Нэхъри щIагъэхуабжьэ

1 июля, 2025 - 12:48
 «Кавказ.РФ»-м сом мелард 62-рэ хилъхьащ Къэбэрдей-Балъкъэрым и бизнес пэхуэщIэхэм. Компанием и унафэщI Юмшанов Андрей ар щыжиIащ Налшык къалэм щыIэу республикэм и хьэрычэтыщIэхэм щаIущIам щыгъуэ. 
ЗэIущIэм щытепсэлъыхьащ Кавказ Ищхъэрэм зегъэужьынымкIэ щыIэ программэм хыхьэу, КъБР-м и социально-экономикэ зыужьыныгъэмрэ пэхуэщIэхэр гъэзэщIа хъунымрэ ехьэлIа Iуэхухэм. Абыхэм ящыщщ дунейпсо мардэм къитIасэ, иджырей бгы-лыжэ курортхэм хиубыдэ «Iуащхьэмахуэ» турист-рекреацэ комплексышхуэр. Юмшанов Андрей къыхигъэщащ ахъшэ къаутIыпщым и нэхъыбэр абы и зыужьыныгъэм зэрагъакIуэр. 
«Псори зэхэту ди инвестицэ портфелым и куэдагъыр сом мелард 47-м ноблагъэ, инфраструктурэм зедгъэужьын мурадкIэ, пIалъэ жыжьэкIэ хэтлъхьэ сом мелард 70-р къыдэкIуэу. Къэбэрдей-Балъкъэрым дэтIыгъащ псори зэхэту сом мелард 62-рэ и уасэ пэхуэщIэ, абы щыщу сом мелард 23-р дэ къыдбгъэдэкIыу. ЗэрыгурыIуэгъуэщи, ди ахъшэм и нэхъыбэр зыхэтлъхьэр «Iуащхьэмахуэ» экономикэ щIыпIэрщ, ауэ, абы къыдэкIуэу, дэ нэгъуэщI пэхуэщIэхэми долэжь, инышхуэу ахэр щымытми, я зэхэлъыкIэкIэ укъыдахьэхыу», – жиIащ «Кавказ.РФ-м» и унафэщIым.
Апхуэдэуи зэIущIэм хэтахэм абы гу лъаригъэтащ Кавказым и зыужьыныгъэм щыхьэт техъуэу макроэкономикэ ехъулIэныгъэхэм иужьрей илъэсхэм зэрыхагъахъуэ зэпытым.
«Урысей Федерацэм макроэкономикэмкIэ ику иту щыщыIэ бжыгъэхэм дыхуэкIуэн щхьэкIэ, капитал нэхъыщхьэм дгъакIуэ инвестицэмрэ щIыналъэм и продуктымрэ я куэдагъым хэдгъэхъуэн, лэжьапIэншэхэм я бжыгъэр дгъэмэщIэн хуейщ – нэхъ мащIэ дыдэу – хуэдитIкIэ. Къалэн нэхъыщхьэу къытпэщылъыр мыращ: ди зыужьыныгъэм хуэм зедмыгъэщIу, нэхъ жыджэру адэкIэ дыкIуэтэнырщ», - дыщIигъужащ Юмшанов Андрей.
ХЬЭЩЫКЪУЕЙ Олег.
  • 81 просмотр
Поделиться: