Тхылъым и пщIэм хагъахъуэу

ФокIадэм и 6 - 8-хэм Петропавловск-Камчатскэм щекIуэкIынущ «Тотальный фестиваль» Iуэхур. Ар зэхэтынущ тхылъ гъэлъэгъуэныгъэ-жармыкIэ абрагъуэу, лекцэхэу, щэнхабзэ пшыхьхэу. Iуэхум и къызэгъэпэщакIуэщ Беринг Витус и цIэр зэрихьэу Камчаткэм щыIэ къэрал университетыр. ЕтIуанэу екIуэкIыну мы фестивалыр щызэхэтынущ Култучнэ гуэлым и Iуфэм. Фестивалым дарэгъу хуохъу Гуманитарнэ тхылъ тедзапIэ зэгуэтыр. Абы хэту къызэригъэпэщынущ Урысейм ис лъэпкъхэм я литературэм зезыгъэужь, дунейм къыщезыгъэцIыху Iуэхухэр. Фестивалым лъэтеувэ пшыхь щыхуащIынущ «Народная мудрость» тхылъ къыдэкIыгъуэхэм я зы том щхьэхуэм. КъыдэкIыгъуэхэм щызэхуэхьэсащ Урысейм ис лъэпкъхэм я литературэм щыщхэр. «Камчатский текст» тхылъым и лъэтеувэм къыщыпсэлъэнущ тхылъыр зэхэзыгъэувахэр. Фестивалым и программэм хэтщ тхакIуэхэр, зэдзэкIакIуэхэр, критикхэр, литературэхутэхэр къыщрагъэблэгъэну зэIущIэхэр. Iуэхум къеблэгъэнухэр яIущIэнущ зэдзэкIакIуэ Амелин Максим, тхакIуэхэу Къаныкъуэ Заринэрэ Каримовэ Алёнэрэ, шыпсэтх Косыгин Кирилл, литературэ критик Ширяев Василий сымэ. 
Петропавловск-Камчатскэм еблэгъэнущ журналист, зэдзэкIакIуэ, тхакIуэ Гер Эргали. Ар «Знамя» журналым и саугъэтым и лауреатщ, «Хан-Тегри» журналым и редактор нэхъыщхьэщ. Ар тепсэлъыхьынущ иджырей рассказыр жанр щхьэхуэу литературэм зэрыхэувэм. ТхакIуэр фестивалым ирегъэблагъэ Урысейм и тхакIуэхэмрэ тхылъ тедзапIэхэмрэ я ассоциацэм. 
ХьэщIэхэр яIущIэнущ Камчаткэм и литераторхэми: Алейников Кирилл, Анькин Андрей, Бурмина Динэ, Карабановэ Юлие, Кудряшовэ Анастасие, Мельничук Софие, Самсоновэ Екатеринэ сымэ. 
Тхылъ фестиваль иныр хеубыдэ Урысей Федерацэм Бжыгъэр зи лъабжьэ зыужьыныгъэмкIэ, связхэмрэ хъыбарегъащIэ IэнатIэхэмкIэ и министерствэм и нэIэ щIэт «Читающая Россия» программэм. 
Мыр етIуанэу къызэрагъэпэщ фестивалщ. Япэрейр Камчаткэм къыщызэрагъэпэщат жылагъуэ Iуэхум жыджэру хэтхэмрэ «Тотальный диктант» фондымрэ я гукъэкIкIэ. ЩIэгъэкъуэн хъуащ къэралым и Правительствэр, Сату-промышленнэ палатэр. Ар 2023 гъэм фокIадэм и 20-м щегъэжьауэ жэпуэгъуэм и 2 пщIондэ зэхэтауэ щытащ икIи куэдым гукъинэж ящыхъуащ. Iуэхум хэтауэ щытащ цIыху мини 10-м щIигъу.