Дызэкъуэувэмэ, шынагъуэм дыпэщIэтыфынущ

КъБР-м и Iэтащхьэ КIуэкIуэ Казбек Къэрал кIуэцI IуэхухэмкIэ органхэм я лэжьакIуэхэу зи къулыкъур зыгъэзащIэу хэкIуэдахэм я фэеплъ махуэм ирихьэлIэу цIыхухэм зэрызахуигъазэ

Къэбэрдей-Балъкъэр Республикэм и цIыхухэу пщIэ зыхуэсщIхэ! 
Къэбэрдей-Балъкъэрым и иджырей тхыдэм къыхэщыж нэщхъеягъуэ махуэхэм ящыщ зыщ жэпуэгъуэм и 13-р. Зи Iыхьлыхэр зыфIэкIуэдахэм дахуэщыгъуэу икIи дахуэгузавэу, Iэщэ яIыгъыу, лIыхъужьыгъэ къагъэлъагъуэу, зи гъащIэм емыблэжу республикэр щIэпхъаджащIэхэм ящызыхъумахэм я фэеплъым пщIэшхуэ яхуэтщIу дигу къы­догъэкIыж. Абыхэм я фэеплъыр дэ зэи тщыгъупщэнукъым.
Террорист щIэпхъаджагъэхэр къызэзыгъэпэщхэр, ахэр зыгъэзащIэхэр зэрыпхуэгъэзэхуэни, я IуэхущIафэхэр зэрахуэбгъэгъуфыни щыIэкъым. Абыхэм я деж къыщытхьыну текIуэныгъэр дэтхэнэ зыми дэлъытащ. Нобэ дэ псоми куууэ зыхэтщIэн хуейщ бий ерум ткIийуэ дызэры­пэщIэтыпхъэр, ди Президент Путин Владимир псэкупсэ-гъэсэныгъэмрэ тхыдэ-щэнхабзэ лъапIэныгъэмрэ хъу­мэнымкIэ икIи щIэгъэбыдэнымкIэ къыхилъхьа къалэным мыхьэнэшхуэ зэриIэр.
Шэч къытесхьэркъым: Къэбэрдей-Балъкъэрым и къэкIуэнур, ди щIэблэм я гъащIэр къызыфIэIуэху псори дызэкъуэувэмэ, а шынагъуэм дыпэщIэтыфынущ, яхуэ­фэщэн жэуапи еттыжыфынущ, ди республикэм мамыр зыужьыныгъэр къыщызэдгъэпэщыфынущ.