Губзыгъагъэм къару иIатэмэ

 Къэбэрдей-Балъкъэрым фIыуэ щацIыху,  гъунэгъу республикэм и муфтий Гацалов Хаджимурад  и лъэпкъэгъухэм  захуигъэзащ ефэ-ешхэкIэ зэрырагъэлейм къыхэкIыу.   

Iуэхум къыщыщIидзар илъэс блэкIам и кIэм екIуэкIа Iэнэ хъурейрщ. Осетинхэм ягъэлъапIэ хабзэ Джеоргубэ лъэпкъ махуэшхэм теухуауэ Гацаловым жиIахэр зыгуэрхэм пхъашэIуэу къащыхъуащ: «Профессор гуэрым седэуащ Джеоргубэм теухуауэ. «Ар махуэшхуэщ, сыт жыпIэр?» - жиIэурэ къызэдауэрт апхуэдизу шейтIаным иубыда а цIыху губзыгъэр. УтIысрэ тхьэмахуэ псокIэ ушхэрэ уефэу ущысыныр сыт делагъэ, жесIащ. Абы мылъкурэ зэману текIуадэми цIыху бжыгъэу игъэхьэулейми я гугъу сщIыркъым. Тонн дапщэ мы тхьэмахуэ закъуэм Осетием щрафамрэ щашхамрэ зыхуэдизыр? Махуэшхуэ зыфIэфща  а фи дауэдапщэм тхьэмахуэ псокIэ фыщофэ. Мин пщIы бжыгъэкIэ Iэнэхэр вгъэуващ, цIыху щэрэ минхэр щывгъэсащ, апщIонэху ди щIалэгъуалэм факъыщхьэщыжу, ахэр зыхэт зы лъэпощхьэпом фытепсэлъыхьа? Хьэуэ! Фыуэршэру,  фыщIефэн щхьэусыгъуэ фиIэн щхьэкIэ, зы хъуэхъужьым еуэ-еуэу къытевгъазэу фызэхэсауэ аращ. Адрей псори абы и теубгъуэнщ. Удохутырми, уакадемикми, фадафэ Iэнэм  ухэзэрыхьамэ, абдежым нэхъыкIэ дыдэу щысхэм уарещхьу аращ, фIы щIагъуэ къыппымыкIыну».

Осетием мыр къыщохъу щыжытIэкIэ, республикэм и Iуэхур зэIыхьауэ, ахэр нэхъ зэпэщIэувэрейуэ къыпфIэщIынкIи хъунущ. ИпэжыпIэкIэ, а республикэм жылагъуэ лэжьакIуэхэр, блогер лъэрызехьэхэр исщ, я цIыхубэ гъащIэри куэдкIэ нэхъ щIэгъэхуэбжьащ, аращ я деж щекIуэкI псори хэIущIыIу щIэхъур. Гацаловым жиIар зигу иримыхьахэм  къару нэхъыбэ зиIэу яхэтыр жылагъуэ лэжьакIуэ Бугулов Леоу къыщIэкIащ.  Акъылэгъу куэд зэриIэр къыгурыIуа нэужь, Бугуловым хабзэхъумэхэм наIуэу захуигъэзащ, Гацаловым и псалъэхэм осетин лъэпкъыр зыгъэпуд мыхьэнэ хэтрэ хэмытрэ зэхагъэкIыну. АпщIондэху псалъэмакъыр лъэпкъым и пэж зэхэгъэкIыпIэ хъуащ, щхьэж езым и еплъыкIэр игъэзэхуэну хэту.  Дауи, дэри ди еплъыкIэхэр зэтехуэркъым, ауэ апхуэдэу зэIухауэ, зыгуэркIэ ягъэкъуэншэнкIи мышынэу, я гупсысэхэр къызэрагъэлъагъуэм  IупщI ещI Осетием щекIуэкI жылагъуэ гъащIэм лъабжьэ зэриIэр. 

Гацаловым къыщхьэщыжахэм язщ мызэ-мытIэу зи гугъу тщIа депутат Дидаров Сослан: «Си щхьэкIэ, Гацаловым жиIахэм гум ежэлIэн къуаншагъэ яхэслъэгъуакъым. Ар зытепсэлъыхьар ди хабзэмрэ дауэдапщэхэмрэкъым, ахэр пхэнжу къазэрыгурыIуэрщ, лъэпкъ хабзэ фIащу, цIыхухэр тхьэмахуэ псокIэ зэрыхьэулейрщ, я ныбэр якъуу, фадэм зрагъэтхьэлэу, хабзэр зэIащIэрэ абы хэмылъ халъхьэу. Сыт мыпэжу ди нэхъыжьыфIым жиIар?»

Муфтийм зэриакъылэгъур ибзыщIакъым Осетие Ищхъэрэ-Аланием и следственнэ управленэм илъэс куэдкIэ щылэжьа Цоков Феликси: «Кавказ республикэ псоми хэхъуэ яIэщ, Осетием иужьрейуэ екIуэкIа къыхэтхыкIитIым я зэхуакум  дивизитI хуэдиз хъун цIыху бжыгъэ яхэщIащ. ФадэкIэ щрагъэлей хабзэ мыухыж йокIуэкI, ди лъэпкъыр ирилъэсыкIыу.  Гацаловым и псалъэ къэс си Iэ щIызодз. Ар хабзэм ефшэлIэнумэ, сэри сефшалIэ».

ЩIышылэм и 12-м хэIущIыIу хъуа Бугуловым и тхьэусыхафэм и ужькIэ, Гацаловым абы зыпэщIисэн я гугъа щхьэкIэ,  апхуэдэ къаугъэи къэхъеякъым. Муфтийр утыкум къихьэри, Бугуловым и псалъэхэм езыр ягъэпудауи, езым жиIахэмкIэ осетинхэм я Iей зэрызэримыхуари къыхэщу, псэлъащ. «Кавказ Ищхъэрэ псом хэщIыныгъэ нэхъыбэ щызиIэр ди республикэращ, - жиIащ абы. - Осетием цIыхухъухэр щынэхъ гъащIэ кIэщIщ. Псоми япэ дитщ фадэм къыхэкI кIуэцI узхэмкIэ: лъатIэ-кIэтIий узыфэхэмкIи, гу-лъынтхуэ узхэмкIи. Сэ жысIар зытеухуар Джеоргубэ махуэшхуэратэкъым, ди ефэн-ешхэнымрэ хьэгъуэлIыгъуэхэмрэт. МахуиблкIэ Iэнэ упэрысыным фIы къызэримышэр щапхъэу къэсхьауэ аркъудейщ. ЦIыхум и уасэр къэзыгъэлъагъуэр абы жиIэ хъуэхъухэракъым, атIэ и мурадхэр зэрыкъабзэмрэ и IуэхущIафэхэр зэрыдахэмрэщи, мис абыхэм дыщызыкъуэвгъэувэ, дылъэпкъыр  пэжмэ».

ЧЭРИМ Марианнэ.