СурэтыщI гъуазджэхэмкIэ музейм Ткаченкэ Андрей и цIэр зезыхьэм щагъэлъагъуэ «Души моей серебряные нити…» зыфIаща гъэлъэгъуэныгъэр. Абы утыку къыщрахьащ УФ-м и Жылагъуэ палатэм хэт, Ингуш Республикэм и цIыхубэ сурэтыщI, Карабулак къалэм ГъуазджэхэмкIэ и Сабий школым и унафэщI, щIыналъэм и СурэтыщIхэм я зэгухьэныгъэм и унафэщI, УФ-м и ТхакIуэхэм я зэгухьэныгъэм хэт, усакIуэ Мартазанов Муса и лэжьыгъэхэр. Ар къызэрагъэпэщащ художникыр илъэс 50 щрикъум ирихьэлIэу.
НэхъапэIуэкIэ Ингуш Республикэм СурэтыщI гъуазджэхэмкIэ и къэрал музейм и фондым и лэжьыгъэ нэхъыфIхэр КъБР-м СурэтыщI гъуазджэхэмкIэ и музейм щагъэлъэгъуащ. КъыкIэлъыкIуэу, КъБР-м СурэтыщI гъуазджэхэмкIэ и музейм-рэ республикэм и СурэтыщIхэм я зэгухьэныгъэмрэ, «Палитра мира» Iуэхум хыхьэу, Ингуш Республикэм и Карабулак къалэм «Мастера реализма» выставкэр щагъэлъэгъуащ. Мы гъэлъэгъуэныгъэр щIыналъэхэм ди щэнхабзэ зэпыщIэныгъэм, лъэпкъ зэныбжьэгъугъэм зэрызрагъэужьым къыпызыщэщ.
Иджырейм къызэщIеубыдэр Мартазанов Муса Iэмал, жанр зэмылIэужьыгъуэхэм щыщ и живопись, графикэ, декоративно-прикладной гъуазджэм и лэжьыгъэ 30-м нэблагъэ. Абыхэм щыболъагъу бгыхэр, къурш уардэхэр, щIыналъэм и щIыуэпс къулейр, удз гъэгъа щхъуэкIэплъыкIэхэр. Гъэм и сыт хуэдэ зэманми щIыуэпсым и даха- гъэр къыщигъэлъэгъуа сурэтхэр плъыфэбэщ, щIэщыгъуэщ, гупсысэ ящIэлъщ.
КъБР-м и Парламентым щэнхабзэмкIэ, граждан жылагъуэм зегъэужьынымрэ хъыбарегъащIэ IуэхухэмкIэ и комитетым и унафэщI Текуев Амурбий и псалъэм къыхигъэщащ художникым и зэфIэкIыр зэрыинри и лэжьыгъэхэм зэрыхэплъагъуэр, Кавказым щыпсэу лъэпкъхэм я дунейр, щIыуэпсым и дахагъэр абыхэм къызэрыщигъэлъэгъуар. Абы Мартазановым фIыщIэ хуищIащ, и лэжьыгъэхэр ди щIыналъэм къызэришам, сурэтыщI гъуазджэр фIыуэ зылъагъухэм апхуэдэ тыгъэ къазэрыхуищIам папщIэ.
КъБР-м и СурэтыщIхэм я зэгухьэныгъэм и унафэщI Къаныкъуэ Жаннэ жиIащ зи илъэс 50-м ирихьэлIэу выставкэ 50 къызэзыгъэпэща Мартазанов Муса зы цIыху гъащIэм къриубыдэу апхуэдиз зэфIэкI зэриIэр зэригъэщIагъуэр икIи абы ехъуэхъуащ дяпэкIи емызэшу, дэрэжэгъуэрэ ехъулIэныгъэрэ иIэу гъащIэ узыншэ къигъэщIэну.
