Iусейн Олег ящыгъупщэркъым![]() Актёр, журналист цIэрыIуэ Iусейн Олег къыщалъхуа махуэщ щIышылэм и 26-р. ИлъэсиплI хъуащ ар дунейм зэрехыжрэ, ауэ артистыр ящыгъупщэркъым. ЗэфIэкIышхуэ зыбгъэдэлъа Олег адыгэбзэкIи урысыбзэкIи къеджэрт дызэрыгушхуэ ди усакIуэ-тхакIуэ пажэхэм я Iэдакъэ къыщIэкIа, гупсысэ куурэ купщIэрэ зыхэлъ тхыгъэхэм, анэдэлъхубзэм и дахагъэр цIыхухэм зыхригъащIэу. Зи усэ къеджэкIэмрэ утыку итыкIэмкIэ куэдым ягу къина артистым псом хуэмыдэу драмэ ролхэр нэхъ пэгъунэгъут. Щыхьэту урикъунт Iусейным «Пащтыхь Лир» спектаклым щигъэзащIэ роль нэхъыщхьэр абы хуэдэу къызэхъулIа артист къызэрыгъуэтыгъуейр, малъхъэдисым хуэдэу узыщIишэу бгъэдэлъ Iэзагъышхуэр абдеж зэрыщынэрылъагъур. Шекспир и трагедиер лIэщIыгъуэ зыбжанэ и пэкIэ итхами, ар нобэрей зэманым зэрыпэджэжым лIыхъужьым и пщIэр нэхъри иIэтырт. Налшык Котляровхэ Викторрэ Мариерэ я тхылъ тедзапIэм къыщыдэкIащ Iусейн Олег и гъащIэмрэ гуащIэмрэ теухуа «Внутренний огонь. Памяти актёра и журналиста Олега Гусейнова» тхылъыр, ар къызэралъхурэ илъэс 70 щрикъум ирихьэлIэу. Тхылъым хагъэхьащ Олег театрымрэ хъыбарегъащIэ IэнатIэхэмрэ (ар журналистуи щытат) къыщыдэгъуэгурыкIуа и лэжьэгъухэмрэ ныбжьэгъухэмрэ, ар къэзыцIыхуу щытахэм я гукъэкIыжхэр. КъищынэмыщIауэ, лэжьыгъэм хэхуащ илъэс зэхуэмыдэхэм газетхэмрэ журналхэмрэ къытрадза, ар щыджэгуа спектаклхэмрэ кинофильмхэмрэ ятеухуа тхыгъэхэр. Iусейным и гъащIэмрэ гуащIэмрэ теухуа тхылъым ихуащ абы и Iыхьлыхэмрэ благъэхэмрэ ятеухуауэ нимытхыса и тхыгъэр, и Iэдакъэ къыщIэкIа «Угасающий огонь, или Он должен жить» пьесэр, щIэупщIэ ин зиIэ и документальнэ очеркхэр. Абы хагъэхьащ Iусейным и сурэтхэр, ар щыджэгуа спектаклхэмрэ кинофильмхэмрэ щытрахахэр къызэщIиубыдэу. - 2021 гъэм зэуэзэпсэу дунейм ехыжащ Iусейн Олег. Ар зыхэта спектаклхэм ди театр утыкур ягъэдэхащ, фильмхэращи - и лIыхъужьхэм я ролхэр гукъинэжу къехъулIащ. И документальнэ очеркхэм нобэр къыздэсым щIэупщIэ яIэщ, купщIэ ящIэлъщ, узыгъэгупсысэщ, - жеIэ Котляров Виктор.
Поделиться:
Читать также:
15.02.2025 - 12:28 →
ЩIалэгъуалэр ягъэгушхуэ
12.02.2025 - 12:35 →
Зи цIэр лъэпкъ литературэм къыхэна лIыфI
10.02.2025 - 19:11 →
БлэкIамрэ нобэмрэ зэпащIэ
09.02.2025 - 13:00 →
Гъуазджэм щIыналъэхэр зэпещIэ
07.02.2025 - 15:17 →
ФIыр хъумэным къыхуезыджэщ
|