ГъуазджэхэмкIэ Кавказ Ищхъэрэ къэрал институтым Щэнхабзэмрэ гъуазджэмкIэ и колледжым щекIуэкIащ «Творческие вершины - 2025» зэпеуэр. Абы и Iыхьэ «ЦIыхубэ макъамэ Iэмэпсымэхэр», «Фортепиано» унэтIыныгъэхэм зэхуашэсат Кавказ Ищхъэрэмрэ Урысей Ипщэмрэ зэфIэкI зиIэ я щIалэгъуалэр. Ар къызэригъэпэщащ художественнэ егъэджэныгъэмкIэ методикэ центрым, КъБР-м ЩэнхабзэмкIэ и министерствэр и дэIэпыкъуэгъуу. Зэпеуэр траухуащ Хэкум и хъумакIуэхэм я илъэсымрэ Хэку зауэшхуэм ди къэралым ТекIуэныгъэ Иныр къызэрыщихьрэ илъэс 80 зэрырикъумрэ.
Художественнэ егъэджэныгъэмкIэ методикэ центрым и унафэщI Бэрбэч Беслъэнрэ ГъуазджэхэмкIэ Кавказ Ищхъэрэ къэрал институтым Щэнхабзэмрэ гъуазджэмкIэ и колледжым и унафэщI, профессор, КъБР-м щэнхабзэмкIэ щIыхь зиIэ и лэжьакIуэ, лъэпкъыбэ зэпеуэхэм я лауреат Шэрыб Валерэрэ зэхыхьэм хэтхэм ехъулIэныгъэхэр зыIэрагъэхьэну ехъуэхъуащ.
КъэпщытакIуэ гупым хэтащ цIыхубэ макъамэмкIэ IэщIагъэлIхэр. «ЦIыхубэ макъамэ Iэмэпсымэхэр» (струннэ IэмэпсымэхэмкIэ) унэтIыныгъэм и къэпщытакIуэ гупым я унафэщI хъуащ лъэпкъыбэ зэпеуэхэм я лауреат, Москва и Къэрал Классикэ Академием, Маймонид и цIэр зезыхьэм (классикэ гитарэ) и профессор Финкельштейн Евгений. «ЦIыхубэ макъамэ Iэмэпсымэхэр» унэтIыныгъэм (клавишнэ Iэмэпсымэхэр) и къэпщытакIуэ гупым и унафэщIу щытар Шэрыб Валерэщ. КъэпщытакIуэ гупым хэтащ УФ-м щIыхь зиIэ и егъэджакIуэ, Ростов къалэм ГъуазджэмкIэ и колледжым и егъэджакIуэ Шишкинэ Галинэ, ГъуазджэхэмкIэ Кавказ Ищхъэрэ къэрал институтым цIыхубэ IэмэпсымэхэмкIэ и кафедрэм и егъэджакIуэ нэхъыжь Лопатинэ Иринэ, КъБР-м щIыхь зиIэ и артисткэ, Щэнхабзэмрэ гъуазджэмкIэ колледжым и «ЦIыхубэ оркестрым и Iэмэпсымэхэр» ПЦК-м и унафэщI Къашыргъэ Мадинэ, Адыгэ Республикэм щIыхь зиIэ и артист, ГъуазджэхэмкIэ колледжым, Тхьэбысым Умар и цIэр зезыхьэм, цIыхубэ IэмэпсымэхэмкIэ и къудамэм и егъэджакIуэ Полун Андрей, Ставрополь крайм щэнхабзэмкIэ щIыхь зиIэ и лэжьакIуэ Анисимов Олег.
ГъуазджэхэмкIэ Кавказ Ищхъэрэ къэрал институтым Щэнхабзэмрэ гъуазджэмкIэ и колледжым «ЦIыхубэ оркестрым и Iэмэпсымэхэр» ПЦК-м и студентхэм зэпеуэм я зэфIэкI щагъэлъэгъуащ. Зэхьэзэхуэм и Гран-при саугъэтыр къихьащ 3-нэ курсым и студент Балъкъэр Идар. 1 - 2 курсхэм щеджэхэм ящыщу 1 увыпIэр хуагъэфэщащ 2 курсым щIэс Шырыт Алим. 3-нэ увыпIэр зэдагуэшащ 2-нэ курсым щеджэхэу Пэрыт Дамиррэ Шакъ Раулрэ. 2 курсым щIэсхэу Тхьэгъэпсэу Селинэрэ Темирдашевэ Самирэрэ зэпеуэм и щIыхь тхылъыр иратащ. 4-нэ курсым и студент Iэпщэ Анзор 2-нэ увыпIэр къихьащ. Апхуэдэу а Iыхьэм къыхэжаныкIащ 4-нэ курсым щеджэхэу Болэ Самирэ, Мырзэкъан Данэ, Емышэ Ибрэхьим. «КIэ зимыIэ макъамэ» Iыхьэм нэхъыфIу къыщалъытащ 2-нэ курсым щIэс Вэрокъуэ Хьэсэн.
«Творческие вершины» зэпеуэм и «Фортепиано» Iыхьэм пианист 60-м я зэфIэкI щагъэлъэгъуащ. КъэпщытакIуэ гупым хэтащ КъШР-м Щэнхабзэмрэ гъуазджэмкIэ и колледжым, Даур Аслъэн и цIэр зезыхьэм, фортепианэмкIэ и къудамэм и унафэщI, КъШР-м щIыхь зиIэ и егъэджакIуэ Хъуран Зуридэ, Владикавказ къалэм ГъуазджэмкIэ и сабий школым и унафэщI, Осетие Ищхъэрэ - Алание Республикэм и цIыхубэ артисткэ Хестановэ Земфирэ, ГъуазджэхэмкIэ Кавказ Ищхъэрэ къэрал институтым Щэнхабзэмрэ гъуазджэмкIэ и колледжым фортепианэмкIэ и комиссэм и унафэщI Къэзанш Оксанэ, а колледжым фортепианэмкIэ и егъэджакIуэ Шпильберг Леонид сымэ. КъэпщытакIуэ гупым и унафэщIу щытар ГъуазджэхэмкIэ Кавказ Ищхъэрэ къэрал институтым фортепианэмкIэ и кафедрэм и профессор, КъБР-м щIыхь зиIэ и артисткэ Нестеренкэ Ольгэщ.
ГъуазджэхэмкIэ Кавказ Ищхъэрэ къэрал институтым Щэнхабзэмрэ гъуазджэмкIэ и колледжым и студентхэм ящыщу зэпеуэм къыхэжаныкIахэм я цIэ къраIуащ. Ахэр Гъэсашэ Амалие (I нагъыщэм и лауреат), Климахинэ Лерикэ (III нагъыщэм и лауреат), Чернощековэ Вероникэ (III нагъыщэм и лауреат), Рамоновэ Анастасие (III нагъыщэм и лауреат) сымэщ.
