ обрудованэхэмкIэ къызэгъэпэщыныр япэ игъэщыпхъэ унэтIыныгъэхэм хохьэ. Сыту жыпIэмэ, ди спортсменхэм нэсу загъэсэфын, зэхьэзэхуэхэм зыхуагъэхьэзырын папщIэ, япэ дыдэу ахэр зыхуеинухэм ящыщщи: чемпионхэм я япэ лъэбакъуэхэм щыщIидзэр абдежщ.
Республикэм и спорт инфраструктурэр зэрырагъэфIакIуэм къыдэкIуэу, IэщIагъэлIхэмрэ тренерхэмрэ гъэхьэзэрынми гулъытэшхуэ ди деж щыхуащI. 2026 гъэм щегъэжьауэ Къэбэрдей-Балъкъэрым щагъэзащIэ «Къуажэ тренер» программэр икIи абы ипкъ иткIэ тренер-егъэджакIуэу 3-м лэжьыгъэхэр щратащ ди щIыналъэм и районищым.
