Дахагъэ куэдым я къежьапIэ

Илъэс 13 хъуауэ Урысей Федерацэм щагъэлъапIэ Унагъуэм, лъагъуныгъэм, зэхуэпэжыным я махуэр. «Унагъуэр быдэмэ, къэралыр лъэщщ», - жыIэгъуэ пэжым къызэригъэлъагъуэу, унагъуэр къэралым и зы Iыхьэщ, жылагъуэми и быдапIэ лъэщщ. Аращ къыщежьэр цIыхухэм яхэлъ хьэл дахэ куэд: лъагъуныгъэри, пщIэри, нэмысри, гумащIагъри, пэжыгъэри…

Апхуэдиз мыхьэнэ цIыху гъащIэм щызиIэ унагъуэм гулъытэшхуи щегъуэт ди хэкум. Дуней псор зэщIэзыубыда пандемием и зэранкIэ Унагъуэм, лъагъуныгъэм, зэхуэпэжыным я махуэр, нэхъапэм хуэдэу, мы лъэхъэнэм Iэтауэ щагъэлъапIэркъым, зэхуэсышхуэхэр, дауэдапщэхэр иращIэкIыркъым. АтIэми, махуэшхуэм иIэ мыхьэнэр абы игъэлъахъшэркъым. Махуэшхуэр гъэлъэпIэным къыхузэрагъэпэща къэралпсо комитетым къыбгъэдэкI «Лъагъуныгъэмрэ зэхуэпэжыныгъэмрэ» медалыр, щIыхь, фIыщIэ тхылъхэр хуагъэфащэ жылагъуэм пщIэ щызиIэ, зэгурыIуэрэ зэдэIуэжу псэу, нэмыс зи зэхуаку дэлъ, щIэблэ гъэса къызыщIэхъуэ зэщхьэгъусэ щыпкъэ куэдым. Апхуэдэу онлайн щытыкIэм иту ирагъэкIуэкI «Илъэсым и унагъуэ», «Унагъуэр лъэпкъ хабзэхэм я хъумакIуэщ» урысейпсо зэпеуэри, «Си унагъуэ» сурэт зэхьэзэхуэри. Абыхэм я унэтIыныгъэхэм щытекIуэ унагъуэхэм щIыналъэ, щIыпIэ администрацэхэм къабгъэдэкI фIыщIэ тхылъхэр ират. Апхуэдэ унагъуэ дахэхэщ, гулъытэ лъагэ нэхъапэIуэкIэ зыхуащIахэм ящыщщ Чэтбийхэ Малилрэ Ленэрэ, КIужхэ Мухьэдинрэ Iэсиятрэ, Къэрмокъуэхэ Iэхьедрэ Розэрэ, Гуанэхэ Юрийрэ Сусаннэрэ, Къэжэрхэ Наурызрэ Маринэрэ, Щомахуэхэ Ибрэхьимрэ Таисэрэ, Къуэдзокъуэхэ Къазбэчрэ Инессэрэ, Неппев Борисрэ Халкечевэ Заремэрэ, Ахъмэтхэ Мурадинрэ Ферузрэ, Атмурзаевхэ Сапарэрэ Латенэрэ я унагъуэхэр, нэгъуэщIхэри.
 ЗэрыжытIащи, нобэрей махуэшхуэр епхащ дэ тщыщ дэтхэнэми и дежкIэ мыхьэнэшхуэ зиIэ Iуэхугъуэм: унагъуэм, абы илъ лъагъуныгъэмрэ пэжыгъэмрэ, зэгурыIуэныгъэмрэ гуапагъэмрэ. Дэтхэнэ унагъуэми дохъуэхъу насыпыфIэу, щIэблэ узыншэ къащIэхъуэу, я мурадхэр къайхъулIэу псэуну.
 

Махуэшхуэм и дамыгъэ шынэ-шынэ удз гъагъэр.