- Ди щIыналъэм исхэм си гуапэу сынывохъуэхъу мыпхуэдэ лэжьыгъэхэр зэрыщагъэлъагъуэмкIэ. Кавказым ис лъэпкъхэр дызэкъуэтмэ, дылъэщщ. ГъуазджэмкIэ, щэнхабзэмкIэ, нэгъуэщI унэтIыныгъэхэмкIэ диIэ зэфIэкIхэмкIэ дызэхъуэжэну Iэмал дызэриIэр фIыщ. Ди нэхъыжьыфIхэм къытхуагъэна хъугъуэфIыгъуэхэр художник-хэм, композиторхэм, артистхэм я лэжьыгъэхэм щыдолъагъу. Лъэпкъхэм ди щэнхабзэ, хабзэ дахэхэр тхъумэну, ахэр щIэблэм я деж нэтхьэсыну ди къалэнщ. Муса, дяпэкIи ехъулIэныгъэ уиIэну ди гуапэщ! – жиIащ КъБР-м и Жылагъуэ палатэм щэнхабзэмкIэ, псэкупсэ хъугъуэфIыгъуэхэр хъумэнымрэ хъыбарегъащIэ IэнатIэхэмкIэ и комиссэм и унафэщI, КъБР-м и Лъэпкъ музейм и унафэщI Накуэ Феликс.
КъБР-м и цIыхубэ сурэтыщI Жылэ Анатолэ жиIащ гъунэгъу щIыналъэм щыпсэу художникым и IэдакъэщIэкIхэр ди деж зэрыщагъэлъагъуэр зэригуапэр, абы и лъахэм хуиIэ лъагъуныгъэр и лэжьыгъэхэм зэрыщынэрылъагъур, ди зэпыщIэныгъэхэм адэкIи зрагъэубгъуну зэрыщыгугъыр.
Музейм и фондым и хъумакIуэ нэхъыщхьэ, УФ-м и цIыхубэ IэпщIэлъапщIэ Мокаев Владимир и псалъэм къыхигъэщащ Мартазанов Муса и лэжьыгъэхэр гъэщIэгъуэн зэрыщыхъуар, сурэтыщIым хьэл-щэн дахэр, жэуаплыныгъэ зэрыдилъагъур, жы-лагъуэ лэжьыгъэми жыджэру зэрыхэтыр.
Мартазановым жиIащ Налшык фIэфI дыдэу и лэжьыгъэхэр къызэришэр, лъэпкъхэм яку зэныбжьэгъугъэрэ зэпыщIэныгъэрэ дэлъын, зэкIэлъыкIуэн, къэкIуэнур зэдаухуэн, зым и хабзэхэмрэ щэнхабзэмрэ пщIэ хуащIын зэрыхуейр, сурэтыщIхэм цIыхухэр фIым, дахагъэм хуагъэушыныр, гъуазджэм и курыхыр зыхрагъэщIэныр я къалэн нэхъыщхьэу къызэрынэжыр, сурэт щIыным дихьэх балигъи, ныбжьыщIи, сабий сымаджэхэми зэрадэлажьэр, сурэт миным щIигъу зэрищIар, усэ 500-м нэблагъэ зэритхар. Мартазановым фIыщIэ яхуищIащ гуапэу къезыгъэблэгъахэм, выставкэм зыкърезыгъэхьэлIахэм, и лэжьыгъэхэм псалъэ гуапэ хужызыIахэм. Муса къыхигъэщащ илъэс 40, 45-рэ, 50 щрикъухэм ирихьэлIэу, хабзэ зэрыхъуауэ, апхуэдиз гъэлъэгъуэныгъэ къызэрызэригъэпэщыр. Абы и лэжьыгъэхэм ящыщ зы музейм тыгъэ къыхуищIащ.
Мартазанов Муса теухуауэ: Мартазанов Муса 1975 гъэм накъыгъэм и 9-м Ингуш Республикэм хыхьэ Карабулак къуажэм къыщалъхуащ. Экономист, психолог, сурэтыщI IэщIагъэхэр зригъэгъуэтащ. КъищынэмыщIауэ, усэ етх, ахэр щызэхуэхьэса тхылъитI къыдигъэкIащ. И лэжьыгъэхэр Москва, Иркутск къалэхэм, Краснодар крайм, Къэрэшей-Шэрджэс, Адыгэ, Шэшэн республикэхэм, нэгъуэщIхэми щагъэлъэгъуащ.
Выставкэр жэпуэгъуэм и 20 пщIондэ лэжьэнущ. Иужьрей махуэм музейм щекIуэкIынущ Мартазанов Муса и пшыхь. Ар къеджэнущ и усэхэм.
Сурэтыр Къарей Элинэ трихащ.
