Саугъэтыншэ къэнакъым

Кулиев Къайсын и цIэр зезыхьэ Балъкъэр лъэпкъ къэрал драмэ театрым ще­кIуэкIащ «Хрустальные звёздочки-2025» фестиваль-зэ­пеуэм и щIыналъэ Iыхьэр. Илъэс зыбжанэ хъуауэ ар къызэрагъэпэщ Суд пристав­хэм я федеральнэ къулы­къум и управленэу Къэбэрдей-­Балъкъэрым щыIэм. 

Жюрим хэтащ щэнхабзэмрэ гъуазджэмрэ я IэщIагъэлIхэр. 
- ЗэчиифIэ сабий 20-м щIи­гъум, зи адэ-анэхэр IэнатIэ зэмылIэужьыгъуэхэм щыла­жьэхэм, я зэфIэкIхэр щагъэ­лъэгъуащ унэтIыныгъэу щым. Дэтхэнэ зы сабийми Iэмал иIащ абы и къарум щеп­лъыжыну. Иджырей зэпеуэр ­хэхауэ щхьэхуэт. Мы гъэм ар ирихьэлIащ юбилей тIуащIэм - ТекIуэныгъэ Иныр илъэс 80, Урысей ФССП-р илъэси 160-рэ зэрырикъум. Ахэр къыщыгъэ­лъэгъуащ суд приставхэм я профсоюз комитетымрэ щIа­лэгъуалэ советымрэ я къарукIэ ягъэхьэзыра фэеплъ саугъэтхэм. Зэпеуэм хэтхэм я твор­ческэ номерхэр гъэнщIат нэхъыжьхэм зэрахьа лIыгъэм ­хуащI пщIэмкIэ, ди Хэку иным зэрырипагэмрэ ар фIыуэ зэ­ралъагъумрэ, - жиIащ къы­зэ­хуэ­са­хэм защыхуигъазэм зэ­хьэ­зэ­хуэм и къызэгъэпэщакIуэ комитетым и унафэщI, КъБР-м щыIэ УФССП-м и унафэщIым и ­къуэдзэ - Къэбэрдей-Балъкъэр Республикэм и суд пристав нэхъыщхьэм и къуэдзэ ­Литовкэ Наталье.
Утыкум щыIуащ Хэкум, ди щэнхабзэм и дахагъэм теухуа уэрэдхэр. Концертыр къызэ­Iуихри, Бозиевэ Сальмэ игъэ­зэщIащ цIэрыIуэ хъуа «Матушка земля» уэрэдыр. Къызэ­хуэсахэр дихьэхауэ едэIуащ Бах, Йенсен, Ловланд сымэ я композицэхэм. Псори итхьэ­къуат утыку къихьа «Дыгъэ­шыр» лъэпкъ къафэмкIэ ­ансамблым. Артист ныбжьы­щIэ­хэм Iэгуауэшхуэхэр хуаIэтащ. 
Жюрим хэтхэм къызэрыхагъэщащи, текIуахэр къыхахыныр тынштэкъым, дэтхэнэ-­ми къилэжьати. «Уэрэд жыIэн» номинацэм я ныбжь елъытауэ япэ увыпIэр щаубыдащ Ким Викторрэ Макаренкэ Мариерэ.
«Къафэ» унэтIыныгъэм нэхъыфIу къыщалъытащ «Дыгъэшыр» ансамблыр, «И Iэзагъым пап­щIэ» номинацэм бжьыпэр щаубыдащ Уэжь Идаррэ Уэдыхь Албэчрэ.
ТекIуахэм щIыхь тхылъхэр яритащ КъБР-м и профсоюзхэм я рескомым и унафэщIым и къуэдзэ Башиев Алим. Зэ­пеуэм хэта дэтхэнэ ныбжьы­щIэри саугъэтыншэу къэнакъым.