Домбеякъ медалу тIу

Урысей Федерацэм боксымкIэ и чемпионат иджыблагъэ щекIуэкIащ Мордовием и Саранск къалэм. Абы щызэхуэсащ ди къэралым и спортсмен лъэщу 320-рэ, я ныбжькIэ илъэс 19-40-хэм къриубыдэу.

Къэбэрдей-Балъкъэрым и лIыкIуэхэм зэхьэзэхуэм хъарзынэу зыкъыщагъэлъэгъуащ икIи домбеякъ медалитI абы къыщахьащ.

Килограмм 75-рэ зи хьэлъагъхэм я деж ещанэ щыхъуащ Къущхьэ Iэмин. Финалым и Iыхьэ ныкъуэр абы очко бжыгъэкIэ иригъэхьащ Тэтэрстаным щыщ Сергеев Сергей.

«Сэ нобэ къыспэщIэтащ егъэлеиныгъэ лъэпкъ хэмыту хьэрхуэрэгъу лъэщ икIи къызолъытэ ар боксер нэхъыфI дыдэхэм ящыщу. А щIалэм къилэжьат финалым хэтыну. Сэ схузэфIэкIащ абы и ебгъэрыкIуэныгъэр зэтесIыгъэну, ди зэIущIэри хьэлэмэту екIуэкIащ. ФIыщIэ фIэкIа нэгъуэщI хуэфащэкъым Iэмин, ауэ финалым икIыну зыхузэфIэкIар сэращ.

Си гугъэмкIэ, зымащIэкIэ сэ нэхъыбэрэ сытехуащ, итIанэ, сэ нэхъ сыхущIэкъуащ текIуэныгъэм. Си къалэн нэхъыщхьэр – дыщэ медалырщ. Согугъэ УФ-м и чемпион тIэунейрэ сыхъуну. Нэгъабэ етIуанэ сыхъуауэ аращ. Иджыпсту си плъапIэр дыщэрщ», - яжриIащ журналистхэм Сергеевым, Къущхьэ Iэмин езэуа нэужь.

Килограмм 86-рэ зи хьэлъагъхэм я дежи апхуэдэ зэфIэкIхэр къыщигъэлъэгъуащ Занилэ Идар. Мыбдежми, финалым и Iыхьэ ныкъуэм абы къыщытекIуащ Мэзкуу областым и боксер Усов Михаил.

ЩIалэхэр зэхьэзэхуэм хуагъэхьэзыращ КIэрэф Залымрэ Занилэ Муратрэ.