Вэрокъуэ Владимир и цIэр зезыхьэ ЩэнхабзэмкIэ фондым зэIущIэ гуапэ щызэхэтащ. Зыхуагъэфэщахэм абы щратыжащ Арткомитетым игъэува орденыр - «Урысейм лэжьыгъэмкIэ щытхъу щызиIэхэр».
Фондым и унафэщIу щыта, Къэбэрдей-Балъкъэрым гъуазджэхэмкIэ щIыхь зиIэ и лэжьакIуэ, кинорежиссёр цIэрыIуэ Вэрокъуэ Владимир гуапэу ягу къагъэкIыжу тепсэлъыхьа иужь, япэу псалъэ иратащ Дунейпсо арткомитетым и вице-президент, Евразие, Урысей арткомитетхэм я унафэщI, орденыр зи жэрдэмкIэ ягъэува Бейтыгъуэн Iэуес.
- Дэ дыщопсэу цIыхушхуэхэр зиIэ, гуащIэрыпсэухэр щылажьэ, щIэ гуэрхэр къыщызэIуах, ехъулIэныгъэхэр щызыIэрагъэхьэ къэрал лъэщым. Нобэ мы пэшым къедгъэблэгъащ щытхъу яIэу, я къару емыблэжу щIыналъэм хуэлажьэхэр. Зэманыр зэрыгугъум емылъытауэ, ди цIыхухэм къыщалъхуа я Хэкур фIыуэ зэралъагъум, абы зэрыхуэпэжым, лъэпкъ хьэл-щэн зэрахъумэм уегъэгушхуэ. ДыкъызыкъуэгушхукI хъуну ди къэралыр IумпIафIэ зыщIыну хуейхэм ар къайхъулIэнукъым, дэ дызэкъуэтщ, Урысейм дрицIыхущи, - жиIащ Iэуес икIи къызэхуэсахэм ехъуэхъуащ узыншагъэрэ Iуэху дахэхэмрэ щымыщIэну.
Орден лъапIэр зыхуагъэфэщахэм иратыжащ Москва и Правительствэм и деж Лъэпкъ IуэхухэмкIэ щыIэ советым хэт, «Урысейм щыпсэу лъэпкъхэм я зэгухьэныгъэм» и унафэщI, Украинэм щекIуэкI дзэ Iуэху хэхахэм хэта Тагашёв Сергейрэ Бейтыгъуэн Iэуесрэ.
Зи цIэ къраIуахэр: психологие щIэныгъэхэмкIэ кандидат, педагогикэ щIэныгъэхэмкIэ доктор, ЩIэуэ къежьэ IэмалхэмкIэ университетым (МИУ) щезыгъаджэ, «Истоки» лъэпкъ щэнхабзэ центрым (Сочэ къалэ) и унафэщI Учадзе Семён, тхакIуэ-тхыдэдж, журналист, къэхутакIуэ-архивист цIэрыIуэ, тхыдэмкIэ щIэныгъэ тхыгъэ, тхылъ куэд зи къалэмыпэм къыпыкIа Опрышкэ Олег, Кулиев Къайсын и цIэр зезыхьэ Балъкъэр къэрал драмэ театрым и унафэщI, КъБР-мрэ Ингуш Республикэмрэ я цIыхубэ артист Жангуразов Мэжид, Тэрч районым ЩэнхабзэмкIэ и унэм и унафэщI, цIыхухэр я псэуныгъэр зыхуей хуэзэу къызэгъэпэщыным щIыхь зиIэ и лэжьакIуэ, Урысей Федерацэм егъэджэныгъэмкIэ щIыхь зиIэ и лэжьакIуэ, Тэрч къалэм щIыхь зиIэ и цIыху КIэрэф Мурадин сымэ, нэгъуэщIхэри.
Я гуащIэкIэ къэзылэжьахэм пщIэ яхуэщIыныр зи гукъэкIхэм псалъэ гуапэкIэ захуигъэзащ Опрышкэ Олег.
- ЩэнхабзэмкIэ фондым илъэс 70 сыщыхъуари, 80 сыщрикъуари щысхуагъэлъэпIауэ щытащ, - жиIащ абы. - Сэ илъэс 90 гъэмахуэм сыхъуащ, ар мы дамыгъэ лъапIэмкIэ схуаIэтри, си гуапэщ. Си дипломым ит тхыдэдж-архивист IэщIагъэр згъэпэжу, си тхылъ 18-ми дэфтэрхэр я лъабжьэщ, шэч къызытумыхьэжыну пэжщ абыхэм итыр. Ахэр зэрыхьэкъым ещхьщ Къэбэрдей-Балъкъэрымрэ абы и цIыхухэм-рэ яхузиIэ лъагъуныгъэр. Дэтхэнэми фи акъылыр къабзэу си ныбжь фынэсыну сынывохъуэхъу.
Пшыхьыр ягъэдэхащ КъБР-м и Музыкэ театрым и уэрэджыIакIуэхэу, КъБР-м, Осетие Ипщэм щIыхь зиIэ я артистхэу Мамбэт Мадинэрэ Даур Иринэрэ, лъэпкъ куэд зыхэт зэхьэзэхуэ зыбжанэм я лауреат, Кавказым и «Дыщэ микрофон» макъамэ дамыгъэ нэхъ лъапIэ дыдэр зыхуагъэфэща, Сочэ къалэм щыщ Орлов Вадим, Бий Аслъэн сымэ.
Сурэтыр Къарей Элинэ трихащ.
