Налшык къалэм дыгъуасэ щызэхуэсащ «Хэкум и хъумакIуэхэм я Кубок» зэхьэзэхуэм хэтынухэр. Дзэ Iуэху хэхам и ветеран 70-м нэблагъэ Кавказ Ищхъэрэм и щIыналъэ псоми къикIри къытхуеблэгъащ. Жэпуэгъуэм и 3-м къыщыщIэдзауэ 6 пщIондэ екIуэкIыну зэпеуэр Iэтауэ къыщызэIуахащ «Гладиатор» спорт IуэхущIапIэм.
Ипэ зидгъэщу къыхэдгъэщынщи, мы Iуэхур къызэрагъэпэщащ «Хэкум и хъумакIуэхэр» къэрал фондым, Урысейм и Паралимп комитетым, Къэбэрдей-Балъкъэрым и Правительствэм. КъБР-м СпортымкIэ и министр Хьэсанэ Ислъам къызэрыджиIамкIэ, махуищкIэ лIыхъужьхэр зэхьэзэхуэнущ шэ, шабзэ гъэуэнымкIэ, сэ дзынымкIэ, волейболымкIэ, пауэрлифтингымкIэ, стIол теннисымкIэ. Ар спорт зэхьэзэхуэ къудейуэ щытынукъым, атIэ лIыхъужьыгъэм, хахуагъэм, сыт хуэдэ гъэунэхуныгъэми ди щIалэхэр зэрыпхыкIыфым я нэщэнэ хъунущ.
Дагъыстэным, Ингушым, Къэрэшей-Шэрджэсым, Осетие Ищхъэрэ-Аланием, Ставрополь щIыналъэм, Шэшэным, Къэбэрдей-Балъкъэрым я къэрал ныпхэр утыкум кърахьащ республикэхэм я лIыхъужьхэм. Ди щIыналъэм а пщIэр хуагъэфэщащ дзэ Iуэху хэхам и лIыхъужь, дзэ зэпэщIэтыныгъэхэм я ветеран, «Хахуагъэм папщIэ» медалым и етIуанэ нагъыщэр зрата Хъалил Аслъэн.
Зэхьэзэхуэр къызэIузыхахэм хьэщIэ лъапIэхэр яхэтащ: УФ-м и Президентым и полномочнэ лIыкIуэу КИФЩI-м щыIэ Чайкэ Юрий, КъБР-м и Iэтащхьэ КIуэкIуэ Казбек, Урысейм и Паралимп комитетым и президент, Урысейм щIыхь зиIэ и тренер Рожков Павел, «Хэкум и хъумакIуэхэр» къэрал фондым и гъэзэщIакIуэ унафэщI Хабров Юрий, бэнэкIэ хуитымкIэ олимп чемпион, Урысейм и Олимп комитетым и президентым и чэнджэщэгъу, Спортсменхэм я Урысей зэгухьэныгъэм и унафэщI Мусульбес Давид, Урысейм СпортымкIэ и министерствэм щIыналъэ зыужьыныгъэмкIэ и къудамэм и унафэщI Хьэх Алим, СВО-м хэта, дзэ зэпэщIэтыныгъэхэм я ветеран ПщIыхьэщIэ Ахьмэд.
Къызэхуэсахэм видеозэпыщIэныгъэкIэ фIэхъус псалъэ къажриIащ «Хэкум и хъумакIуэхэр» къэрал фондым и унафэщI Цивилевэ Аннэ.
«Хэкум и хъумакIуэхэм я Кубок»-м папщIэ зэхьэзэхуэнухэм захуигъэзащ УФ-м и Президентым и полномочнэ лIыкIуэу КИФЩI-м щыIэ Чайкэ Юрий: «Нобэ, сыт щыгъуи хуэдэу, хьэщIагъэшхуэ къыщыдах Налшык къалэм къыщызэхуэсащ лIыхъужь нэсхэр, цIыху къэмыланджэжхэр, хахуагъэ, пщIэ жыхуэтIэхэм я мыхьэнэр зыхэзыщIэхэр. Дэтхэнэми фи лIыгъэр, Хэкум фызэрыхуэпэжыр дзэ Iуэху хэхам къыщывгъэлъэгъуащ. Ди фIэщ мэхъу фи зэфIэкIхэр пщIэ пылъу мы зэхьэзэхуэхэми къыщывгъэлъэгъуэну. «Хэкум и хъумакIуэхэм я кубок» зэпеуэр ди лIыхъужьхэм зэрызащIэдгъакъуэ Iуэху зэмылIэужьыгъуэ куэдым язщ. Мы зэманым къэралым щытхузэфэкIащ ветеранхэмрэ абыхэм я унагъуэхэмрэ сыт и лъэныкъуэкIи дэIэпыкъуэгъу дазэрыхуэхъунур щызэтедублэну. Ар ди къалэн нэхъыщхьэ дыдэу къытхуигъэлъэгъуащ УФ-м и Президент Путин Владимир. Узыншагъэ быдэ фиIэну, фи мурадхэм фылъэIэсыну си гуапэщ».
