КъБР-м и Лъэпкъ музейм щагъэлъагъуэ щIэныгъэмрэ гъуазджэмкIэ Петровскэ академием хэта, «Эльбрусские новости» газетым и редактор нэхъыщхьэм и къуэдзэу щыта, коллекционер, псапащIэ Хаджиев Даниял зэхуихьэса лэжьыгъэхэм щыщ.
Илъэс пщIы бжыгъэхэм къриубыдэу Хаджиев Даниял зэхуихьэсащ ди республикэмрэ къэралымрэ я сурэтыщIхэм, цIыху IэпщIэлъапщIэхэм я Iэдакъэ къыщIэкIа сурэт, хьэпшып гъэщIэгъуэнхэу миным щIигъу. БлэкIа лIэщIыгъуэм псэуа сурэтыщI цIэрыIуэхэмрэ гъуазджэм япэ лъэбакъуэ хэзычэхэмрэ я лэжьыгъэхэр зэхуихьэс къудей мыхъуу, ар апхуэдэ цIыхухэм ядэIэпыкъурт. Даниял фIыщIэ хуэфащэщ Урысейм и нэгъуэщI щIыналъэхэм Къэбэрдей-Балъкъэрым и художникхэм я IэдакъэщIэкIхэм щигъэгъуазэу зэрыщытымкIи.
Хаджиев Даниял и щэнхабзэ щIэинхэр зыхъумэ, ахэр зыгъэлъагъуэ «Турна» центрым мы зэм утыку кърихьащ лэжьыгъэ 48-рэ, Будаев Сулеймэн, Гуданаев Борис, Ефименкэ Николай, Остряков Александр, Бахчеван Валентинэ, Курданов Валерэ, Баккуев Владимир, Анахаев Матгери, Поляков Александр, нэгъуэщIхэми ейуэ. Сурэтхэм щыщ зыбжанэ треухуащ балъкъэрхэм я щIыналъэм зэрырагъэIэпхъукIам. Псалъэм папщIэ, гуузщ къуажэ нэщI хъуар къыщыгъэлъэгъуа «И была весна 44-го» лэжьыгъэр. УзыIэпашэу уоплъ бзылъхугъэхэр, щIыналъэм и дахагъэр къыщыгъэлъэгъуа сурэтхэм. Езы Хаджиев Даниялрэ и адэшхуэмрэ я сурэтхэу Ефименкэ Николайрэ Поляков Александррэ я Iэдакъэ къыщIэкIахэри щыболъагъу абы.
Къэбэрдей-Балъкъэрым, къэралым и нэгъуэщI щIыналъэхэм я сурэтыщI цIэрыIуэхэм жанр зэмылIэужьыгъуэхэм щыщ я IэдакъэщIэкIхэр къызэщIаубыдэрт Хаджиевым къызэригъэпэщ выставкэхэм хигъэхьэнухэр къыщыхихкIэ. Псори зэхэту лэжьыгъэ 1500-м щIигъу зэхуихьэсат абы илъэс 40-м къриубыдэу. Гупсысэ зыщIэмылърэ дахагъэ зыхыумылъагъуэрэ яхэткъым абы къыщIэнахэм.
Миненков Сергейрэ Левандовский Сергейрэ Даниял теухуауэ ятха «Мир - крутая тропа» тхылъым хагъэхьащ Хаджиевым и Iыхьлыхэм, благъэхэм, ныбжьэгъухэм, къэзыцIыхуу щытахэм я гукъэкIыжхэр. Тхылъыр къыдагъэкIат Хаджиевыр дунейм ехыжыу мазэ зыбжанэ дэкIа нэужь.
Республикэм и гъуазджэм хэлъхьэныгъэфI хуэзыщIа Хаджиев Даниял и фIыгъэкIэ ди сурэтыщIхэм я лэжьыгъэ куэд хъума хъуащи, абыхэм зэман-зэманкIэ еплъыфынущ гъуазджэм дихьэххэр.
