ИлъэсипщI гъуэгуанэ

КъБКъУ-м и «Занавес» студент театрыр къызэрызэрагъэпэщрэ илъэси 10 ирокъу. Драмэмрэ киномрэ я актрисэ, режиссёр Дохъушокъуэ Мадинэ зи унафэщI театрым, мыкIыхьми, гъуэгуанэ купщIафIэ къикIуащ.

2015 гъэм къызэIуаха театрым япэу щагъэлъэгъуащ Куни Рей и «Плохие парни» гушыIэ спектаклыр. КъыкIэлъыкIуэу, гупым ягъэлъэгъуащ, урыс, хамэ къэрал драматургием я фIыпIэм щыщи, иджырей пьесэхэри.

- Ди лэжьыгъэр фIыуэ зэрытлъагъум, ди актёрхэм жэуаплыныгъэ зэрахэлъым, щIэныгъэ зэрабгъэдэлъым и фIыгъэщ ди ехъулIэныгъэхэр. Актёр ныбжьыщIэхэр куууэ зэрыгупсысэм и щыхьэтщ абыхэм я ролхэр къазэрехъулIэр. Нэхъыщхьэр – театр гъуазджэм хэлъхьэныгъэ хуэщIынырщ, абы зегъэужьынырщ, театреплъхэр лэжьыгъэщIэхэмкIэ гъэгуфIэнырщ, - жеIэ Дохъушокъуэ Мадинэ.

ИлъэсипщIым къриубыдэу «Занавес» театрым артисти 100-м щIигъу щыджэгуащ. IуэхущIапIэм щIэблэм я гъэсэныгъэм хэлъхьэныгъэ хуещI, я гупсысэм зрегъэужь. Театрым и лэжьыгъэ купщIафIэхэмкIэ студентхэр гуапагъэм, цIыхугъэм, хэку лъагъуныгъэм я щапхъэхэм щIапIыкI. Абы и щIэупщIэм, щыджэгуну зи хъуэпсапIэ щIалэгъуалэм я бжыгъэм хэхъуэ зэпытщ. Ягъэува лэжьыгъэхэм ящыщщ Шекспир Уильям и «Ромео и Джульетта» трагедиер, Гоголь Николай и «Ревизор», Искалиевэ Гульнарэ и «Трудный экзамен», Красногоров Валентин и «Театральная комедия», Реза Ясминэ и «Аrt» спектаклхэр.