КъБР-м и Правительствэм и УнафэщI Мусуков Алий иригъэкIуэкIащ Iуэхугъуэ зыбжанэм щытепсэлъыхьа, проектхэр къыщащта зэIущIэ.
КъБР-м щIы, мылъку зэхущытыкIэхэмкIэ и министр Тэхъу Аслъэн игъэбелджылащ Къэбэрдей-Балъкъэрым и мылъкум щыщ бэджэнду тыным теухуауэ Правительствэм игъэхьэзыра проектыр. Бэджэнду ятынущ сом мелуан 24,3 -рэ и уасэ электросеть IуэIухуэщIэ.
Къару имыIэжу къалъытащ «Къэбэрдей-Балъкъэрым ипотекэ тынымкIэ и республикэ IуэхущIапIэ» акционер зэгухьэныгъэм и устав мылъкум хэгъэхъуэнымкIэ теухуауэ щыIа унафэм.
КъБР-м финансхэмкIэ и министр Лисун Еленэ тепсэлъыхьащ КъБР-м и бюджет нэхъыщхьэм, бюджет, автономнэ IуэхущIапIэхэм зи пIалъэр икIа кредит щIыхуэр тыжынымкIэ 2024-2026 гъэхэм тещIыхьауэ ялэжьынухэм я мардэм. Проектыр тетщ КъБР-м и къэрал мылъкур зэтегъэувэжынымрэ хэгъэхъуэнымкIэ 2024 гъэм тещIыхьа зэгурыIуэныгъэу КъБР-м и Iэтащхьэм Урысей Федерацэм финансхэмкIэ и министерствэм ириухылIа зэгурыIуэныгъэм. ЩIапхъэхэр белджылыуэ щытын хуейщ мэлыжьыхьым и 1-м и пэ къихуэу.
ЗэIущIэм къыщащтащ республикэм и бюджет зэхэлъым къыхэкIыу цIыхухэм зэрадэIэпыкъуа мылъкур къызэрагъэсэбэпым кIэлъыплъынымрэ къэпщытэнымкIэ 2024 гъэм тещIыхьа проектыр.
КъБР-м мэкъумэш хозяйствэмкIэ и министр Сыжажэ Хьэсэн къэпсэлъащ Къэбэрдей-Балъкъэрыр ерыскъыпхъэкIэ къызэрызэгъэпэщам кIэлъыплъыну гуп гъэбелджылынымкIэ Правительствэм игъэхьэзыра проектым теухуауэ.
«Псы къабзэ» щIыналъэ программэм халъхьа зэхъуэкIыныгъэхэм тепсэлъыхьащ КъБР-м ухуэныгъэмрэ псэупIэ-коммунальнэ хозяйствэмкIэ и министр Бэрбэч Алим. Программэм халъхьа зэхъуэкIыныгъэхэр тещIыхьащ федеральнэ мылъкум щыщ УФ-м и щIыналъэм етыным теухуауэ щыIэ мардэхэм тегъэхуэным. 2019-2024 гъэхэм хуэзэу федеральнэ мылъкум щыщу республикэм программэмкIэ къыIэрыхьащ сом мелуан 385,3-рэ. Республикэ бюджетым щыщу абы халъхьэжащ сом мелуани 2.
Республикэм и автомобиль гъуэгубгъухэм деж щыIэ пщIэ зыщIат автомобиль гъэувыпIэхэр къэзыгъэсэбэпхэм нэхъыбэ дыдэу щIатын хуейр къэбжынымрэ гъэбелджылынымрэ тещIыхьа проектым тепсэлъыхьащ КъБР-м транспортымрэ гъуэгу хозяйствэмкIэ и министр ДыщэкI Аслъэн.
Къэбэрдей-Балъкъэр Республикэм и Правительствэмрэ Урысей Федерацэм и Суд Нэхъыщхьэм и деж щыIэ Суд департаментымрэ КъБР-м и зэзыгъэкIуж судыщIэхэм я лэжьыгъэр къызэгъэпэщынымкIэ зэрызэдэлэжьэнум теухуа я зэгурыIуэныгъэм и проектыр зэIущIэм щигъэбелджылащ КъБР-м и зэзыгъэкIуж судыщIэхэм я лэжьыгъэр къызэзыгъэпэщ IуэхущIапIэм и унафэщI Муртаз Борис.
КъБР-м лэжьыгъэмрэ цIыхухэм псэуныгъэкIэ защIэгъэкъуэнымкIэ и министр Асанов Алим игъэбелджылащ республикэм и цIыхухэм зэрыдэIэпыкъуну щIыкIэм теухуа проектиплI.
