Лъэпкъ пэхуэщIэхэр зэрагъэзащIэм арэзы къещI

Къэбэрдей-Балъкъэрым и Правительствэм и УнафэщI Мусуков Алийрэ Урысей Федерацэм и Президентым и полномочнэ лIыкIуэу ­КИФЩI-м щыIэм и къуэдзэ Владимиров Максимрэ зэгъусэу зэIущIэ иджыблагъэ ирагъэкIуэкIащ. Ар теухуауэ щытащ лъэпкъ пэхуэщIэхэм къыщыгъэлъэгъуауэ мы гъэм республикэм щрагъэкIуэкI лэжьыгъэхэм зэрехъулIэ щIыкIэм. 

ЗэIущIэм хэтащ КъБР-м федеральнэ инспектор нэхъыщхьэу щыIэ Васильченкэ Дмитрий, КъБР-м и Правительствэм и УнафэщIым и япэ къуэдзэ Къуныжь МуIэед, Правительствэм и УнафэщIым и къуэдзэ Хъубий Марат, экономикэ зыужьыныгъэмкIэ министр Рахаев Борис, щIыналъэм и адрей министерствэхэмрэ ведомствэхэмрэ я унафэщIхэр. 
Мусуков Алий зэIущIэм къызэрыщыхигъэщамкIэ, щIыналъэ пэхуэщIэу 47-рэ республикэм щагъэзащIэ, абыхэм ящыщу 33-м текIуадэ мылъкур зэраубзыхуам тету къаутIыпщ.
Дызэрыт илъэсым и япэ Iыхьэ ныкъуэм къриубыдэу зэфIагъэкIыну зыхуагъэувыжа къалэнхэм щыщу яхузэфIэкIамкIэ (процент 99,93-рэ) ебланэ увыпIэр къэралым, япэ увыпIэр КИФЩI-м хыхьэ щIыналъэхэм я деж щиIыгъщ республикэм. 2024 гъэм лъэпкъ пэхуэщIэхэм трагъэкIуэдэну мылъкум и куэдагъыр сом мелард 11-м ноблагъэ.
Владимиров Максим Правительствэм иригъэкIуэкI лэжьыгъэм, федеральнэ властым хуаIэ зэпыщIэныгъэхэри яхэту, арэзы те­хъуащ икIи адэкIэ зэрехъулIэну щIыкIэм теухуа чэнджэщхэр къаритащ.