Псыежэххэр къимыун хуэдэу

КъБР-м и Iэтащхьэ КIуэкIуэ Казбек УФ-м и Прави­тельствэм Псы къиуным зыщыхъумэнымрэ абы кърикIуахэр гъэзэкIуэжынымкIэ и комиссэм иригъэкIуэкIа зэIущIэм видеоконференц IэмалкIэ хэтащ. 

Ар иригъэкIуэкIащ УФ-м Граждан зыхъумэжыныгъэм, мыхьэнэшхуэ зиIэ щытыкIэхэмрэ дуней къэхъукъащIэхэм ­кърикIуа гузэвэгъуэр гъэзэкIуэжынымкIэ и министр Куренков Александр. Зэхуэсыр теухуат псыр къыщиуа щIыналъэ щхьэхуэхэм икIэщIыпIэкIэ я гугъуехьхэр ящхьэщыхын зэры­хуейм.
Уэшхышхуэхэм яужькIэ псыежэххэр къиу хъумэ, абыхэм зэрыхъукIэ зэраныгъэ нэхъ мащIэ кърикIуэн хуэдэу, дызэрыт илъэсым Iуэхур къызэгъэпэщын зэрыхуейм тепсэлъыхьащ къызэхуэсахэр, псом хуэмыдэу яхуэсакъыпхъэщ къурш зэхуакухэм къыдэж псы цIыкIухэм. 
Къэбэрдей-Балъкъэрым псыр къыщиу хабзэр мэлы­жьыхьымрэ фокIадэмрэ я зэхуакурщ. Нобэрей IуэхукIэ ущIэгузэвэн щыIэкъым а лъэныкъуэмкIэ. «Росгидромет»-м и къудамэу республикэм щыIэ гидропост 11 кIэлъоплъ псыежэххэм я щытыкIэм. Псыр къиу хъумэ, а IуэхущIапIэхэр ящIапхъэ псоми хуэхьэзырщ. 
Республикэм псы Iуфэхэмрэ псыбэкъухэмрэ гъэбыдэнымкIэ IэщIагъэлI гуп 14-м километр 20 зи кIыхьагъ щIыпIэм лэжьыгъэхэр щрагъэкIуэкI, лъэмыж лъабжьэхэр ягъэкъабзэ. Псым елэжь хозяйствэхэм инженер лэжьыгъэхэм хухэха Iэмэпсымэхэр, машинэхэр яIэщ, икIэщIыпIэкIэ дэIэпыкъуэгъу хъуну гупхэри муниципалитетхэм щызэрагъэпэщащ. 
КъинэмыщIауэ, УФ-м и МЧС-м и Управленэ нэхъыщхьэм и къудамэу КъБР-м щыIэм мыхьэнэшхуэ зиIэ щытыкIэхэр къэмыгъэхъунымрэ ахэр гъэзэкIуэжыным папщIэ Зыуэ щыт къэрал системэрэ IэщIагъэлI гупрэ зэригъэпэщащ.