Куэшмэн-Битокъу Рузанэ КъБР-м и Казначействэм и федеральнэ IуэхущIапIэм хъыбархэр хъумэнымкIэ и экспертщ. ЩIэныгъэ щызригъэгъуэтащ Къэбэрдей-Балъкъэр къэрал университетым и инженерно-техническэ факультетым, Къэбэрдей-Балъкъэр аграрнэ университетым экономикэмрэ управленэмкIэ, финансхэмкIэ и къудамэм.
ЦIыхум и щIыкIэ хъунур и сабиигъуэм къыщожьэ. Хьэл-щэн хуэхъунухэр, гъащIэм нэхъ зыдихьэхынухэр абдеж убзыхуа щыхъуу къыщIэкIынущ. Рузанэ и гумызагъагъым и къежьапIэри сабиигъуэрщ:
- СызэрыцIыкIурэ сесат зыгуэрым зеспщытамэ, ар Iэмал имыIэу фIы дыдэу сщIэн хуейуэ. КъэхъункIэ хъунукъэ апхуэди… Школым сыщыщIэсым къысхуихуащ 3 къэсхьу, ар си гум щыщIыхьа, сыщытегъа. Си адэ-анэр абы щхьэкIэ зэи къызэшхыдэнутэкъым, сэ езым зыхуэзмыгъэфащэу арат ахъумэ. Школым тху защIэкIэ сыщеджащ. ЕджапIэ нэхъыщхьэхэри диплом плъыжькIэ къэзухащ.
Рузанэ и студент гъащIэр щIэщыгъуэт. ЩIэщыгъуэт икIи гугъут. Дерс нэужьхэм библиотекэм щIэсырейт, экзамен тыгъуэхэм жэщыри къыдэкIуэу еджэрт. Зэман щиIэми, и ныбжьэгъухэм я гъусэу щIалэгъуэ дунейр къихутэрт.
- ЩIэныгъэр, ныбжьэгъухэр, егъэджакIуэхэр, Iуэхугъуэ дахэхэр – куэд мэхъу си гум гуапэу илъхэр. Къапщтэмэ, еджэныр нэхъ гугъуу къысщохъу лэжьыгъэм нэхърэ. Ущеджэм деж махуэ къэс уэру гупсысэщIэхэр, хъыбархэр къокIуэ. УтеплъэкъукI хъуркъым еджэным. Сыщыстудентым сымыжейуэ жэщым сыщыщыса куэдрэ къысхуихуащ, нэхъыбэ къэсщIэн папщIэ.
Сэ сызыщеджа Инженер – техникэ факультетым хъыджэбз щымащIэти, егъэлеяуэ дагъафIэрт, пщIэ къытхуащIырт. Зэгуэр, япэ курсым дыщIэсу, еджапIэ дэфтэрхэм халъхьэну ди паспорт копиехэр зэхуэтхьэсырт. Си паспортыр къэзылъэгъуа ди курсэгъум «УэI, мыбдеж ди нанэ урещхьщ» жиIэри гушыIат. Ар гупым щIэсхэм зэхахри, «нанэ» къысфIащащ. Къэзухыху аращ къызэрызэджар, иджыри дыщызэхуэзэхэм «нанэ» къызжаIэ, - къыддогуашэ ди псэлъэгъур.
КIуэкIуэ Валерэ и цIэр зезыхьэ Мэкъумэш къэрал университетым заочнэу щеджэу, Казначействэм лэжьэн щыщIидзащ Битокъу Рузанэ. ЗэржиIэмкIэ, япэ махуэхэр къегугъуэкIащ. Ауэ фIы дыдэуи хэгъуэзащ. Лэжьыгъэм и щэхухэр къищIащ, и гум дыхьащ. Мыхьэнэшхуэ иIэщ уи псэм фIэфI IэнатIэм упэрытыным, абы гукъыдэж къыпхелъхьэ. Рузанэ IэщIагъэлI набдзэгубдзаплъэщ, хэлъэт иIэщ – зыпэрыт IэнатIэм аращ щынэхъыщхьэр.
- Си лэжьыгъэм къалэн къысщещI цIыху куэдым сагурыIуэну. ИтIанэ, жэуаплыныгъэшхуэ сохь. Псалъэм папщIэ сэ «электронэ IэщIэдз» жыхуаIэр къэрал къулыкъущIэхэм язот. Абы папщIэ, я гъащIэм, гуащIэдэкIым теухуа хъыбархэр содж. Абы нэгъуэщIынэ тебгъаплъэ хъунукъым. ЦIыхухэм сэбэп сахуохъу, куэдым щIэупщIэу зыкъысхуагъазэ. ЖыпIэракъэ, я дзыхь къызагъэз. Езыхэми псалъэ гуапэ куэд зэхызагъэх - аращ гукъыдэж къысхэзылъхьэр, - жеIэ абы.
