ГъащIэр щIэщыгъуэ ящызыщI Iуэхухэр

Гъэлъэгъуэныгъэхэр

КъБР-м и Лъэпкъ музейм щагъэлъагъуэ «Молоды душой» выставкэр. Лэжьыгъэхэр я Iэдакъэ къыщIэкIащ зи ныбжьыр хэкIуэта, «Анна» зи фIэщыгъэ клубым екIуалIэ IэпщIэлъапщIэхэм. Ар къызэрагъэпэщащ КъБР-м волонтёр IуэхухэмкIэ и «Ресурс» центрымрэ ЦIыхубэ художественнэ IэщIагъэхэмкIэ республикэм и центрымрэ я дэIэпыкъуэгъуу.
КъыжыIапхъэщ клубым хэтхэм я лэжьыгъэхэр Лъэпкъ музейм иджы еплIанэу зэрыщагъэлъагъуэр. Iуэхур зи жэрдэмхэм я мурадыр зыхуэунэтIар зи узыншагъэм къимыхь ныкъуэдыкъуэхэм, пенсэм тIысыжа, зэфIэкI зиIэ IэпэIэсэхэм ядэIэпыкъунырщ. 
«Анна» клубым и унафэщI Жиздюк Марие зэрыжиIамкIэ зи узыншагъэр зыхъумэну пылъ цIыхухэм гупсэхугъуэ щагъуэт хэдыкIым, уэрэд жыIэным, тхылъ еджэным, лъэсу къэкIухьыным, гимнастикэм, нэгъуэщIхэми.
Зэхыхьэм къыщыпсэлъащ КъБР-м и Лъэпкъ музейм и унафэщI Накуэ Феликсрэ ЦIыхубэ художественнэ IэщIагъэхэмкIэ республикэм и центрым и унафэщI Урыс Аслъэнрэ. Абыхэм жаIащ лэжьыгъэхэр зи Iэдакъэ къыщIэкIахэм зэфIэкI зэраIэр, а дахагъэр цIыхубэм егъэлъагъун зэрыхуейр.
Республикэм щыпсэухэмрэ абы и хьэщIэхэмрэ Iэмал яIэщ выставкэм хагъэхьа лэжьыгъэхэм (тхыпхъэхэр зыхэт цы IэлъэщIхэм, сабийхэр зэрыджэгу хьэпшыпхэм, пхъуантэ цIыкIухэм, цIугъэнэхэм, скульптурэхэм, декоративно-прикладной гъуазджэм и хьэпшыпхэм) зыхагъэгъуэзэну. КъызэщIэпкъуэжмэ, гъэлъэгъуэныгъэм хагъэхьащ IэпэIэсэхэм я IэрыкIи 100-м щIигъу. Ахэр дызытехьэ ИлъэсыщIэм щIышылэм и 31-рэ пщIондэ ягъэлъэгъуэнущ.