Краснодардэсхэм я лэжьыгъэхэр

КъБР-м и Лъэпкъ музейм щагъэлъагъуэ «Гибискус и другие. Диалог» выставкэр. Абы хагъэ­хьащ УФ-м и СурэтыщIхэм я зэгу­хьэныгъэм хэтхэу Краснодар крайм щыщ художник зыбжанэм я лэжьыгъэхэр. 

УФ-м и СурэтыщIхэм я зэгухьэныгъэм Краснодар крайм щиIэ къудамэм и унафэщIым и къуэдзэ Ли Александр и IэдакъэщIэкIхэм къа­дэкIуэу, мы гъэлъэгъуэныгъэм хагъэхьащ абы и лэжьэгъу, и ныб­жьэгъу сурэтыщI 16-м ящIахэр, лэжьыгъи 100-м нэблагъэ къызэ­щIиубыдэу. Дзэ Iуэху хэхам щыIэ щIалэхэм я ехъулIэныгъэхэр, мамырыгъэм щIэбэн зауэлIхэм пщIэ зэрахуэфащэр, хэку лъагъуныгъэр, художникхэр зыгъэгузавэ Iуэху­гъуэхэр лъабжьэ яхуэхъуащ абы.
- Краснодар крайм щыщ художникхэм я IэдакъэщIэкI гъэщIэгъуэнхэр Налшык къыздэсшащ. Ди гупсы­сэкIэр зэрызэтехуэмрэ творчествэм дызэрыдихьэхымрэ дызэкъуегъэувэ. Мы выставкэр сэркIэ щIэщы­гъуэщ, - жеIэ Ли Александр. - Зы пэ­шым си сурэтхэр, адрейм си лэ­жьэгъухэм ящIахэр щагъэлъагъуэ икIи Налшык къалэм щыпсэухэр фыщыдогъэгъуазэ зэныбжьэгъу­-хэм гъуазджэм худиIэ еплъыкIэм. Фигу ирихьмэ, ди гуапэщ. Выставкэр щIыналъэхэм ди зэныбжьэгъугъэм, зэпыщIэныгъэм, щэнхабзэкIэ дызэрызэхъуажэм и дамыгъэщ. Налшык япэу сыкъакIуэу аращи, ­къалэм щыпсэухэмрэ музейм и лэ­жьакIуэхэмрэ гуапэу къызэрытIущIам сигъэгушхуащ. Къалэм и щIыуэпсыр узыIэпызышэщ.
КъБР-м и СурэтыщIхэм я зэгухьэныгъэм и правленэм и уна­фэщI Къаныкъуэ Жаннэ Краснодар крайм и художникхэм фIыщIэ яхуи­щIащ я IэдакъэщIэкIхэр республикэм, къалэм щыпсэухэм тыгъэ къы­зэрытхуащIам папщIэ, лэжьыгъэхэм щIыналъэм и щэнхабзэ, гъуазджэ щытыкIэр зэрырагъэфIакIуэр, дя­пэкIи я зэпыщIэныгъэм зрагъэуб­гъуну зэрыщыгугъыр жиIащ. 
Ли Александр и лэжьыгъищ тыгъэ хуищIащ КъБР-м и Лъэпкъ музейм. Гъэлъэгъуэныгъэр шыщхьэуIум и 30 пщIондэ лэжьэнущ. КъыкIэлъыкIуэу сурэтхэр щагъэлъэгъуэнущ Дон Iус Ростов, Краснодар къалэхэм. 

Сурэтыр  Къарей  Элинэ трихащ.