АдыгэбзэкIэ дызэгъэпсалъэ

Сабийм анэдэлъхубзэ ищIэн-имыщIэныр анэм и закъуэ елъытауэ щыткъым, дауи. ИтIани, анэ губзыгъэ зиIэр зэрехъулIам и нэщэнэщ Къэбэрдей-Балъкъэрым къыщалъхуа, Тыркум унагъуэ щихьа, иджы махуэ къэс зи адыгэбзэми, тыркубзэми, урысыбзэми, инджылызыбзэми хэзыгъахъуэ и къуэр хэкубзэ-хэкупсэу къэзыгъэтэдж БищIо Iэсият къиIуэтэжа хъыбарыр.

 Iэсият адыгэбзэр хамэбзэм зэрыбгъэдыхьэ IэмалкIэ пасэу езыгъэджын щIэзыдза егъэджакIуэхэм язщ. Тыркум щригъэкIуэкI дерсхэм нэмыщI, ар Налшык щылажьэ «Зерат» школым щеджэхэми ядолажьэ, ехъулIэныгъэ зэриIэри еджакIуэхэм я гукъэкIыжхэм къыхощ. ИтIани, дерсым къыщыпщIа псори жьым ихьыжын шынагъуэ щыIэщ, а бзэм унагъуэм ущримыпсалъэмэ. АдэкIэ къакIуэр Iэсият и телеграм каналым къритха, езымрэ и къуэ цIыкIумрэ ятеухуа гукъэкIыжщ.

«Абрэджрэ сэрэ уэрамхэм дыщрикIуэкIэ, дэни адыгэбзэкIэ дыщызопсалъэ – Налшыки, Мэзкууи, Анкараи. Абы къыхэкIыу, блэкIхэм я нэм щхьэхуимыту дыкъыщыфIэнэ къохъу. Ауэ ардыдэм и фIыгъэкIэ адыгэхэм гу къытлъатэри, дызрагъэцIыхуну къыдбгъэдохьэ.

 Анкара дэт сабий паркым нобэ сшат Абрэдж. АдыгэбзэкIэ дызэрыпсалъэр зэрызэхихыу, зылI къыдбгъэдыхьати, а къалэм дэс Алътудхэ ящыщу къыщIэкIащ.

 Хамэ щIыпIэм сымыцIыху адыгэ гуэрым сыщыхуэзэу адыгэбзэкIэ дыщызэпсалъэкIэ, си гур гуфIэгъуэм егъэнщI. Си ныбжьэгъужь е си благъэ сыхуэзам хуэдэщ ар си дежкIэ. Къайсэр апхуэдэ зэIущIэхэр махуэ къэс жыхуаIэм хуэдэу къыщытхукъуокI – уэрамым, тыкуэным, IуэхущIапIэ зэмылIэужьыгъуэхэм… Анкара апхуэдэ къыщытщыщIыр нэхъ мащIэрэщ, ауэ нэхъ гукъинэж сщыхъуа зэIущIэр къыщыхъуар а къалэрщ.

Илъэсибл хуэдизкIэ узэIэбэкIыжмэ, си ныбжьэгъу хъыджэбзхэм саригъусэу Анкара къыщыткIухьырт, адыгэбзэкIэ дызэпсалъэу. Зи ныбжь хэкIуэта дадэ мыцIыху зэрымыщIэкIэ къыдбгъэдыхьэри, адыгэбзэкIэ къыдэпсэлъэн щIидзащ. Анкара илъэс 30 хъуауэ сыщопсэури, нобэ япэ дыдэу абы и уэрамхэм адыгэбзэ щызэхэсхыу аращ жиIэри… гъын щIидзат».

«Ди бзэр, ди бзэр» жытIэрей щхьэкIэ, ар узэрысабийрэ пIурылъыным и мыхьэнэр зэрызыхэтщIэжышхуэ щыIэ къыщIэкIынкъым ар махуэкъэс Iэмэпсымэу къэзыгъэщхьэпэхэм – зэи зыпамыубыдахэм, къызыхэкIар зыщIэжхэм, ар хуиту щызекIуэ щIыпIэм пэIэщIэ мыхъуахэм. Ауэ мыпхуэдэ хъыбар щызэхэпхым деж, щхьэхуимыту уогупсыс: «зиш тесу лъыхъуэжам» ещхьу, ди Iэм IэщIэлъ хъугъуэфIыгъуэм и уасэм дэ езым зэрыкIэрыдгъэхур армырауэ пIэрэ абы икIуфыну гъуэгу псори дэгъэзеигъуэу къыщIытфIэщIыр, къыхуэщтэну лъагапIэщIэхэм дыщIытемыгушхуэр, ди Iэгум илъ дыщэр пхъэнкIийм щIытфIыхэгъуащэр?!