УэрэджыIакIуэ щэджащэ

Урыс уэрэджыIакIуэу япэ дыдэу дунейпсо утыку ихьар Шаляпин Фёдорщ. Ар 1873 гъэм мазаем и 13-м Къэзан къыщалъхуащ. И адэ Иван къулыкъущIэ нэхъ цIыкIухэм ящыщт, къилэжьышхуэ щымыIэу. Абы къыхэкIыу щIалэ цIыкIум пасэу лэжьэн щIидзат. А зэрылажьэм хуэдэурэ, шырыкъущIэ IэщIагъэми зыхуигъасэрт. Хуабжьу ныбжьыщIэ гурыхуэт Фёдор. Пхъэми зыгуэрхэр къыхибзыкIырт, сурэт ищIырт, хъэтI дахэ иIэу тхэрт.

УэрэджыIакIуэ щэджащэу къалъыта Шаляпин Федор теухуа тхыгъэ цIыкIум дызыщрихьэлIар «Адыгэ псалъэ» газетэм 2008 гъэм и зы къыдэкIыгъуэхэм ящыщ зым дыщыхэплъэжырщ.

… ЦIыкIуу уэрэд жиIэн щIидзащ Фёдор. Гъунэгъухэр, ныбжьэгъухэр пщыхьэщхьэкIэрэ абы и макъ гуакIуэм едэIуэну зэхуэсырт. Пасэуи гу къылъатащ икIи опернэ театрым ирагъэблэгъащ, роль нэхъ цIыкIухэри кърату щIадзащ. Япэ дыдэу сценэшхуэм щихьар 1890 гъэм дыгъэгъазэм и 18-рщ. Зи ныбжьыр илъэс 17 фIэкIа мыхъуа щIалэщIэм хьэлэмэтыщэу игъэзэщIат польскэ композитор Монюшкэ Станислав и «Галька» оперэм щыщ ариер. Ар къыщыхъуар Уфа къалэм и театрырщ. Абдежми Шаляпин гъуэгуанэ кIыхь щытоувэ, Урысейм и къалэ зыбжани къызэхекIухь. Илъэс I9 зи ныбжь уэрэджыIакIуэр Тифлис къыщохутэ. Мы къалэм нэIуасэ щызэхуохъу езы Шаляпинымрэ а зэманым музыкант цIэрыIуэу щыта Усатов Дмитрийрэ. ЛIы Iущым занщIэу гу къылъетэ щIалэщIэм зэфIэкIышхуэ зэриIэм икIи къыдэлажьэу щIедзэ. А тIум Тифлис щыIэ музыкэ театрым илъэситIкIэ зыкъыщагъэлъэгъуащ, ехъулIэныгъэ инхэр яIэу.

1894 гъэм Шаляпин Фёдор Петербург макIуэ. ЯпэщIыкIэ ар ирагъэблагъэ Панаевым и цIэр зезыхьэ театрым. ИтIанэ 1895 гъэм мэлыжьыхьым и 5-м Мариинскэ театрым яшэ. Абы и пэ къихуэу Фёдор щхьэгъусэу къешэ балеринэ цIэрыIуэ Торнагэ Иолэ. Мариинскэ театрым урыс уэрэджыIакIуэм япэу щегъэзащIэ франджы композитор Гуно Шарль и «Фауст» оперэм хэт Мефистофель и ариер. Ауэ Шаляпиным щIыхь нэхъ ин къыхуэзыхьыр аракъым.

1896 - 1899 гъэхэм Шаляпин Фёдор урыс классикэ оперэм щыпашэ мэхъу. ЕхъулIэныгъэ иIэу абы егъэзащIэ урыс композиторхэу Мусоргский Модест и «Борис Годунов» оперэм хэт Борис, Глинкэ Михаил и «Иван Сусанин» оперэм хэт Сусанин, Римский-Корсаков и «Псковитянкэ» оперэм хэт Грозный Иван сымэ я ролхэр, нэгъуэщI куэди. А зэманым ар быдэу япыщIа мэхъу а лъэхъэнэм урыс щэнхабзэм и лэжьакIуэшхуэу щытахэу Горький Максим, Дягилев Сергей, Рахманинов Сергей. Дягилевым и жэрдэмкIэ, Шаляпин Фёдор концерт итыну нэгъуэщI къэралхэм макIуэ. 1901 гъэм гъатхэпэм и 1-м абы ехъулIэныгъэ иIэу япэу зыкъыщегъэлъагъуэ Милан щыIэ Ла-Скалэ опернэ театрым. Абы, итальян композитор Бойто Арриго и «Мефистофель» оперэм роль нэхъыщхьэр щигъэзэщIа нэужь, Iэгуауэшхуэ щыхуаIэтат. 1907 гъэм Дягилев Сергей Париж урыс концертышхуэ къыщызэригъэпэщат. Ари фIыуэ къехъулIащ Шаляпиным.

Ар уэрэджыIакIуэ къудейтэкъым, атIэ режиссёр хьэлэмэтт, сурэтыщI Iэзэт.

Фёдор тIэу фыз къишащ, бынитху иIащ. Абыхэм ящыщу адэм и гъуэгум ирикIуэжар, гъуазджэм хуэлэжьар и къуэ Борис и закъуэщ. Ар сурэтыщI цIэрыIуэ хъуащ, абы ищIат и адэм и сурэтри. Шаляпин Фёдор 1938 гъэм Париж щылIащ. Абы и хьэдэр 1984 гъэм Москва къашэжри щыщIалъхьэжащ.

1982 гъэ лъандэрэ Шаляпиным и цIэкIэ Къэзан оперэ фестивалъ щрагъэкIуэкI. I99I гъэм щегъэжьауэ ар дунейпсо фестиваль хъуащ. 1989 гъэ лъандэрэ Шаляпин Фёдор и щIыхькIэ опернэ уэрэджыIакIуэхэм я зэпеуэхэр къызэрагъэпэщ.

Тедзэным хуэзыгъэхьэзырар КЪАНКЪУЛ Зазийщ.