ЦIыху щыхъукIэ иIэщ гъащIэм щапхъэ щыхуэхъу, чэнджэщ щыхуэныкъуэм деж зэжалIэ, и щэху зриIуэтылIэ. Рузанэ и гъащIэм щапхъэ нэхъыщхьэу хэтыр и адэ-анэрщ:
- Абыхэм я деж зыщызгъэсащ дунейм дапхуэдэу сытетын хуейми. Я гугъуехьи слъэгъуащ, абыхэм пщIэ яIэу зэрыпхыкIыфми ситхьэкъурт. Сыт хуэдэ Iуэху пэрыувэми зызэщIагъакъуэ, зэролъытэ. Си анэ-адэм я деж щыслъэгъуа зэхущытыкIэ дахэр сэ езым сухуа унагъуэщIэм зэрыхэслъхьэн и ужь ситщ. ИкIи къызохъулIэ.
Тхылъхэми куэдым хуагъасэу жеIэ Рузанэ. Псом хуэмыдэу художественнэ тхыгъэхэр Iэпэгъу зыхуэхъуам абыхэми насыпыфIэ ящIу къелъытэ.
- НэхъыфI дыдэу слъагъу тхылъу сиIэщ Джейн Остин и «Гордость и предубеждение» романыр. ГъащIэ тхылъщ ар, фIылъагъуныгъэр и лъабжьэу. Къытезгъазэурэ куэдрэ седжащ, седжэхуи щIэщыгъуэ къыщызгъуэтащ, - жеIэ.
Битокъу Рузанэ инстаграмым щиIэ напэкIуэцIым щхьэхуэныгъэ зэриIэм гу лъыттащ: абыдеж цIыхухэм щадогуашэ шхын IэфIхэр зэрапщэфI щIыкIэхэмкIэ. ПщэфIэныри абы фIыуэ илъагъу Iуэхухэм ящыщщ.
- IэфIу пщэфIэныр бзылъхугъэм къыдалъху зы хьэл дахэу къысщохъу. Моуэ нэхъ щаби нэхъ гуапи щIэхъукIыу и хьэлыр. Сэри пщэфIапIэм щызгъакIуэ зэманыр сфIэфIщ. Си анэм сыхуигъэсащ пщэфIэным. СыщыцIыкIум ар щыпщафIэкIэ сригъусэт, куэдым сыщIэупщIэрт, сыдэIэпыкъурт. ТIэкIу сыкъыдэкIуэтейри, сэри сыпщафIэу щIэздзащ. Илъэс I3-м ситу япэу хупцIынэ сыпщат си анэр къыскIэлъыплъурэ. КъызэгугъуэкIат, «сэ зэи схуэпщынукъым хупцIынэ» жысIэу си гур зэбгъэжырт. «Зэрэ-тIорэ упщмэ, уесагъэхэщ», къызжезыIауэ щыта си анэм иджыпсту езым нэхърэ нэхъыфIу сыпщу жеIэ.
ПщэфIэным зебгъэсэным иджыпсту зэманыр хуэщIащ. УпщэфIым хэплъхьэ ерыскъыхэкIхэр куэду щыIэщ, рецептыращи, щIэщыгъуэу интернетым къыщыбогъуэт е нэхъ къапщтэмэ, курсхэм зыхебгъатхэми хъунущ. Сэ, псалъэм щхьэкIэ, сыпщэфIхэм я рецептхэр инстраграмым щызиIэ напэкIуэцIым къызолъхьэри цIыхухэм садогуашэ, куэд къыщIоупщIэ, сэри си гуапэу сэбэп сахуохъу, - къыддогуашэ и гупсысэхэмкIэ.
Сыт хуэдэ Iуэхум тепсэлъыхьми, Рузанэ и гупсысэхэр бзыгъэщ. Я нэхъ Iуэху цIыкIуу къыпщыхъуми акъыл хелъхьэф. ЦIыхур дунейм къытехьэныр насыпырыхьу къелъытэ икIи гъащIэм хелъагъуэ а насыпыр зэрихъумэн Iэмал куэд.
- ФIыуэ слъагъухэр узыншэныр, я Iуэху кIуэтэныр насыпщ сэркIэ. Насыпщ мы дунеишхуэм сэр папщIи зы плIанэпэ зэрыщыIэр, си гупсысэм сызэрыхуитыжыр, цIыхухэм си сэбэп зэрезгъэкIыфыр, псэкIэ си гъунэгъухэм сыкъызэраухъуреихьыр, - жеIэ пщащэм.