КъБР-м и Iэтащхьэ КIуэкIуэ Казбек УФ-м и Президентым и полномочнэ лIыкIуэу КИФЩI-м щыIэм, «Хэкум и хъумакIуэхэр» къэрал фондым, Урысейм СпортымкIэ и министерствэм фIыщIэ зэрахуищIыр жиIащ, мыхьэнэшхуэ зиIэ Iуэхур Къэбэрдей-Балъкъэрым щрагъэкIуэкIыну къызэрыхахам папщIэ. «Ди хьэщIэ лъапIэхэ! Ди гуапэу фыкъыдогъэблагъэ ди щIыналъэм. Ди лIыхъужьхэм фи къаруи узыншагъи фемыблэжу Хэкур хъумэным теухуауэ къалэнышхуэ вгъэзэщIащ. Аращ хахуагъэ жыхуаIэр, икIи Урысей Федерацэм и цIыхубэм фIыщIэшхуэ къыфхуащI. Мыпхуэдэ зэпеуэхэр егъэкIуэкIыныр жэрдэмыфIщ, абыхэм псори дызэкъуагъэувэ. Ноби Хэкум Iуэхушхуэ хувощIэ, къыдэкIуэтей щIэблэм щапхъэ фахуохъури. Си дежкIэ псори фытекIуагъэххэу къызолъытэри, фи къарур адэкIи мыкIуэщIыну, гукъыдэж, ехъулIэныгъэщIэхэр фиIэну сынывохъуэхъу».
Хьэх Алим къеджащ УФ-м спортымкIэ и министр, Урысейм и Олимп комитетым и президент Дегтярёв Михаил къигъэхьа фIэхъус тхыгъэм.
Рожков Михаил жиIащ я къалэн нэхъыщхьэр СВО-м ныкъуэдыкъуагъэ щызыгъуэта щIалэхэр паралимп зэгухьэныгъэм хашэным, зи узыншагъэм къимыхьхэм ятеухуа спортым зегъэужьыным, абыхэм я щапхъэмкIэ щIалэгъуалэр хэкупсэу къэгъэхъуэным зэрепхар.
- Урысейм и спорт гъащIэм мыхьэнэшхуэ щызиIэ Iуэху нобэ Къэбэрдей-Балъкъэрым щокIуэкI. Нэгъабэ «Хэкум и хъумакIуэхэм я кубок»-м хыхьэу Кавказ Ищхъэрэм япэу зэхьэзэхуэхэр щедгъэкIуэкIауэ щытащ. А зэманым къриубыдэу фи зэфIэкIми хэвгъэхъуащ, икIи долъагъу ффIэгъэщIэгъуэну фи щIыналъэхэм я гуп къыхэхахэм фызэрыхыхьэр. СызэрыщыгъуазэмкIэ, мы зэманым дзэ Iуэху хэхам хэта щIалэ 500-м нэблагъэ зи гугъу сщIы гупхэм хыхьащ. 30-м нэблагъэ къэралым и гуп къыхэхахэм хэтщи, абыхэм ящыщ куэд хунэсащ ехъулIэныгъэхэр зыIэрагъэхьэну. ЖысIэнуращи, дэтхэнэми адэкIэ зэрызывужьынумкIэ дэIэпыкъуэгъу дыфхуэхъунущ, - жиIащ хьэщIэм.
Абы дыщIигъуащ «Хэкум и хъумакIуэхэм я кубокыр» Къэбэрдей-Балъкъэрым щрагъэкIуэкIыну ауэ сытми къызэрыхамыхар, республикэм зи узыншагъэм сэкъат иIэхэр спортым хэшэнымкIэ лэжьыгъэшхуэ зэрыщрагъэкIуэкIыр къызэралъытар.
