ЩэкIуэным теухуа хабзэхэр

КъБР-м и Парламентым Мэкъумэш IэнатIэмкIэ, щIы­уэп­сыр къэгъэсэ­бэ­пынымкIэ, экологиемрэ дыкъэзыу­хъуреихь ­дунеймкIэ и комитетым иджы­благъэ иригъэкIуэкIа зэIущIэм щы­теп­сэлъыхьащ хьэкIэкхъуэ­кIэ­хэмрэ къуа­лэбзу­хэмрэ зэрахъумэн, щэкIуэныр къы­зэрызэрагъэпэщ Iуэху­хэм. 

Комитетым и унафэщI ТекIушэ Артур зэIущIэр къыщы­зэ­Iуихым къыхигъэщащ зи гугъу ящIынум лъэныкъуэ куэд къызэрызэщIиубыдэмрэ ар зэры­мы­тын­шымрэ. 
КъБР-м и Парламентым и УнафэщIым и къуэдзэ Жа­-натаев Сэлим жиIащ республикэм и хабзэубзыху IуэхущIапIэм иджы япэу къыщаIэта Iуэхум теухуауэ я еплъыкIэхэм­-кIэ зэдэгуашэу, зы унафэ гуэрым ахэр хуэкIуэн зэрыхуейр. 
КъБР-м щIыуэпс хъугъуэфIыгъуэхэм-рэ экологиемкIэ и ­министрым и къуэдзэ Табыхъу Аслъэнджэрий зэрыжиIамкIэ, Къэбэрдей-Балъкъэрым ущыщакIуэ ­хъуну и щIыпIэхэм гектар мин 870-рэ яубыд. Абы щыщу гектар мин 575-м ­хуиту щощакIуэ. Гектар мин 294-р я нэIэм щIэтщ Iуэху­щIапIэхэмрэ хьэрычэтыщIэхэмрэ. 
Къэпсэлъам къыхигъэщащ ХьэкIэ­кхъуэкIэхэр щыпсэу щIы­пIэхэр къызэрагъэсэбэпымрэ ахэр хъумэнымкIэ де­пар­та­ментымрэ щыщакIуэ щIыпIэхэр зейхэмрэ гъэ къэс илъэсым и пэм къы­зэрапщытэр Къэбэрдей-Балъкъэрым щы­зекIуэ псэущхьэхэм я бжыгъэр. Абы ипкъ иткIэ ягъэ­белджылы къащэкIуну зыхуитыр зыхуэдизыр.
Республикэм къыщаукIыну зыхуитхэм ящыщу бжыгъэ ­хэха зы­хуагъэувхэм яхэтщ къурш бжэныр. 2024 - 2025 гъэхэм апхуэдэу къащэкIуну зыхуиту ягъэувар 170-м нэсщ. Къищы­нэмыщIауэ, респуб­ликэм щощакIуэ кхъуэпIащэм, дыгъу­жьым, хьэIуцIыдзым, тхьэкIумэкIыхьым, бажэм. Къэбгъэ­лъагъуэмэ, 2024 - 2025 щэкIуэгъуэ пIалъэм къриубыдэу, щэкIуэну хуит зэращI тхылъу 2800-м щIигъу ятащ. 
Нэгъабэ республикэм и щIыпIэ зэ­мылIэужьыгъуэхэр ­къап­щыта нэужь, административнэ хабзэр къызэпызыуд Iуэху 64-рэ къыщIагъэщауэ щытащ, ­къуэдыуэ сом мини 118-м щIигъу тралъ­хьащ. Къи­щынэмыщIауэ, зи мылъку ­хагъэщIам пэкIуэ ахъшэр иратыжыну ­хуагъэуващ псоми зэхэту сом мини 183-рэ. 
ЗэIущIэм щытепсэлъыхьащ Бдзэжьей ещэнымкIэ фе­де­ральнэ агентствэм ­Кавказ Ищхъэрэм щиIэ щIыналъэ ­къу­дамэм зэрыдэлажьэм, КъБР-м и Тхылъ Плъыжьым ­иратхэр къызэзыгъэпэщ комиссэм и IуэхущIафэм, гъунэгъу респуб­ликэхэм зэрапыщIам, нэгъуэщIхэми. 
Табыхъум жиIащ 2024 гъэм республикэм и щIыпIэхэм щыIэ кхъуэхэм африкэ уз зэрыцIалэ яIэрэ-ямыIэрэ зэха­гъэкIы­ным теухуауэ къэхутэныгъэ 37-рэ къызэ­рыщыхахар, Iуейуз (ящур) япкърытрэ-япкърымытрэ къэзыгъэлъагъуэ къэп­щытэныгъэ 26-рэ зэрырагъэкIуэкIар. Апхуэдэхэр къахэкIакъым. 
Ар тепсэлъыхьащ псэущхьэхэм я ­бжыгъэр хъумэным ­хуэгъэзауэ ирагъэ­кIуэкI лэжьыгъэм, «Бдзэжьеящэ уна­гъуэ», «Бдзэ­жьеящэ гъунапкъэншэ» Iуэху­хэр зэрырагъэ­кIуэкIым, щыхь лIэу­жьыгъуэр гъэбэгъуэнымкIэ зэфIагъэкIым. 
Гугъуехьхэм ящыщу къэпсэлъам къигъэлъэгъуащ къэ-рал къэпщытакIуэхэр зэрахуримыкъур. Абы и зэранкIэ, щэ­кIуэ­ным епха къалэн щхьэхуэхэр зыхуей хуэзэу къызэ­рагъэпэщы­фыркъым, хабзэхэм ебакъуэу хьэкIэкхъуэкIэ­- хэр къэ­зыукI­хэм зэрапэщIэтыр къелъахъэ. 
И Iуэху еплъыкIэр къигъэлъэгъуащ ­КъБР-м и Парламентым Мэкъумэш IэнатIэмкIэ, щIыуэпсыр къэгъэсэбэпы­нымкIэ, экологиемрэ дыкъэзыухъуреихь ­дунеймкIэ и ко­митетым и унафэщIым и къуэдзэ Щхьэгъэпсо Сэфарбий. 
ЗэIущIэм депутатхэр щытепсэлъы­хьащ щыщакIуэ щIы­пIэ­хэм зэрыхагъэ­хъуэну Iэмалхэми, а Iуэхум епхауэ министерствэхэр зэдэгъэлэжьэнми. ЖаIахэр къэлъытауэ, коми­тетым иубзыхуащ зэ­лэжьын хуей Iуэхухэр.