Нобэ КъБР-м и Правительствэм и Унэм щекIуэкIащ КъБР-м и Парламентым и пленарнэ зэхуэсыр. Ар теухуауэ щытащ Къэбэрдей-Балъкъэр Республикэм и Iэтащхьэр хэхыным.
ЗэIущIэм хэтащ Урысей Федерацэм и Федеральнэ Зэхуэсым ФедерацэмкIэ и Советым КъБР-м къыбгъэдэкIыу сенатору щыIэхэр, Къэрал Думэм и депутатхэр, КъБР-м и Правительствэм, министерствэхэм, ведомствэхэм, Конституцэ Судым, Суд Нэхъыщхьэм, Арбитраж судым, хабзэхъумэ органхэм, щIыналъэхэм, КъБР-м и ХэхакIуэ комиссэм, Жылагъуэ палатэм, еджапIэ нэхъыщхьэхэм, дин зэгухьэныгъэхэм я унафэщIхэр, политикэ партхэмрэ творческэ зэгухьэныгъэхэмрэ я лIыкIуэхэр, журналистхэр.
КъБР-м и Парламентым и УнафэщI Егоровэ Татьянэ зэIущIэр къызэIуихащ икIи зыхэплъэнур зы Iуэхугъуэ закъуэу зэрыщытыр къыхигъэщащ. КъБР-м и Конституцэм и 79-нэ статьям ипкъ иткIэ, КъБР-м и Iэтащхьэр КъБР-м и Парламентым и депутатхэм илъэситхукIэ хах. Фигу къэдгъэкIыжынщи, 2024 гъэм фокIадэм и 3-м Урысей Федерацэм и Президент Путин Владимир 202I гъэм дыгъэгъазэм и 2I-м къыдэкIа «Урысей Федерацэм и субъектхэм властыр къыщызэгъэпэщынымкIэ я зэхуэдэ бгъэдыхьэкIэхэм я IуэхукIэ» Федеральнэ законым и 23-нэ статьям и 8-нэ Iыхьэм къызэригъэувым тету, къыхилъхьащ КъБР-м и Iэтащхьэу щытыну кандидатурэхэр. Ахэр: Войтов Алексей Иван и къуэ - «Илар» ООО-м и унафэщIыр, КъБР-м и Парламентым и депутатыр; КIуэкIуэ Казбек Валерий и къуэр - КъБР-м и Iэтащхьэр; Шаваев Ильяс Паго и къуэр - КъБР-м щIыуэпс хъугъуэфIыгъуэхэмрэ экологиемкIэ и министрыр.
Республикэм и Iэтащхьэ хъуну къагъэлъэгъуа къулыкъущIэхэм зэман хухахри, щхьэж и программэр убгъуауэ къызэхуэсахэм я пащхьэ кърахьащ. Апхуэдэуи абыхэм я Iуэху бгъэдыхьэкIэр зэпкърахащ КъБР-м и Парламентым щызэхэт фракцэхэм я тхьэмадэхэм. ЗэIущIэм къыщыпсэлъа АфэщIагъуэ Михаил («Урысей Зэкъуэт»), Пащты Борис (КПРФ), Кебеков Владимр («Захуагъэм тет Урысей»), Безгодько Владимир (ЛДПР), Щхьэгъэпсэу Сэфарбий («ЩхъуантIэхэр) сымэ жаIащ республикэм ифI зыхэлъ Iуэхухэр дэгъэкIа хъунымкIэ дзыхь зыхуащI кандидатурэхэр зэрыщыIэр. ИкIи къэпсэлъахэм я нэхъыбэр КIуэкIуэ Казбек и телъхьэу къыщIэкIащ.
КъБР-м и Парламентым и УнафэщIым зэрыжиIам тету, депутатхэр щIэкIри, хэхыпIэхэм Iэ щаIэтащ.
