ЕхъулIэныгъэ инхэмрэ къыдэмыхъулIа гугъапIэхэмрэ

Токио щекIуэкIа XXXII Гъэмахуэ Олимп джэгухэр Iэтауэ зэхуащIыжащ. Ди къэралым и спортсменхэм абы дыщэ медалу 20, дыжьыну – 28-рэ, домбеякъыу – 23-рэ къыщахьащ икIи гуп зэпеуэм етхуанэ щыхъуащ.

Дауи, гурыIуэгъуэщ Японием щыIа Олимпиадэр адрейхэм зыкIи зэрамыщхьар. Ар илъэскIэ ягъэIэпхъуам и закъуэкъым, атIэ стадионхэм цIыхухэр щIагъуэу зэрырамыгъэхьами, нэгъуэщI къэралхэм къикIахэр я нэкIэ зэхьэзэхуэм зэремыплъыфами, фаджэ ищIащ. Апхуэдэу щыт пэтми, японхэм фIыщIэ ин къалэжь апхуэдиз цIыху къызрихьэлIа дунейпсо зэпеуэ иныр екIурэ-ещхьу зэрырагъэкIуэкIам папщIэ. НэгъуэщI лъэпкъ щыIэу фIэщщIыгъуейщ абыхэм хуэдэу зэрыIыгърэ жыIэдаIуэрэ. Хьэлэмэтращи, XXXII Гъэмахуэ Олимп джэгухэм щагуэша медаль псори къыхащIыкIащ къамыгъэсэбэпыж электрон техникэ зэмылIэужьыгъуэу а къэралым щызэхуахьэсахэм. Дыщэ къудейуэ абыхэм къыхагъэкъэбзыкIащ килограмм 37-рэ!

Урысейм и олимп комитетым (аращ ди къэралым икIахэм зэреджар) и гуп къыхэхам хэтхэм зэхьэзэхуэм щаубыдар етхуанэ увыпIэращ. Иужь илъэсищэм ар нэхъыкIэ дыдэщ. Я мурадащ нэхъыфIищым яхыхьэну, арщхьэкIэ къайхъулIакъым. Апхуэдэу щыт пэтми, Токио щызэхэта XXXII Гъэмахуэ Олимп джэгухэм дэрэжэгъуэ ин къыдатащ.

Ди жагъуэ зэрыхъущи, Японием адыгэхэр къыщыхэжаныкIам. Бразилием уей-уей щыжезыгъэIа Мудрэн Беслъэнрэ Джэду Iэниуаррэ я зэфIэкI лъагэм къыпызыщэн къытхэкIакъым. Дыкъыдэзыхыжар Прохладнэ щыщ ди лъахэгъу цIэрыIуэ Ласицкене (Кучинэ) Марие и закъуэщ.

Олимпиадэм и иужь махуищым куэд къызэщIаубыдащ – абыхэм хэтащ ехъулIэныгъэ инхэри къыдэмыхъулIа гугъапIэхэри. Садулаевым къищынэмыщIауэ, бэнэкIэ хуитымкIэ чемпион хъуащ ди гъунэгъу Осетие Ищхъэрэ-Аланием щыщ Сидаков Заурбэч. Зэдэууэ псым есынкIи ди цIыхубзхэм къапэлъэщын къахъэкIакъым икIи Ромашинэ Светланэ ебланэ дывщэ медалыр Олимп джэгухэм къыщихьащ. НэхъыбэкIэ дащыгугъат волейболымрэ гандболымкIэ ди командэ къыхэхахэм – абыхэм кIэух зэIущIэхэр ирагъэхьащ. Художественнэ гимнастикэм илъэс тIощIым щIигъуауэ щытепщэ ди хъыджэбзхэм япэ ирагъэщащ нэгъуэщIхэр.

Китаймрэ Америкэм и Штат Зэгуэтхэмрэ я спортсменхэм зэхьэзэхуэр иухыхукIэ я зэпэщIэтыныгъэр къэтIэсхъакъым. Зы дыщэ медалкIэ япэ ищри, официальнэу щымыт гуп зэпеуэм бжьыпэр щаубыдащ США-м къикIахэм. Ещанэ увыпIэр зыIэрыхьа японхэр абыхэм зыкъомкIэ къакIэрыхуащ.

Токио медаль 71-рэ къыщахьащ Урысейм и олимп комитетым и командэм хэтхэм. АбыкIэ дяпэ ищар США-мрэ Китаймрэщ. Ди жагъуэ зэрыхъущи, дыщэкIэ дакъыпикIуэтащ зи цIэ къитIуахэм къищынэмыщIауэ, хэгъэрейхэмрэ инджылызхэмри. Аращи, зэлэжьыпхъэхэр мащIэкъым, зэманыр къебзыхьэкIащ; Пекин щыIэну ЩIымахуэ Олимп джэгухэм щIадзэным илъэс ныкъуэ иIэжу аращ. 2024 гъэм Париж къытпоплъэ. Абы ирихьэлIэу допинг Iуэхуми кIэ игъуэтыну дыщогугъ икIи Урысей Фнедерацэр абы хэтын хуейщ и спортсменхэм зыщыщ къэралыр ямыбзыщIу, текIуа иужькIэ я гимныр кърагъэуэну, ныпыр ягъэлъэгъуэну хуиту.