Псэгъэтынш лэжьыгъэхэр

Къэбэрдей-Балъкъэрым и Лъэпкъ музейм щагъэлъагъуэ КъБР-м и цIыхубэ художник, ХудожествэхэмкIэ Урысей Академием щIыхь зиIэ и академик, Урысейм и Абстракционистхэм (САБРОС), «Урысейм и сурэтыщIхэм я зэгухьэныгъэ» творческэ жылагъуэ ­союзхэм хэт Къанокъуэ Руслан и лэжьыгъэщIэхэр. «Творю от сердца и души» выставкэр траухуащ сурэтыщIыр къызэ­ралъхурэ илъэс 75-рэ зэры­рикъум. 

Ар къыщызэIуахым зыкърагъэхьэлIащ КъБР-м щэнхабзэмкIэ и министр Къумахуэ Мухьэдин, КъБР-м и Парламентым и УнафэщIым и къуэдзэ ­Къардэн Мурат, КъБР-м и Парламентым МэкъумэшымкIэ, щIыуэ­псымкIэ, экологиемрэ дыкъэзыухъуреихь дунейр хъумэ­нымкIэ и комитетым и уна­фэщIым и къуэдзэ Щхьэгъэпсо Сэфарбий, КъБР-м и Сурэ­тыщI­хэм я зэгухьэныгъэм и унафэщI Къаныкъуэ Жаннэ, УФ-м и сурэттеххэм я союзым хэт, ТворчествэмкIэ дунейпсо академием и академик Вэрокъуэ Заур.
- Сэ сысурэтыщIкъым, аращи, Руслан и лэжьыгъэхэм я фIагъым и гугъу схуэщIынукъым. Ауэ, гу зылъыстаращи, мы су­рэт­хэм узыIэпашэ, мы лэжьыгъэ щхъуэкIэплъыкIэхэм псэр зыгъэхуабэ гуэр яхыболъагъуэ, - жиIащ Къумахуэ Мухьэдин. 
Министрым и псалъэм щыпищэм Къаныкъуэ Жаннэ къыхигъэщащ Руслан КъБР-м и сурэтыщI гъуазджэм и зыужьы­ныгъэм хэлъхьэныгъэфI зэры­хуищIар. 
Щхьэгъэпсо Сэфарбий ЩIэ­ны­гъэхэмкIэ Дунейпсо Адыгэ академием къыбгъэдэкIыу Къанокъуэ Руслан бгъэхэIу дамыгъэрэ щIыхь тхылърэ иритащ, республикэм и щэнхабзэмрэ сурэтыщI гъуазджэмрэ хэлъхьэ­ныгъэфI зэрыхуищIым папщIэ. Щхьэгъэпсом жиIащ сурэты­щIым и лъэпкъымрэ и щэнхабзэмрэ зэриIэтыр, абы хуэфащэ дыдэу зэрызэрихьэр ЩIэныгъэхэмкIэ Дунейпсо Адыгэ академием и академик цIэ лъапIэр. 
Къэпсэлъахэм жаIар къызэ­щIэпкъуэжмэ, нэхъыщхьэу къыхагъэщаращи, сурэтыщIым ­гъуазджэм и лIэужьыгъуэ щIэ­щыгъуэ къыхихар; абы цIыхум и гурыгъу-гурыщIэхэр гъуджэм хуэдэу къыхуогъэлъагъуэ; и абстракцэ лэжьыгъэхэр нобэрей гъащIэм поджэж; Руслан хуэдэу композицэмрэ плъыфэмрэ зэ­зыгъэкIуф къэгъуэтыгъуейщ; мифологием, хьэршым я деж щыщIэдзауэ щалъхуа Шытхьэлэ къуажэм щыщIэкIыжу ятриухуа сурэтхэр удэзыхьэхщ; абыхэм ящIэлъ гупсысэр гъэщIэгъуэ­ныщэщ. А псор къэплъытэмэ, гурыIуэгъуэщ иджырей гъэлъэгъуэныгъэми езым и лэжьыгъэхэми щIэупщIэшхуэ щIаIэр. 
Къанокъуэ Руслан фIыщIэ яхуищIащ къэпсэлъахэм. И лэжьэкIэм теухуауэ абы къыхигъэщащ сурэтхэр япэщIыкIэ къэрэндащкIэ зэрищIыр, абы зэманышхуэ зэрытекIуадэр. Къэбгъэлъагъуэмэ, зы сурэтым илъэс е илъэситI-щы щихь ­къохъу. Сочэ, Кисловодск, нэ­гъуэщI къалэхэми щыщхэр и лэ­жьыгъэхэм куэду къыщIоупщIэ.
Гъэлъэгъуэныгъэм хагъэхьащ компьютер графикэкIэ щIа абстракцэ лэжьыгъэ зэмылIэу­жьыгъуэхэр. Плъыфэбэу зэхэлъ су­рэтхэм щыболъагъу адыгэ ­Iуэ­рыIуатэм щыщ теплъэгъуэ­хэр, лъэпкъ дамыгъэхэр, сурэты­щIым и къуажэм и щIыуэпс ­дахэр, хьэршыр. Абыхэм ущеплъкIэ гурыIуэгъуэщ Руслан и IэпщIэлъапщIагъэм щIэи гъуни зэримыIэр, и лэжьыгъэхэр зыми зэремыщхьыр. А сурэтхэм хуэдэ зы щIыпIи щыплъагъунукъым. Аращ Урысейм, нэгъуэщI щIы­пIэхэм щекIуэкI выставкэ зэмы­лIэужьыгъуэхэм утыку къыщрихьэ и лэжьыгъэхэр сыт щыгъуи щIэщыгъуэ, гъэщIэгъуэн щIащыхъум и щхьэусыгъуэр.
Къанокъуэ Руслан Башир и ­къуэр Аруан щIыналъэм хыхьэ Шытхьэлэ къуажэм 1949 гъэм къыщалъхуащ. Орёл къалэм промышленностым, щэнхабзэмрэ гъуазджэмрэ я дизайнерхэр щагъэхьэзыр и художест­веннэ училищэр 1976 гъэм къиухащ, художник-оформитель Iэ­щIагъэр иIэу. Къанокъуэр гъуаз­джэм и лIэужьыгъуэ куэ­дым зэрыхуэIэкIуэлъакIуэр умыгъэщIэгъуэн плъэкIыркъым. Сурэт щIыным, графикэм къы­дэкIуэу, декоративно-прикладной гъуазджэми зэфIэкIхэр щиIэщ - гъущIымрэ пхъэмрэ йолэжь. ИтIанэ, Руслан и лэжьыгъэхэр зыми хэбгъэгъуэщэнкIэ Iэмал иIэкъым, плъыфэ щхъуэ­кIэплъыкIэхэр апхуэдизкIэ екIуу зэхеухуанэри. И сурэтхэр щагъэлъэгъуащ «Панорама» ­ху­дожественнэ галереем, Минводы, Сочэ, Грознэ къалэхэм, нэгъуэщI щIыпIэхэми. Къищы­нэмыщIауэ, и IэдакъэщIэкIхэм дихьэххэм Iэмал яIэщ ахэр зэпымыууэ щагъэлъагъуэ Radisson Blu (Сочэ), «Синдика» (Налшык) художественнэ сало­ным зыщыхагъэгъуэзэну. 

Сурэтыр Къарей  Элинэ  трихащ.