Хэт скутерхэр къытхуэзышар?

Налшык и лъэс зекIуапIэхэм къызэрыщажыхь электросамокатхэм ятеухуа псалъэмакъыр щIэмычэу екIуэкI зэпытщ икIи фIэщщIыгъуейщ, цIыхухэм зыкIи емыгупсысу, ахэр къытхуэзышахэр пщэдей, щIегъуэжу, зэщIакъуэжыныр.

Иджыпсту сабийхэм я гъэмахуэ зыгъэпсэхугъуэщ. Абыхэм ящыщ куэдым теупIэу яIэщ зи гугъу тщIа скутерхэр. Ахэр, зэрыфлъагъущи, хьэлъэщ, псынщIэу къажыхь, куэдрэ зэрыжытIащи, сабийхэм е ныбжь зиIэхэм яжьэхэуэмэ, фэбжь хьэлъэ хахын хуэдэу шынагъуэу.

Ди республикэм ахэр къизышахэм цIыхубэм зыпэщIасэкIи мыкъуаншэу, къыздикIар гурыIуэгъуейщ икIи щэхукъым ахэр зыгуэрым мылъку хэхыпIэ зэрищIар. Иджыпсту гу зылъыттэращи, къалэ уэрамхэм транспорту щызекIуэм бжыгъэрэ гъунэрэ яIэжкъым икIи абыхэм махуэ къэс къахэхъуэ зэпытщ. Къалэдэс цIыхум къэкIухьыпIэу яIэр лъэс зекIуапIэхэрати, ахэри цIыхумкIэ шынагъуэ скутерхэм яубыду хуежьащ. ЦIыхум зыкIи емылIалIэу ахэр гъащIэм къыхэзыхьахэри зыщIыпIэ щIэсщ, уэрамым лъэсу къыдыхьэу, Iуэхум и щытыкIэм кIэлъыплъыным ущыгугъ мыхъуну. Сыту жыпIэмэ, ахэр къыщашэми ящIэрт зэрышынагъуэр. АтIэ хэт къигъэувыIэну хэта ахэр? А цIэимыIуэхэр здэщысым щысу,  скутерхэр мэлажьэ, ахъшэр езыхэм я жыпым макIуэ. ЦIыхур-щэ?

Пшапэщ. Лениным и цIэр зезыхьэ уэрам нэхъыщхьэм бгъурыт лъэс зекIуапIэм жьыри щIэри щызэблокI, куэдым коляскэхэр, сабий зекIуагъащIэ цIыкIухэр ягъусэщ. А дакъикъэм къыздикIари къыздихуари умыщIэу ныбжьыщIэ гуп зытес скутерхэр къалапщэмкIэ зэкIэлъхьэужьу къызэрохьэх, зы макъ ямыщIрэ, къытелъадэу а сабий къэзыкIухьхэр ираудкIэ къемылыну, апхуэдиз хьэлъагъ зиIэхэр. Псом япэу жэуапым ешэлIапхъэр ахэр хуиту къалэ кIуэцIхэм щызезыгъакIуэхэрт. Шынагъуэ къызыдэкIуэ сыт хуэдэ транспорт лIэжьыгъуэми лъэс зекIуапIэм и Iуэху щыIэкъым, цIыхур иукIынкIэ щыхъунукIэ. Хьэмэрэ а насыпыншагъэр къэхъуху мардэу ара? Апхуэдэ гуэр къызэрыхъуу зэхэзежэу къыдэувэнущ, зыпэмыплъа, зыщымыгугъа къэхъуауэ жаIэу. «Нэф гъэжей» жыхуиIэм хуэдэу, нэгъабэ лъандэрэ абыхэм ятеухуа хабзэ къащтэным йожьэхэр. Хабзэ къыщIэпщтэнур сыт, къызыхуэпщтэнури хэт, скутерхэр лъэс лъагъуэхэм тетыну щышынагъуэкIэ - хабзэкIэ республикэм къремыгъэшэн хуейуэ аратэкъэ… Транспорт гъуэгур транспортым ейщ, къэнар скутерым иратыну мэулъэпхъащэ, уеблэмэ арыншами Iэзэвлъэзэв лъэс лъагъуэхэм скутер къэжыхьыпIэхэр еувэлIауэ хуащI. Ахэра къызыгурымыIуэр а гъущIыш хьэлъэжьым тесу къэзыжыхьхэр лъэбакъуэ хуэдизым дэту къызэрамыкIухьынур. КъэжыхьыпIэ пщIын ипэкIэ ар зыхуэпщIым шынагъуэу къыхудэкIуэм еплъыпхъэкъэ? Зым и зэраныр щхьэ щэм екIын хуей? Хьэмэрэ, абы темытIысхьэныр цIыхумкIэ Iэмалыншэ щыхъуар дапщэщ? Къалэм дэт лъэсырызекIуэхэм, иджыпсту мыхэр къыджьэхэлъэдэну пIэрэ жаIэрэ, сабий цIыкIу зи гъусэ адэ-анэ къудейхэр гулэгущтэм хэту щхьэ къакIухьын хуей?!

Телевиденэм и канал нэхъыщхьэхэм хабжэм жылагъуэ гъащIэм телажьэ цIыху цIэрыIуэхэм ящыщ зым щыжиIэгъащ зы псалъэ Iущ: Къуаншагъэм я нэхъ иныр зы цIыху закъуэм е зыбжанэм дежщ къыщежьэр. Мис ахэр къэгъуэтауэ а ящIамкIэ жэуапым ешэлIэн хуейуэ аращ… Нобэм къэс цIыхум шынагъуэншэу къыдекIуэкIа лъакъуэрыгъажэхэм я закъуэкIэ щхьэ Iуэхур зэфIэмыкIрэ? Ахэр псынщIагъуэщ, шынагъуэншэщ.

Скутерхэм хуиту къэжыхьыпIэ щхьэхуэхэр яIэным теухуауэ мы махуэхэм лэжьыгъэ щхьэхуэхэр щокIуэкI къалащхьэм и языныкъуэ щIыпIэхэм: лъэс зекIуапIэхэр зэпрагъэлыкIащ скутер къэжыхьыпIэрэ лъэс зекIуапIэу. Апхуэдэхэр хуащIащ Лениным и цIэр зезыхьэ уэрамым и ижьырабгъу лъэныкъуэми, арщхьэкIэ скутерхэм пэрыуэншэу къыщажыхьыр цIыхур щыкуэд сэмэгурабгъурщ. ГъащIэм къыхыхьэн хуэмей хьэпшыпхэм, пкъыгъуэхэм, ерыскъыхэкIхэм цIыхухэм къахуихь насыпыншагъэхэр къэхъунтэкъым, абыхэм я къежьапIэм къыфIэмыгъэкIыным телажьэ щыIатэмэ. АтIэ хэт нэмыукIытагъэкIэ къыдапх скутерхэр зейр?