Макъамэм зэришэлIахэр

ГъуазджэхэмкIэ Кавказ Ищхъэрэ Къэрал институтым концерт гукъинэж щекIуэкIащ, КъБР-м ГъуазджэхэмкIэ и сабий школхэр хэту. Ар теухуат 2024 гъэр Унагъуэм и илъэсу зэрыщытам.

Концертыр ягъэдэхащ мы илъэсыр зи ехъулIэныгъэкIэ зыгъэбжьыфIа артист ныбжьыщIэхэмрэ республикэм и музыкант цIэрыIуэхэмрэ. ЖыпIэ хъунущ ахэр щэнхабзэм унагъуэу зэришэлIауэ. Пшыхьым щыжаIащ ГъуазджэхэмкIэ Кавказ Ищхъэрэ къэрал институтым Щэнхабзэмрэ гъуазджэмкIэ и колледжым илъэситху хъуауэ тхьэмахуитIым къриубыдэу «Декабрьские вечера» концертхэр зэрыщрагъэкIуэкIар.

- Мы илъэсыр и кIэм щынэблагъэм ирихьэлIэу къызэдгъэпэща концертыр иужьрейщ, ауэ унагъуэр игъащIэкIэ щыIэнущ, - жиIащ ГъуазджэхэмкIэ Кавказ Ищхъэрэ къэрал институтым и ректор Рахаев Анатолэ. – Унагъуэр къэралым, абы щыпсэу дэтхэнэ зыми ди къежьапIэщ, ди быдапIэщ. Зы унагъуэм исхэм зэгъусэу мы пшыхьым уэрэд щыжаIэнущ, щэнхабзэмрэ гъуазджэмрэ щытепщэ унагъуэхэр зэрыдахэм, псэкIэ зэрыбейм щыхьэт техъуэу.

Рахаевыр илъэсыщIэ дызытехьэмкIэ ехъуэхъуащ мы Iуэхум хэтахэм. Абы къыхигъэщащ мамырыгъэмрэ лъагъуныгъэмрэ щытепщэ унагъуэу, щIыналъэу дунейм дытетыну зэригуапэр.

Пшыхьыр ягъэдэхащ КъБР-м ГъуазджэхэмкIэ и Сабий школхэм я хорхэм. НыбжьыщIэхэм ягъэзэщIащ Рахманинов Сергей, Жырыкъ Заур, Тухманов Давид, Минков Марк сымэ я IэдакъэщIэкI уэрэд цIэрыIуэхэм щыщ. Апхуэдэу концертым зыкърезыгъэхьэлIахэм я гукъыдэжым хагъэхъуащ макъамэр щытепщэ Гороховхэ, Лыджыдэхэ, Мотайхэ, Къэзаншхэ я унагъуэхэм щыщхэм.

КонцертымкIэ къапщытэжащ егъэджакIуэхэмрэ еджакIуэхэмрэ илъэсым яIа ехъулIэныгъэхэр. Абы хэтахэм щIыхь, фIыщIэ тхылъхэр иратащ.