Данте и тхыгъэм ирипх гупсысэхэр

КъБР-м и Лъэпкъ музейм щагъэ­лъагъуэ УФ-м и СурэтыщIхэм я зэгухьэныгъэм хэт, республикэм и цIыхубэ сурэтыщI, КъБР-м ЩэнхабзэмкIэ и министерствэм къегъэ­щIы­лIауэ лажьэ ЦIыхубэ творчествэмкIэ щэнхабзэ центрым и унафэщI Жылэ Анатолэ и лэжьыгъэхэр.

Абы утыку къыщрахьащ Данте Алигьери и «Божественная комедия» поэ­мэм Жылэм хуищIа графикэ лэжьыгъэ 50-м щIигъу. Художникхэм мы сурэтхэр къалъытащ республикэм и щэнхаб-   зэм зезыгъэужь лэжьыгъэ хьэлэ­мэ­тыщэхэу.
- Жылэ Анатолэ и IэдакъэщIэкIхэр гъэщIэгъуэнщ, куэди къызэщIаубыдэ. Данте и тхыгъэ уахътыншэм хуищIа сурэтхэр цIыхухэм гунэс ящымыхъун­-кIэ Iэмал иIэкъым, - жиIащ КъБР-м ­щэнхабзэмкIэ и министрым и къуэдзэ Карчаевэ Аминэ. - Данте и поэмэм су­рэтхэр езым хуищIыжами, дуней псом и художникхэм лIэщIыгъуэ куэд хъуауэ я лэжьыгъэ траухуэ мы тхыгъэм зыхуишэ гупсысэхэм. Псом хуэмыдэу тфIэгъэ­щIэгъуэнщ епщыкIуплIанэ лIэ­щIыгъуэм къыдэбжэ тхыгъэм иджырей сурэ­ты­щIым хуиIэ еплъыкIэр. Ар Жылэ Ана­толэ къехъулIауэ, гъуазджэмкIэ иIэ зэфIэкIыр, зыужьыныгъэр уэзыгъэ­лъагъуу къызолъытэ. Мы сурэтхэм ­къагъэлъагъуэ художникыр лIыпIэ зэ­риувари, и лэжьыгъэщIэхэм иджыри дыпоплъэ.
КъБР-м и цIыхубэ сурэтыщI Бгъэжьнокъуэ Заурбэч гъэлъэгъуэныгъэм ­зыкърезыгъэхьэлIахэм ягу къигъэкIыжащ щIагъыбзэ зыщIэмылъ гъуазджэ лэжьыгъэр нэсу къэплъытэ зэрымы­хъунум теухуауэ драматург Шоу Бернард жиIахэр. Абы и лъэны­къуэкIэ ­къыхигъэщащ Жылэм и гра­фикэ лэ­жьы­гъэхэм щIагъыбзэ куу зэращIэ­лъыр, а щIагъыбзэр сурэтыщIым и Iэ­дакъэщIэкIхэм гупсэхуу ущеплъкIэ къызэрыбгурыIуэр. Къэпсэлъам къы­хигъэщащ Жылэ Анатолэ щIэ куэдым зэрытегушхуэр, ар ди республикэм и ­художник нэхъыфIхэм ящыщу къызэ­рилъытэр. 
Филологие щIэныгъэхэмкIэ доктор Гъут Iэдэм къедаIуэхэм ягу къигъэкIыжащ Навои Алишер и псалъэхэр: «Аслъэным и гъусэу уетIысэхын папщIэ, аслъэну ущытын хуейщ…». Анатолэ и лэ­жьыгъэхэр къызэрехъулIар, дунейпсо литературэм хэIэбэу къыхиха тхыгъэм зыкIи емыфэгъуэкI сурэтхэр къызэригъэщIар къыджиIэущ Гъутым и псалъэр си щхьэкIэ къызэрызгурыIуар.
КъБР-м и цIыхубэ сурэтыщI Црым ­Руслан жиIащ гъэлъэгъуэныгъэм хагъэхьа графикэ лэжьыгъэхэр нэхъ ину щIауэ Жылэм утыку кърихьэну зэ­рыпэплъэр, сурэтыщIыр теувапIэ нэхъ лъагэхэм кIуэ пэтми зэрыдэкIуейр, нэхъ­ри зэрызыкъызэкъуихыр. 
- Анатолэ зэрысцIыхур сурэтыщI ­гъуазджэм хуэпэж художникыущ. Нэхъыщхьэращи, ар ящыщкъым Iуэхум тезашэу къэувыIэхэм, зы пIэм итхэм, - жиIащ КIыщ Мухьэдин и щхьэгъусэ Жаклин Дианэ. - Зи мурадхэр зэзы­гъэхъулIэф сурэтыщIым и Iэдакъэ­щIэкIхэм ящIэлъ гупсысэр зэуэ къэу­быдыгъуафIэкъыми, зыгурыдгъэIуэну къытпэщылъщ. 
Жылэ Анатолэ ехъуэхъуащ и ныб­жьэгъухэмрэ и лэжьэгъухэмрэ. Абы ящыщщ КъБР-м и цIыхубэ артист Зеу­-щэ Iэуес, КъБР-м и Профсоюзхэм щэнхабзэмкIэ и рескомым и унафэщI, УФ-м щIыхь зиIэ и артисткэ Дау Марианнэ, КъБР-м и СурэтыщIхэм я зэгухьэныгъэм и правленэм и унафэщI Къаны­къуэ Жаннэ, нэгъуэщIхэри. Къэпсэ­лъа­хэм художникым хъуэхъукIэ зыхуа­гъэза нэужь, къыхагъэщащ Жылэ Анатолэ сурэт щIыным зэфIэкI ин зэрыщиIэр, и лэжьыгъэхэм гупсысэшхуэ зэращIэ­лъыр, езыр цIыху гуапэу, зэпIэзэрыту зэ­рыщытыр. 
УФ-м и Профсоюзхэм щэнхабзэмкIэ   я лэжьакIуэхэм къабгъэдэкIыу Жылэ Анатолэ иратащ «Профсоюзым жы­джэру зэрыхэтым папщIэ» дыщэ бгъэ­хэIу дамыгъэр. ЗэIущIэм къыщеджащ Адыгэ Республикэм и художникхэм, ЦIыхубэ творчествэмкIэ методикэ ­центрым и лэжьакIуэхэм, Жылэ Ана­толэ и ныбжьэгъухэм къабгъэдэкI хъуэ­хъум. 
Жылэ Анатолэ фIыщIэ яхуищIащ выставкэр къызэзыгъэпэщахэмрэ абы зыкърезыгъэхьэлIахэмрэ, и лэжьыгъэ­хэм гу къылъызытэхэм. 
Гъэлъэгъуэныгъэр жэпуэгъуэм и 26 пщIондэ екIуэкIынущ.

Сурэтыр Къарей Элинэ трихащ.